دولاب الزمن

15

#دولاب_الزمن15
Shahd Alsalman

كعدت ويا ادم وهو بحضني وكمت اسألة عن الصار
- ادومي شنو الصار وياك
- والله ما ادري ربا جنت نايم
-اي وبعدين احجيلي كل شي بالتفصيل
اول شي شنو موضوع الحاسبة
- اني مطلبت منها حاسبة مو انت معلمتني ما اطلب شي من احد حتى بابا وكتيلي من نكبر ونشتغل اني وانت نوفر كل شي نحتاجة
- اي حبيبي صحيح
- اي فأني ما طلبت منها هي اجت كالتلي انت ليش ما عندك حاسبة كتلها ما احتاجها ما عندي وكت العب بيها
- اي
- ماكو كم يوم وجابتها الي وكالتلي هاي منصبة وكاملة وبيها العاب وهواية شغلات حلوة
- زين انت ليش مكتلي
- نسيت لان اصلا ما استعملتها من ايدها للكنتور حتى الشاحنة ملفوفة والله بلزكتها ابد ما فتحتها
- كلش زين كمل حبيبي
- شكمل انت شفتي بعينج ابويا هد علية يكلي انت تفتح اقراص اباحية
- اممم انت تعرف شنو اباحية
- اي جماعتي بالمدرسة يتفرجون هيج سوالف ويحجولي بس اني ما اخليهم ولا اتفرجهم
- فدوة رحتلك يا ريحة امي
- اسم الله عليج المهم اني ضجت وصعدت وعرفت من تدبير نورهان وافتهمت ليش هي جابت اللاب توب
- اي وليش بالليل ضربك لعد
- باعي جنت نايم ما شفت الا نرجس يمي بالفراش وامها تصيح فوك راسي وتدعي وتبجي والنوم بعيني مدا افتهم شكو اجة ابوية وعبير وبعد انت تعرفين الصار
- يعني هي تهمتك ببنتها مو
- اي بس والله يا ربا وروح امي ما سويت شي
- لا يا روحي لا تحلف مصدكتك بس الله ينتقم منها باجر الدنيا تندار وتوكع بشر اعمالها وهي عدها بنات
وعدها ولد
- تدرين جمال لازم هالفترة يجي هيج سمعت من عبير
- اي اعرف
-شون عرفتي
- اعرف وخلص كوم يلة نام شوية ارتاح بينما اسوي غدا
- لا حجي اساعدج وورة الغدا انام بحضنج مثل قبل
- يلة حبيبي كوم لعد
كمنا اني وهو شفت شي خطف كانو احد جان يمنا وانهزم من شافنا
كلت معقولة الدكتور هنا بعدين كلت يجوز اني متوهمة
قبل لا اسوي غدا اني جنت مستأذنة من الدكتور حتى استعمل الاغراض وكالي الج مطلق الحرية وهذا بيتج وبيت ادم

الله ينطي شكد حباب وشكد ساعدنا برغم ما يعرف كل شي اشياء قليلة يعرفها عنا
طلعت تمن ومعجون كلت اسوي تمن احمر وجان اكو سمج طلعتة كطعتة وتبلتة حتى اخلي بالطاوة اكلي

ادم مساعدني بس يكركط بالخيار مثل الفارة ههههه
خلصت طبخ وبلشت اسوي الزلاطة دا اكطع الخيار رجعتلي الدوخة والرجفة وكعت على حيلي بالكاع واحس جسمي متشنج كلش ما اكدر اتنفس
ادم يصيحني اجاوبة بس يمكن ميسمعني

عافني واسمعة يصيح للدكتور اجة هو يركض عدل جسمي وحطلي خاولي بحلكي
و ادم تهستر علية مديعرف شيسوي الدكتور كالة اهدى شوي هسة تخف النوبة لا تخوفها اكثر لزم ايديا شوية شوية كمت اتنفس احسن وخفت الرجفة عندي بس الدوخة ذبحتني
هديت ورة دقايق اباوعلهم بتعب وعيوني ما بية افتحهم يمكن نمت

كعدت وقت العصر تقريبا ادم جان يمي واني بالفراش الدكتور فات علينا شاف حرارتي وجيك نبضي كالي هسة تمام اتحملي هالكم يوم وترجعين طبيعية
كتلة اني هسة احس مرتاحة عادي اكوم هز براسة يعني اي
كمت غسلت وجهي وايدي ورتبت شعري اللفة الرسمية مال بيت هههه الكبة

رجعت للمطبخ لكيت الزلاطة صايرة والاكل مصبوب وحار انداريت جانو واكفين ادم والدكتور كال احنا كملنا عنج وصبينا و بعد ما نتحمل الجوع ذبحنا والريحة تجنن
كعدنا اكلنا والدكتور ياكل ويكول امممم
- ادم شو انت متتعجب من طعم الاكل ترة يخبل
- دكتور اني من عمري 6 سنوات اكل من ايد ربا تعلمت عليها
- يعني شكد جان عمرج من جنتي تطبخين ؟
- 8 سنوات
- شنوووو صدك تحجين بس انت طفلة
- هههههه اشكرك
- هههههه لا قصدي جنتي طفلة شون تسيطرين
- سيطرت الحمدلله ومشت الامور اللي يريد شي ومضطر علي يكدر يسوي
- صحيح والله تدرين صارلي فوك ال 8 سنين مضايك طبخ بيت وكلة لو سوك لو احد يطبخلي بس مطيب او مو مثل هذا
- الله يساعدك بعد منا وجاي كلة بالبيت تاكل واذا عندك دوام اسويلك وتاخذة وياك
- هذا تعب عليج اني ادبر نفسي
- بالعكس يا ريت اكدر اسويلك شي مقابل الانت سويتة الي ولاخويا
- ما سويت شي ولا تحجون هيج بعد احنا صرنا اصدقاء واهل وخلص بعد
- ان شاء الله

خلصنا اكل وسويت جاي هو كال اني ما اشرب كتلة اسويلك كهوة كال علواه سويتلة
اتخبل على طعمها صدك تصرفاتة ولهفتة للاكل مال واحد محروم من هاللمة والاكل النظيف والمرتب
يمكن الله خلاه بطريقنا وخلانا بطريقة حتى واحد يكمل احتياج الثاني  ...