دولاب الزمن

26

#دولاب_الزمن26
Shahd Alsalman
بعد مرور كم يوم وطبعا اني متوقعت ابد الدكتور شايل كل هالمشاعر الي ويحبني هلكد بحيث من سمعت الاغنية احس بشي يريد ينفجر بصدري يمكن اني هم احبة بس لازم اتاكد من مشاعري خاصة بعد ما قررت انسى جمال وما افكر بي كلت اشوف نفسي وانطي مجال شوي اني مجنت اباوعلة للدكتور بنظرة حب او ارتباط جنت اشوفة امان الي سند الجأ الة بكل شي

- ادومي اريد اسالك سؤال
- اي حبيبي كولي
- اممم شنو رأيك بالدكتور ؟
- من كل النواحي ماكو منة ولا من اخلاقة
- يعني انت تحبة ؟
- طبعا كلش احبة واعتبرة اخوية الجبير
- اممم اوكي
- ليش هالاسئلة رباوي ؟
- هيج خطر ببالي
- لا مخطر احجيلي شصاير عيونج تكول غير هالحجي

وكعدت حجيتلة كل شي وهو كلش فرح وكالي لازم بدون ما افكر اقبل بي لانه ما الكى احسن منة
شجعني كلام ادم و ريحني

كمت رحت للمطبخ مجان عندي دوام سويت حلويات حتى نحلي بيها ورة الغدا
ودا افكر بالدكتور واني لحد هسة ما اصيحلة باسمة شلون راح ارتبط بي ما ادري ودا اضحك على افكاري

- الحلو شبي يضحك ويا نفسة
- يمة فززتني شوكت جيت
- صارلج ساعة تخوطين وصافنة وتضحكين
- ههههههه ممنتبهة شلونك
- مدامج تضحكين اني بنص الخير وانت
- الحمدلله
- شدسوين؟
- هيج حلويات كلت نتحلى بيها ورة الاكل
- يعني شلون انت وطبخج والله ما اقاومة بودي كل دقيقة اكل منة
- ههههه بالعافية هسة تضوك وتنطيني رايك
- بلا ضوك باصملج بالعشرة يجنن

فات وراح يبدل ويحجي ويا امة سمعتة يسلم عليها
كملت اني شغلي و دا اطلع من المطبخ و جانت ام الدكتور تحجي وياه مجان قصدي اتصنت بس من سمعت اسمي وكفت وسمعت

- اييي الله يبشرك بالخير يعني هسة طاب
- اي يمة الحمدلله بس بقى النطق بعدة
- يعني حتكوللها لربا على الموضوع
- اي طبعا مو كتلج اني جنت خايف عليها ومدامة طاب هسة لازم تعرف هي وادم

فتت وقاطعتهم بس كلبي يدك الف دكة عليمن جانو يحجون وشنو اللي لازم اعرف بي

- عن منو دتحجون وشنو لازم اعرف
- ربا !
- تعالي اكعدي ماما
- احجو عفية شصاير ؟؟
- اهدي لا تخافين
باعي قبل شهور اجاني مراجع مريض هو و مرتة وولد شاب وياهم
- منو قصدك ؟؟
- جان والدج ومرتة وجمال بعدين عرفت هو ابن مرتة
- شبي بابا !! احجي
- ضاربتة جلطة
- عززززة بعيني يا جلطة !
- اهدي هسة هو زين جان عندة شلل نصفي مؤقت والحمدلله بالعلاج استجاب ورجع مثل قبل بس بعدة فاقد النطق

كامت تبجي وامي حضنتها وتهدي بيها واني هم احجي وياها بس كلش تاثرت

- ربا انت قوية ودا اكلج والله طاب صدكيني اني متابع حالتة بنفسي
- تدري اني قبل فترة شكيت بالاسم لان سجلت الموعد باسمة من خابروني بس كلت لا شيجيبة واكيد مو هو وغلست ع الموضوع نسيتة
- هو مجنت انطيهم موعد الصبح حتى لا تشوفيهم و جمال همين ما يكدر عندة شغل الصبح
- وديني لبابا
- اي بس خاف لا ينتكس ويتأذى مصارلة اسبوعين من تعالج تمام فترة تمر واوديج والله وعيونج بس لا تنقهرين
- يمة طولي بالج انت ما عندج ثقة بباسل من يكلج حجاية بعد ارتاحي انت
- شلون ارتاح خالة ابوية هذا ومجان يشكي من شي شلون انجلط كلبي جان نار علي وهسة عرفت ليش
- ميخالف حبيبتي اهدي لا يسمعج ادم خطية ويفز على ابو بس فترة مثل ما كالج باسل وياخذج لهناك يمة علمودة هو اتحملي شوي بعد
- ماشي

راحت لغرفتها وظلت تبجي  كلش انقهرنا متوقعت حتسمعنا جنت منصي صوتي بس هي اول وتالي حتعرف بعد و قررت فترة واوديها ليمة ...

