دولاب الزمن

27

#دولاب_الزمن27
Shahd Alsalman
رجعت للبيت الدنيا طالعة من عيني وامي بس تسأل وتريد تعرف شبية وليش مشكك قميصي عفتها وقفلت الباب علية وبقيت بالغرفة لليل
ما حجيت ولا كلمة ظليت افكر بيها جنت احلم ارجعلها واحضنها والكاها منتظرتني وهسة اشوفها هيج بالصدفة واثنينا مصدومين والوضع ما اتمناه لعدوي ليش هيج صار بينا

رجعنا للبيت بعد ما كعدت ربا من النوم كل الوكت وهي ساكتة وهادية ومنطقت ولا كلمة ومبينة ملامح الحزن بعيونها ووجهها حاولت احجي وياها بس مردت علية ومن فتنا البيت هي فاتت للغرفة وقفلت على نفسها وكعدت حجيت لامي ونسرين وادم على الصار ويانة كلنا جنا ضايجين ومقهورين ومندري شنو حيصير بعد هسة

شفتة واخيرا ويا ريتني مشفتة متخيلت هيج حنتلاكى و بهاي الطريقة بعد كل هالسنين والانتظار بالاخير اللي صار حصلت اهانات واتهامات مالهة مبرر بس الشي المتاكدة منة انه نورهان مفهمتة شغلات مو صحيحة وواضح من كلامة
الشي الغريب انه ما حسيت بمشاعر تجاهة حتى الاشتياق مجان بنفس لهفة اول مسافر يمكن لان حسيت بخذلان منة ومن بعد ما طول غيبتة علية جان فضول عندي اعرف هو بشنو يفكر تجاهي بس مو اشتياق

عشت اسبوع بحالة انعزال و تقريبا تركت الكل حتى ادم يحجون وياية ويحاولون ينسوني بس اني مو وياهم بغير دنيا ودا افكر بهواية شغلات وابويا والي حيصير من بعد كل هذا ووين راح نوصل

رحت بالليل بالحديقة اريد اشم هوا ودا افكر اجة الدكتور وكعد يمي

- ربا ليش طالعة بيج شي
- لا
- لشوكت تبقين ساكتة
-  ...
- اعرف شدتفكرين بس هذا مو حل سكوتج مراح يقدم و لا ياخر احجي وياية والله مشتاق لضحكتج وصوتج وكلامج
- ليوين حنوصل بعد
- باعي لا تبجين واكعدي حتى نحجي
- اني لازم اشوف بابا ولازم جمال يعرف الحقيقة متاكدة نورهان كايلة شي غلط الة او مرتبة شي من خططها
- وليش مهتمة لصورتج كدام جمال
- يعني لان ما اعرف بس لازم يعرف الصدك
- برأيي هو مو مهم وماكو داعي تفكرين بي بالاخير هو ابن مرت ابوج يعني لا اخوج ولا يعنيلج شي

من كلتلي هيج عن جمال حسيت بغيرة و ردها جان مرتبك وتمتمت بالجواب حسيت اكو شي بينهم او هو يهمها لدرجة هي مكتئبة حتى بس تبينلة اللي صار طردت كل هالافكار من بالي وهي عافتني وراحت نامت واني طبيت نمت شسوي وياها ما اعرف

فات اسبوعين وتقريبا بدت ترجع طبيعية تحاول كد ما تكدر متبين شي بس اني حاسهة متغيرة
رحت اشوفها بغرفة ادم وجانو يحجون هي وياه
على الموضوع وادم ميقبل تروح لابوها وهي تحاول تقنعة واخر شي كاللها بس تروحين انسيني وما احجي وياج بعد طلعت من غرفتة تبجي باوعتلي وراحت لغرفتها وشفتة هو ضايج وداير وجهة
رحت يمة دا احجي وياه لان اول مرة هو يحجي وياها بهاي الطريقة

- ادم افوت ؟
- هلا بيك
- ليش قهرتها
- دكتور تريد تروح لابويا
- اي سمعت حجيكم كلة وانت اول مرة اشوفك هيج عصبي وتزعلها
- اني مو مثلها هي من طلعنا لليوم تريد اسامح وانسى وكانو ما انظلمنا بسببة هو مو كافي حرمني منها سنتين هو يدري احنا شعشنا من ورة هالزواج؟  يعرف شي عنا؟ من طلعنا لليوم حاول يلاكينا ؟
- بس ابوك جان مريض وانت تعرف هالشي وتدري ربا شلون تفكر
- تفكر انه ما النا احد غيرة حتى لو قسى علينا
بس مثل مكتلك اني مو مثلها وصدكني اذا راحتلة اني بعد ما احجي وياها طول عمري
- ماشي اهدى وكافي عصبية وروح راضيها خطية
- بعدين اروحلها
- على راحتك

عفتة وطلعت رحت اشوفها لكيت نسرين يمها ودتبجي بحضنها رحت لامي وسولفت وياها شوية وحجينا

تمر الايام ببطئ وضوجة كلبي نار وادم مديقبل لا اروح وحدي ولا يجي وياية وحلفني و حلفلي انه اذا رحت وشفتة يزعل مني واني اعرفة مراح يرضى لو زعل مني  غيرة يمكن بعد ما تمر فترة اكدر اقنعة والله يساعدني علي ...

