دولاب الزمن

12

#دولاب_الزمن12
Shahd Alsalman
استغربت من جية نورهان وقرارها انه تطلعني من الغرفة وتخليني امشي براحتي بالبيت بس بحضورها هي ومن بابا يكون مموجود اعرف وراها شي مو خالية بس شسوي طلعت لان متت بالمخزن من كد الضيم كمت اعزل بي كل يوم واشخبط ع الحيطان اكو اقلام هيج قديمة جاف ورصاص شيجي ببالي اشخبط واغلبها جانت كئيبة مرات اكتب شغلات محد يفهمها غيري شسوي يا ربي تعبت

ومن اجت وكلتلي على الطلعة كلت شسوي خل تسوي رحت جبت الي هدوم من الغرفة وسبحت بحمام البيت وكلش ارتاحيت ما طول هالموضوع طبعا

شفت ادم جاي من المدرسة حضنتة وبلهفة وبجيت واشم بريحتة واكلة مشتاقتلك يا ريحة امي وهو يدمع ويحضني ويكلي والله محتاجلج خليني احجي ويا بابا حتى يبقيج يمي هو جان هواية يطلب مني واني ما اخلي واكلة ازعل منك لان اخاف لا يكتلة او ياذي

دقايق و اجة بابا ما لحكت اختل او اروح لمكان رحت بالحمام بسرعة كلت من يصعد ارجع للمخزن بس جان عصبي ويصيح على ادم
- لك انتو ناوين تموتوني انت واختك شنو من خلفة عار
- شبيك يابة شسويت اني
- ابن الكلب كل يوم طالعيلي بسالفة تخزي وما ينلبس عليها عكال

بهاي الاثناء اسمع نورهان تبجي واسمع رزايل ابوية لادم كلت بالاول خلي افتهم منهم شصاير يالا اطلع

- يعني شمسويتلك اني مو صاينتكم ومربيتكم انت واختك ليش تطلعوني هيج مو خوش ادمية كدام ابوكم بلة ذيج افتهمنا تكرهني وتغار من بناتي نوب انت هيج تسوي
- شمسوي غير افتهم
-لا تعلي صوتك حقير الله ياخذكم ويخلصني منكم حاطلي اقراص مال افلام اباحية بغرفتك وطلعت تتوسل بخالتك حتى تجيبلك حاسبة واني اكللها لا وهي تصر علية علمود لا تنقهر انت ثاريك تجيب اقراص وتتفرج
- اني مطلبت منها حاسبة و لا ردتها لان ما محتاجها وحتى الافلام التحجي عنها الولد جماعتي كلها تتفرج بالمدرسة ويكلولي تعال اتفرج وما اقبل خو اتفرج وياهم واسكت
- هاي انتو هيج نفس الطينة انت واختك هالجذب منين دتتعلمو مدا افتهم لك مو وياكم عبير ونرجس ولا جمال مثل الورد واحدهم شبيكم الله لا يوفقكم وياخذكم واخلص منكم
- الله يسامحك انت واختك
-خالة كافي مو حرام عليج والله
- ابن الكلب امشي ولي لا تشوفني وجهك

سمعت ادم يصعد الدرج وادري محروك كلبة حسبي الله بيج يا نورهان يا رب انت المنتقم الجبار
تنتقم منها وتجبر بخاطرنا تاكدت هم راحو لغرفتهم ورجعت للمخزن لليل اني باقية كاعدة كل يوم اسهر
ما عندي شي اسوي غير بس افكر شوكت اخلص من هالبيت واخذ ادم واروح اني وياه نعيش مرتاحين
بعيد عن الكل وخلي نورهان تشبع بي لابويا وللبيت لحد ما تمل

اعد الايام حتى يجي جمال ويشوف حالنا اني بهاي الفترة ضعفت حيل صرت مثل ذولة مرضى السرطان اضعف من القهر والبجي حالي هذا يدري بي هو لو امة اكيد ما توصلة كل الديصير

ليش ما اجة لحد اليوم ولا بعطلة من العطل ولا بمناسبة ولا براس سنة ماكو هو ابد
شكد فاتت السنين بسرعة بس اني اليوم يعدي علية بسنة ما يخلص الوكت ولا اني اخلص من هالسجن ..