عمي رجع مثل قبل والفضل لله وللدكتور بهذا الموضوع بس هو مكسور وحقة شكد حاولنا وياه حتى يحجي ما حجة
كلت اروح واودي شي للدكتور حتى  اشكرة على علاج عمي
اخذتلة شي مرتب و استغليت عندي اجازة رحتلة الصبح
فتت ومجان اكو ناس بس سكرتيرة ومدنجة دتكتب كلبي راد يوكف من الصدمة هذي ربا

ظليت واكف يمها وهي تسجل كالتلي تفضل مجاوبتها باوعتلي وتفاجئت هي همين ووكفت على حيلها
- ربا
- جمال !!

بقينا ساكتين اني وهي اجة الدكتور وشافنا صافنين
هو هم صفن ويانة سد باب العيادة وكعد وكعدني اني وربا

- شجابج هنا ؟
- دا اشتغل هنا
- دكتور انت تعرفها ؟
- جمال اني اعرف كل شي وادري انت منو واعرف عمك ووالدتك
- كل هالفترة وانت تدري وساكت ؟
يعني انت وهي تدرون بالوضع شنو !
- ربا متعرف عن شي البارحة يالا كتلها
- ليش سويتي هيج ابوج من قهرة انجلط وانشل وتالي عفتي وجاية هنا تشتغلين جنت معززة مكرمة
- شنو قصدك ليش هي شمشتغلة هنا
هي معززة ومكرمة وما ناقصها شي
- دكتور انت متعرف شي و لا تتدخل رجاءا
- الدكتور كل شي يعرف وانت مالك حق تحجي ولا كلمة رحت وخليت كل شي ورة ظهرك وهسة جاي تحاسب وتعاقب ابوية انجلط بسبب امك وافعالها مو بسببي
- والج عين تحجين بعد كل شي صدك انت صلفة
- احترم نفسك لك
- اني محترم نفسي بس هي وحدة زبالة وما تستاهل الاحترام

من سمعتة هيج يحجي عنها متحملت كمت وضربتة وصارت بينا عركة وهي تحاول تبعدنا واحد عن اللاخ كام يحجي حجي اكبر من راسة ويسب بيهة واظل اضربة ويضربني صارت بيناتنا وبقت تفاكك بينا وترجف

- انت وحدة ساقطة وركضتي ورة الرياجيل وعفتي اهلج
- لك تافه تاج راسك ربا تروحون فدوة لقندرتها
- شمنطيتة وهيج يدافعلج هو ومستقتل لازم صاحبج عافج
- شدتحجي انت مخبل
- والله الا اموتك يا كلب

الغيرة صعدت عندي حيل وهي بيناتنا هجمت علي ودفعتها عن طريقي وكعت بالكاع و نزلت بجمال ضرب ومسبة
رجعت فاككتنا واجتها ضربة بالغلط على خاصرتها صاحت من الالم ووكعت و ظلت تون عفت جمال و بقيت وياها وهو همين عاف الضرب ويباوعلها بين اللي كارهها وبين اللي يريد يشوف شصارلها شلتها و فحصتها شوي وخف الوجع

جمال عاف العيادة وطلع وهي ظلت تبجي ولازمة ايدي ترجف هدت ورة دقايق ونامت نطيتها مسكن رحت رتبت العيادة ورجعت الغراض بمكانهم وعيني عليها وافكر بكلامة الظاهر اكو شي غلط مفتهمة هو
بس اني من غيرتي عليها ما حاولت اسمع منة او افهمة واستعملت القوة والضرب ..

من شفتها اتهسترت بس ردت اطلع حركة كلبي بيها وسبيتها وهنتها في سبيل يبرد كلبي وتطفى نارة الدكتور الظاهر يعرفها ومن زمان ويحجي وياية ببرود بالاول بعدها هاجت اعصابة وظلينا نتضارب لحد ما وكعت ربا من الضربة الصارت بيها كلبي فز عليها بس اخذتني الكرامة وطلعت عفتهم
هي مدافعت عن نفسها ولا حجت شي وما معقول مجانت تعرف بوضع ابوها ..