دولاب الزمن

9

#دولاب_الزمن9
Shahd Alsalman
وصلت يم خوالي بعد رحلة طويلة وتعب كل شي هنا يختلف الحياة الناس الجو اسلوب عيشتهم
هالاشياء اكتشفها كل يوم من خلال احتكاكي بيهم تعلمت اللغة اني اساسا زين بس ممجرب محادثة واحجي ويا احد وطبيعتي بسرعة اتعلم واحفظ ما عندي اي مشكلة

خوالي كلش داروني ويحبوني همين عدهم اولاد وبنات من عمري واصغر واكو اكبر ومتزوجين
بلشت اداوم هناك وكل ميصير مجال اتصل على اهلي لان التوقيت يختلف عن توقيت العراق وهمين ما اكدر اضيع وقت لان الدراسة صعبة جانت ولازم اركز واقرة كل الوقت حتى اسيطر وما يفوتني شي واريد اكون متفوق مثلما جنت بالعراق

صورة ربا متفاركني حيصير كم شهر مشايفها وسمعت صوتها مرتين او 3 ممرتاحة اعرفها من نبرتها واني هم ممرتاح ومشتاقلها كلش

اكثر كلامي ويا امي وعمو حتى خواتي وادم مو هلكد احجي وياهم كلهم مدارس وبالوكت اللي هم يداومون بي اني عندي فراغ ومن اداوم هم يصير عدهم فراغ نتفاوت يعني

مرات بالعطلة الاسبوعية اكعد اراجع كل المواد واقرة او اطلع افتر ويا ولد خوالي وبنات خوالي استغرب من عيشتهم ولبسهم اذا ولد واذا بنات الاجانب ميهتمون لشي كلمن عايش لروحة ونفسة محد علي بأحد حتى اكو بنات يعرضون نفسهم اني جنت اخجل من هاي الشغلات وولد خالي يكلولي هالشي عادي وتكدر تتجاهلهم لان غايتهم فلوس ويشوفوك مو من بلدهم فيستغلوك

علموني هواية شغلات وتقريبا على نهاية السنة الدراسية اني صرت اعرف كل شي
فرحان لان خلصت هالسنة حتى ارجع لاهلي
صارت امتحانات وخلصتها متلهف ارجع لان النتيحة الكترونية واني ضامن نجاحي فكلت ارجع بمجرد ما اخلص

خالي كال لا ترجع وامي كالت لا ترجع لان ماكو داعي ومصاريف وهسة ما عندي ادزلك اني هم شريد اسوي خاب املي وجنت اريد بس ارجع علمود ربا الشوك ذبحني ومشتاق لكل شي بيتنا وخواتي وامي كل شي حتى الشوارع

اضطريت اصبر نفسي بالتلفونات وياهم بس ما حجيت ويا ربا امي كالت ابوها ميقبل واستحي اكلة جمال يريد يحجي ويا ربا و همين سكتت ما اريد احرج امي سالت على نتائجهم كالت كلهم نجحو والحمدلله درجاتهم عالية

اجتي السنة الثانية وبلشت اداوم وهالسنة اصعب لان تحضيري للاختصاص وبالاجمال هي الهندسة بيها تركيز و صعوبة و تطبيق حتى واحد فعلا يكون مهندس ويستحق الشهادة بعد كل التعب

حاولت خلال هالسنة اجمع كل مصروفي اللي ما احتاجة اضمة علمود اكدر ارجع للعراق بي وما احرج امي بالتكلفة نجحت للسنة الثانية وامي فرحت كلش وتكلي انت رفعة راسي صدك عندي تسوة الدنيا واتحضرت حتى ارجع للعراق

- ماما حبيبتي اني اسبوع اليجي احجز واجيكم
- ها مشتاقلها ههههه
- مو بس الها حتى انتو هي وينها ليش متحجي وياية
- مو اجت خالتها اخذتها وياهة لاربيل تكضي العطلة يمها
- هي عدها خالة ؟
- اي حبيبي طبعا عدها بس قبل فترة اجت وكالت راح اخذها
- يعني ادم وياها
- لا
- شعجب ربا ما تترك ادم هيج ولا تروح مكان الا وهي وياه
- بعد هيج صار عوفها هسة انت كل متخابر نظل نحجي عليها
- هههه ها يوم تغارين
- لا عشتو على شنو اغار
- هههههه فدوة رحتلج يمة
- اسم الله عليك بعد كلبي بس اني ما اريد تظل تشغل نفسك بيها اهم شي دراستك محد يفيدك غيرها
- لا تشيلين هم اني زين بالدراسة وهاي سنتين اطلع ناجح وبتقديرات عالية وان شاء الله السنتين التجي هم هيج
- ان شاء الله يا رفعة راسي وتكمل دراستك
و افرح بيك و بزواجك
- ان شاء الله حبيبتي يلة اروح اني سلميلي ع الكل وبوسيلي خواتي
- الله وياك حبيبي سلم على خوالك والباقين
- ان شاء الله مع السلامة
- مع السلامة

بعد اذا اني ارجع وهي ماكو عليمن راجع غلست وهم كعدت هالسنة بس اني ممرتاح يمكن لان مشتاقلها هيج
افكر هم هي تشتاقلي لو نستني بعد هالغيبة
مستغرب على سفرتها وانه تكضي العطلة يم بيت خالتها وتاركة ادم مرة كالتلي اني حتى لو اتزوج واروح لبيت زوجي اخذ ادم وياية كدما متعلقة بي وتحبة ومتكدر بدونة

بقيت افكر بيها وباول واخر حضنة النا ونعست ونمت
بعد مدة سنتين من الدراسة اجتني فرصة شغل بس رفضت لان اريد ارجع ممصدك شوكت اخلص واشوف اهلي و ربا

علاقاتي بالكلية ويا الكل حلوة وكلهم يحترموني وعندي هواية اصدقاء بطبعي اجتماعي و لاني غريب ولوحدي فأحب يكونون عندي ناس هواية حتى ما احس بالفراغ والوحدة وعموما هم يحبون يتعاونون ويحبون الصداقات يقدسوها وفرصة الشغل اجتني من صديق اهلة عدهم شركة انشاءات وفتحو فرع ثاني الها وديلمون مهندسين وخريجين حتى لا يبقون عاطل عن العمل

سنتين التهيت بدراستي كلش واهلي كمت احجي وياهم بين فترة وفترة و بما انه مدا اكدر احجي ويا ربا كمت اضوج اتصل لان كلت خاف ابوها عبالة علمودها دا اكثر اتصالات ويضوجها بحجاية او يزعلها فخففت اتصالاتي بس على كد اتطمن عليهم وخلص

اتخرجت و كملت دراستي والحمدلله التقدير جان يرفع الراس خلصت اجراءاتي وحجزت حتى ارجع بعد كلبي صار جمر من الانتظار والاشتياق وكل لحظة تمر اتخيل شغلة شكل مرة احضن ربا مرة هي تركض علية مرة ابوسها مرة اتخيل شلون حنخطب ونعيش سوة يعني كلش جنت فرحان ومرتاح هم نجحت وهم خلصت دراسة وهم سويت الشرط اللي ابوها شرطة على امي حسب وصية امها ..