فد يوم خالة صاحت علية رادت اجيبلها البطاقة التموينية من المجر تريد تروح لوكيل الحصة
طلعتها وكعت من ايدي من شلتها قريت الاسامي وتفاجئت بشغلة بقيت صافنة الدكتور اخو البقية من امهم  !
يعني هو مو ابن زوجها بس شعجب ما كالي عن هالموضوع ولا جاب سيرة كلت من يرجع افتهم منة او اسأل نسرين عن الموضوع احسن لان خاف احرجة وديت البطاقة ورجعت للمطبخ اشوف الطبخة اجتي نسرين وكلت خوش فرصة مدام ماكو احد
- نسرين حبي
- ها عيني
- امممم باعي اني اليوم شفت شغلة
- خير حبي
- مو خالة دزتني على بطاقة التموينية
- اي
- من دا اوديها قريت اسامي العائلة بيها
- اي
- وشفت اسم الدكتور يختلف عنهم
- صحيح
- شنو يعني هو اخوهم بس من امهم؟
- اي حبيبي بس عمو هو اللي مربي
- مجابلي سيرة بهذا الموضوع
- مشاف ابو ولا يعرفة بعدين هاي قصة طويلة ومن تزوجت خالة عمو جان كلش حنين وياهم و رباه مثل ولدة وبناتة ما فرق بيناتهم لهذا هو ما يحجي بالسالفة ويحبهم كلهم ويحب عمو كلش
- مجنت متوقعة هالشي ابد زين ابو متوفي لو عايش ؟
- والله ما اعرف ابو محد يدري شي عنة بس اللي عرفناه من خالة انه اهلة متبرين منة
- ليش ؟
- ابو لباسل يصير ابن عم امه يعني كرايب اتزوجها وهي صغيرة وطبعا حسب كلام خالة انه جان يحبها بس لعبت وحدة بعقلة واخذتة منها و راد يتزوجها من درت خالة خيرتة بينها وبين هالمرية و بعد مشاكل وعناد و هوسة اختار ذيج المرية وطلكها بكل برود
- يااااا صدك جذب لعد مو يحبها ؟
- والله ما ادري يعني شوف هي شلاعبة بدماغة الرجال يتقشمر بسهولة والنسوان كيدهن عظيم
- اي والله بس مو الكل
- اكيد مو الكل بس الاغلبية
- زين وبعدين ؟
- ماكو خالة التهت بتربية باسل جان صغير ومحتاج رعاية ومتقبل تاخذ منة فلوس او نفقة تكول الله يغنيني عنة وراحت اشتغلت
- خطية
- لا بالعكس شوفي خالة قوية واهم شي كرامتها و عزة نفسها ولوما هيج تفكر متوكف على رجلها
- زين و ليش اهلة تبرو منة اقصد ابو الدكتور
- لان ما سمع كلامهم وطلكها وفشل ابو بين الناس فتبرو منة وبعد ما شافو من يوم الطلع محد يدري عنة شي ومجانو رايدين اللي تزوجها حرمو من كل شي
- يستاهل وخالة شلون تزوجت ؟
- من اشتغلت بشركة شافها عمو هناك وقفل عليها الا جابها للطريق يالا خلاها تقبل مجانت ترضى تتزوج علمود باسل بس هو وعدها يربي وحتى تامن ومتخاف كتبلها هالبيت بأسمها وكاللها بعد عمر طويل هالبيت يكون لباسل وتتصرفين بي براحتج
وهو حالتة كلش زينة اهلة بالاول متقبلو فكرة يتزوج من مطلقة وعدها طفل بس من عرفوها وشافوها صغيرة صارولها اهل والله عوضها خير
- سبحان الله شون رب العالمين ما يترك احد ويعينة
- و نعم بالله حتى اني عمو وهي ربوني الله يخليهم الي مثل اهلي واكثر ما قصرو بشي ويانة
- الله يخليهم يا رب صدك خالة حنينة وقوية الله يحفظها يا رب
- امين
- يلة خلصت الغدا اسوي كهوة نشرب
- اي يلة علواه

فكرت شكد غريبة هاي الدنيا وشون هيج الايام تلعب لعب بالناس بس بالاخير كلمن ياخذ حقة وجزاءة بس لهسة معرفت ابو عايش او ميت يعني اذا عايش مو جان لازم يسال عنة معقولة مشتاقلة او ما كال وين ابني شديسوي ميسوي وين وصل عجيب والله ..