دولاب الزمن

18

#دولاب_الزمن18
Shahd Alsalman
مر كم يوم على سكنهم وياية ما شفت اطيب منها ولا من اخوها والبيت انملى سعادة و فرح بفضلهم وبسبب روحهم الحلوة

اهلهم او ابوهم بالاحرى ما سأل عليهم بعد بس حتى لا ينقهرون كتلهم سائلين عليكم وبالمستشفى كالو انتو طلعتو على مسؤوليتكم

كتلهم شنو رايكم نطلع ووافقو بس ربا كالت ما اطلع اخذ ادم وياك
اعرف بيها مستحية لان ما عدها هدوم كتلها هدوم اختي فوك ومثل قياسج روحي البسي منها وانت تعال وياية حتى تلبس من اخويا

اخذتهم للسوك افترينا واشترينا هدوم بس بعد ما ملخت نفسي من التواسيل لان ربا مدتقبل الا وعدتها اخذ الفلوس بعدين يالا رضت وهم ما اشترت شي مهم كلش جان مجرد لبسة للطلعة ولبسة للبيت وخلص اخوها كذلك

تعشينا برة و رجعنا للبيت حسيت تغيرت نفسيتهم بس ربا يمكن بسبب حبسها لسنتين بالمخزن مدري 3 سنوات كانو جاية من بلد غريب صارلها هواية مشايفة ناس ولا اسواق ولا اي شي حتى متعرف تمشي
مجلبة بادم وسمعتها تكلة ولك ادومي الزمني لا اوكع والله مدا اعرف امشي و هو يكللها شنو انت من الفضاء جاية ويتكركرون بينهم مثل الاطفال شكد حلوين ومحبوبين واني على ضحكهم اضحك بدون ما اكطع حديثهم او اشاركهم مخليهم على راحتهم

من فتنا للبيت دا افتح الباب وهم وراية واكفين كتلهم فوتو يلة ربا صافنة علية فجأة وكعت من طولها لا حس ولا نفس بس بدون رجفة هالمرة

اخذتها بوجهي اني وادم للمستشفى و هي فاقدة
سوينا اللازم و مثل متوقعت دماغها متأثر وهالحالة علاجها شوي يطول بس الحمدلله انه كشفنا هالشي بالبداية

لثاني يوم وهي نايمة وادم يمها من كل عقلة يبجي وخايف عليها طمنتة عنها وخليتلة فراش حتى ينام يمها وميظل بالة عليها واني بقيت سهران خاف تصحى بس الحمدلله الوضع مستقر هسة
خرجتها من المستشفى رجعنا للبيت سوتلنا هي غدا

العصر كعدنا بالحديقة طول الوكت من رجعنا لحد هسة هي ساكتة وادري دتفكر بشي ادم راح يم الزرع ديشوف شنو مزروع
- دكتور
- نعم ربا
- اكدر اطلب طلب
- اي طبعا طلباتج اوامر
- اشكرك بس اريد ادم يكمل دراستة يعني انقلة مدرسة قريبة منا
-اي سهلة هاي بس لازم مستمسكات حتى اكدر انقلة
- اعرف هي هنا المشكلة انه ما عدنا اي شي تدري انت الوضع
- خليها علية اني احلها
وانت ؟
- شنو اني ؟
- مناوية تكملين
- لا ما اريد هسة المهم اخويا يكمل اني اكدر بعدين
- لعد شحسوين
- اريد اشتغل
- وين وشنو الشغل
- ما اعرف حي الله شغل المهم اكو فلوس نهاية الشهر
- زين شنو رأيج تشتغلين وياية
- شلون يعني
- اني محتاج سكرتيرة تنظم مواعيد المراجعات والمرضى
- يعني انت ما عندك
- عندي بس اقسم الشغل شيفتات حتى انت ترتاحين وهو يرتاح
- اوكي
- وراتبج حيكون زين يكفيج انت وادم وتروحين وياية وترجعين وياية وبيوم اللي ما اكدر اوديج او ارجعج انت اتصرفي لان قريبة العيادة مرات اتمشالها
- الله يرزقك ويسهل امورك ما اعرف شلون اشكرك والله
- لا تزعليني منج ليش هيج دائما تحجين
- لان فضلك ما ينسي و محد بالدنيا يوكف لاحد مثل ما انت دتسوي
- لا فضل ولا شي وجودكم ريحني وغير حياتي
ابتسمتلة وهو ابتسملي

