دولاب الزمن

19

#دولاب_الزمن19
Shahd Alsalman
رحت كعدت يمها كتلها لا تحطين ايدج على حلكج ابجي بصوت مسموع
انفجرت بالبجي وسديت الباب حتى لا يسمع ادم ويفز
بعد دقايق سكتت هي

- مشتاقة لاهلج
- ما ادري كارهتهم لو احبهم لو مشتاقة
- دتفكرين بيهم جنت
- اي دكتور تعرف شكد اذانا بابا بزواجة
- صحيح اذاكم بس احنا منعرف شنو الظرف اللي خلاه يتزوج وليش الا هي بالذات
- اني هم ما اعرف ليش وشلون كدر ينسى امي
- ومنو كالج هو ناسيها
- لا ناسيها
- مو شرط باعي الحياة تستمر واذا راح شخص شكد ما جان عزيز حيبقى الانسان بحاجة الحب والاستقرار لان ما يكدر يبقى نفس مكانة والعمر يركض
- يعني واحد عادي ينسى بحجة لازم يعيش
- هذي مو حجة هذي حاجة كل البشر وماكو شي اسمة نسيان اكو يتناسى واكو يحفظ الذكرى بمكان بعيد وما يبقى عايش بس عليها  ويمر الوكت بي وتالي ما يحصل لا قديم ولا جديد
- امممم
- اعرف ممقتنعة هالشي صعب يتقبلة الابناء من ابائهم او امهاتهم بس هذا واقع الحال

بقينا ساكتين كل واحد بعالمة و خطرلي اسألها عن حياتها

-  ربا عادي اسالج سؤال خاص شوي
- اي كول
- هم حبيتي
- لا
ما اعرف ليش جذبت علي يمكن ردتة يظل سر بداخلي وارتبكت كلش
- يعني ماكو بحياتج احد
- لا
- امممم
- ها
- ما اعرف خجلان اسال لا تكولين يتدخل
- لا بالعكس واذا مكدرت اجاوبك حكلك
- ليش جنت محبوسة بالمخزن
- قصة طويلة ووراك دوام
- اسف مو قصدي اتدخل انسي
- راح احجيلك بس بغير وقت لان هسة انت تعبان وتحتاج نوم
- مجايني نوم احجيلي
وكعدت تحجيلي بلا ما احس دموعي نزلو متت قهر عليها وعلى وضعها
- دكتور انت دتبجي ؟
- بصراحة اي مدا اصدك ممكن اب يسوي هيج ببنتة ولا اتخيل اكو وحدة بهالكلب الميت وهاي عود هي ام و عدها بنات
- سلمتها بيد الله وخلص ما عندي شي ثاني
- اذا رادو تسامحيهم ورجعولج يتوسلون عم تسامحيهم
- اسامحهم بس بعد ما اريد احد منهم بحياتي او حياة اخويا
- بس هاي مو مسامحة
- لا مسامحة اني حبطل اتحسب عليهم وابطل افكر باذيتهم وارتاح لو طلعو من حياتنا للابد وهيج اكون سامحتهم على كد ما اكدر
- الله كريم لا تقهرين بنفسج انسي كل شي
- وهو هيج
كمنا نمنا وبعد هالليلة كل واحد بينا ارتاح للثاني اكثر
داومنا الصبح بالعيادة وصحتها للغرفة مجان اكو هواي مراجعين

- نعم دكتور
- تعاي اكعدي لحظة واجيج
- اوكي
- تفضلي
- شنو هذا ؟
- افتحي وشوفي
- فلوس !
- راتبج هذا شنو متدرين صار شهر انت وياية
- هههههه صدك !!
- هههههه اي والله
- شكرا دكتور
- على شنو انت ليش تظلين تشكريني اشتغلتي وهذا المبلغ مقابل تعبج وشغلج
- تنتظرني لحظة
- اوكي

راحت طلعت ورجعت شايلة بيدها اوراق جنها وصولات وطلعت من الراتب

- تفضل دكتور
- شنو هاي
- هاي فلوس الملابس الاخذتهم النا
-و انت محتفظة بالوصولات حتى من تاخذين راتب تنطيني اياهم
- اي مقصرت ويانة
- دخذي فلوسج وضميها عيب عليج
- دكتور احنا متفقين وانت وعدتني تاخذهم
- وهسة تراجعت وما اخذهم
- اني هم ما اريد الراتب وحبطل منك
- هاي شبيج
- دكتور اترجاك حاول تفهم انه ما اكدر اتحمل اخذ شي من احد الا وادفع فلوسة او يكون اكدر اردلة المبلغ
- احد ؟ ليش ربا تاليتي صرت احد !!
- مو قصدي بس ..
- هاهية مثل متريدين تفضلي لشغلج

مجاوبتة واخذ مني الفلوس يمكن اني جفصت ويا شون ويا لساني يعني الرجال شكد خلوق واني كاعدة واكلة احد هو منو وكفلي غيرة صدك ضجت من نفسي بلحظتها لان ضوجتة

اني مجنت راح اخذ الفلوس ومتوقعت اصلا بعد تتذكر الوعد من كتلها اخذ لان اني ناسي ومن كالتلي ما اتقبل من احد حسيت نفسي  غريب كلش عنها وضجت لان اني حاسب نفسي مقرب و غير شكل
من لحظتها عرفت سبب ضيقتي من هالكلمة
لاني احبها وما اريد اكون بعيد هيج عنها كل ما اتقرب تصدني وتبعدني ..

ظليت افكر شلون اصالحة لان طول النهار جان كالب وجهة وضايج ويتصرف بثكل وياية
اجتني فكرة انه اشتريلة شي لان راح اطلع للسوك واخذ شي لادم افرحة بي

بعد ما خلص الدوام هو بقى واني طلعت وتمشيت شوي للمحلات القريبة اشتريت كم قطعة هدوم لادم مال بيت ومدرسة وطلعة واخذت للدكتور ساعة كلش مرتبة بس ان شاء الله تعجبة
وقبل لا ارجع مريت للسوبر ماركت كلت اشتري غراض بيتزا حتى اسويها للعشا ..

اول مرة اعيش هالشعور كلش حلو ويفرح انه تتعب بالشغل وتحصل اول راتب الك بدون منية احد ولا خجل ما تطلب وتكول محتاج فلوس الحمدلله يا ربي عشت هالاحساس جنت طايرة واني اشتري الغراض بفلوسي وراتبي ومرتاحة والفضل طبعا من بعد الله يرجع للدكتور

جان ادم راجع للبيت وديدرس فتت علي بوستة وانطيتة غراضة وحجيتلة ع الصار وشوفتة الساعة كالي هو يرضى بس انت همين لا تضوجي ترة اني  احبة واعتبرة اخوية الجبير فكتلة هو من يرجع اصالحة ان  شاء الله
كلش فرح و كيف بهدومة وصارت على قياسة مضبوط

قريت ادم شوية وكتلة يكمل باقي دروسة ورحت للمطبخ حتى احضر العشا كملت كل شي
فتت سبحت وبدلت ودننتظر الدكتور
سمعت صوت الباب كمت علي سلم هو
وفات للغرفة بعد مطلع شكلة بعدة زعلان
دزيت ادم علي وما قبل يتعشى كالة اتعشو انتو اني حنام تعبان
وكلت ادم وخلص واني مكدرت اكل شي من ضوجتي ..