دولاب الزمن

6

#دولاب_الزمن6
Shahd Alsalman
مرت علينا الايام واني وجمال كلش تقربنا من بعض بس نورهان حست علينا احنا بالعموم منسوي شي و حبنا بريء وصافي ماكو شي غلط بي او حرام منعرف بس نضحك واحد ويا اللاخ ونتساعد بالدروس اذا ساعدني بدرس احس بالحب واذا اني جبتلة لفة مثلا يعني خلص هو طول الوقت فرحان وسعيد
جانت من تزعلني امة هو يراضيني ويصبرني عليها اكثر من مرة خلصني من ايدها كل ما اكبر اكثر تقسى بالضرب اكثر
اني جان اهم شي عندي ما تتقرب لادم فشتسوي بية مو مهم

نرجع لامة اللي حست علينا اني وجمال و شكت بقربنا من بعض
كامت تتخبل اذا شافتنا كاعدين سوة او هو يدرسني شي او اني اسمعلة مادة معينة
حتى خلت بابا هو اللي يبعدة عني هو الوحيد من بعد ادم احبة وارتاح وياه وهي متريد هالشي لان تغار و سبب كرهها الي ما اعرفة

سمعت بابا يحجي ويا جمال

- بابا جمال انت تعرف مثل ابني  احسبك وهسة انت كبرت وحتدخل كلية مباقي بس هالسنة
- اي صحيح واني هم احبك مثل ابوية
- كلش زين معناها اريدك تفهم هالحجي كلش زين وتحفظة
- اي عمو كول
- دتشوف شلون ربا كبرت وصارت شابة والعيون عليها وكلها سنتين وتدخل كلية ما اريد تكثر وياها كعدات هي بعدها طفلة ومتفهم اكيد ماخذتك الها اخ بس العالم يحجون و ميرحمون وهاي سمعتها تقبل احد يحجي بخواتك او بيها ؟
- لا اكص لسان اليحجي عنها منو يكدر يجيب سيرتهم
- مدام عدهم هيج رجال محد يكدر يندك بيهم فاللي اريدة منك لا تتقرب منها بعد صحيح هي بحكم اختك بس هي ما تقربلك شي ماشي ابني ؟
- اي عمو لا تشيل هم

من سمعت هالحجي دار بينهم حسيتة باعني و ما يحبني او يجذب علية جان لازم يكلة اني احبها او اني ممسوي شي حتى الناس تحجي بس اعرف امة محشية براس ابوية

كمت اتجنبة واتحاشى اتقرب منة وهو مو مثل قبل صاير دائما احسة مقهور او حزين
اني كلش اشتاقلة وافكر بي واخاف من بعدة عني لان متعلقة بي كلش اريد احجيلة كل شي مثل قبل واريد اشكي واسولف عن اللي يصير وياية

مرت هيج ايامنة كلها بعد واحتياج وتفكير بس كل واحد بينا اخذ دروسة حجة حتى يلتهي عن الالم اللي يحسة

خلصنا السنة ونجحنا وهو جاب معدل زين قررت امة انه يسافر يم خوالة بامريكا حتى يكمل دراسة هي مو علمود الشهادة ولا علمود ترفع راسها بي مثل متكول بس حتى تحرك كلبي بغيابة بعد فوك ما بعدتة عني وهو هنا

سوتلة اوراقة وطبعا هي مرتبتها من قبل ومجهزة كل شي حتى يسافر بسرعة
الغريب بالموضوع هو جان رافض فكرة السفر بس من صارت صدك وحجة ويا امة كلش فرح وكيف اصلا جان عبالك متمني السفر برغم الرفض بالاول و رجعت نظراتة الي مثل قبل وكانو السعادة لكت طريقها الة

اجة يوم السفر و بلش يودعنا وطبعا قبلها طلب مني اني اللي اسويلة الجنطة واساعدة وويا كل شي احطة الة تنزل دموعي وابجي لان اذا هو راح معناها ما بقى شي حلو الي غير ادم

- ربا ليش تبجين
- تسالني ليش جمال معقولة
- طبعا المفروض تفرحين كلها كم سنة وارجع اكمل دراستي وانت هم تكملين دراستج المفروض تشجعيني
- على شنو اشجعك شنو يعني ماكو دراسة هنا رايح هناك ومخليني وحدي وغيابك تعرف شيسوي بية
مو كافي ماما راحت مني وبابا ميحس بية
- ربا صدكيني اول ما تصير عطلة هناك راح انزل للعراق اني ما ارجع مناك اذا ما اجيبلج الشهادة واخليج تفتخرين بية
- ليش جمال اني ردت شهادة من برة
- رورو لا تنقهرين صدكيني الايام تركض وكل شي بسرعة يمشي لا اخافين حبقى دائما وياج والله واتصل بيج مناك
- انت فرحان لان حتروح
- اني مقهور لان حترككم بس فرحان لان حيتحقق حلمي
- الله يوفقك

متحملت اسمعة اكثر عفتة ورحت للغرفة ابجي وكتمت صوتي بمخدة ما اريد احد يحس علية وبعد ما اريدة يشوفني هيج مشلوع كلبي وهو مو هامة وفرحان بهذا الحلم خلي يروح احسن احس روحي وكلبي زعلانين منة بس مع هذا اتمنالة الخير و ادعيلة يتوفق بدراستة وينجح لان يستاهل ..