شكد الحياة غريبة تقرب البعاد وتبعد القراب
الدكتور ما قصر بشي ولا راد مقابل مني او من ادم مكتفي بجو العائلة اللي انحرم منة وكدما يكدر يساعدنا

ارتاحيت من طلعت من بيت بابا حياتنا اتغيرت للاحسن ادومي رجع يداوم و الدكتور رتبلة كل شي عندة معارف وواصلين
واني بلشت اداوم وياه الصبح دوامي ارتب المواعيد وادخل المراجعين ومرات اروح قبلة انظف العيادة وارتبها واحط بيها ورد من الحديقة مال بيت اكطعهم واحد شوية يغير نفسية

وهو كلش مرتاح وياية بالشغل حتى اللي يجي بعدي يكمل دوام كلش اندمج ويا الشغل وصار بيناتنا تنسيق للجدول الخاص بالمراجعات يعني اكدر اكول وكفت على رجليا

خلال هالفترة ما اعرف بابا دور علينا لا نسانة يسال احد ما اعرف اي شي عنهم
وبرغم كل الصار اني احن الة واشتاقلة هو ابويا وما اكدر اعتبرة مموجود صحيح ظلمنا وقسى علينا هواية بس ابقى احبة وما فد يوم كرهت ادم بي بالعكس

ادم يضوج احجي بسيرتة او يحس انه ما قدملة شي ووجودي بحياتة يعنيلة كل شي اني اب وام واخت واخ ما يحتاج لاحد غيري هيج جان يكول وكلش انقهر لان ما اريد كلبة يتعلم ع القسوة والحقد مع انه كلامة صحيح بس يظل ابونا

خطر ببالي جمال معقولة يكون رجع لو هسة بعدة هناك اصلا هذا جرحة صار مثل فطر الحايط بكلبي تركني وراح يكمل دراستة وفرحان بالسفر

ولا يوم اتذكر يحجي وياية او يسال علية او يرجع لهنا مثل ما وعدني بايام العطلة
4 سنوات شلون صبر على فراكي ما اعرف يمكن جان حبة الي حب طفولي او مراهقة

بس على فرض انه اكو حب بعد الي او اني احبة مراح نكدر نكمل بسبب امة و مستحيل ارتبط بي لان دمرتني ودمرت اخويا الحمدلله اللي تلاحكت لمستقبل ادم قبل لا يفوت الاوان ويصير مثلي

قررت بيني وبين نفسي امحي الماضي وانسى كل شي يخص جمال واهلة وابويا وانتظر الدنيا تدور وتاخذلي حقي لان انتقام رب العالمين ارقى و احسن من انتقامي منهم
حمدت الله وشكرتة مظلومين مو ظالمين ..
ترخصت من الدكتور ورحت نمت بس بقيت اتكلب بالفراش مجاني نوم رحت غطيت ادم وبوستة شوي لعبت بشعرة وحضرت جنطتة لان مثل العادة ينسى يحضر جدولة طفيت الضوة وطلعت .

شفتها سرحانة من جنا كاعدين ع التلفزيون ونتفرج
طفيت التلفزيون ومجانت منتبهة ما اعرف بشنو تفكر
ادم راح للفراش وهي ترخصت مني وراحت تنام اني كمت لغرفتي اقرة شوية واسوي بحث عن امراض معينة

حسيت بحركة بالبيت كمت اشوف خاف ناسي الباب مفتوح وطابلنا احد
مشيت على كيفي شفتها ربا دتطلع من غرفة ادم
و راحت للهول بدون متفتح ضوة تقربت ليم الباب اريد اشوف شدسوي
سمعتها تبجي و الضوة جان خافت فشفتها كاعدة ع الكرسي وتحاول تكتم صوتها ..