CAPTIVATED BY TYRONE GREENE (TV Movie Adaptation & Published under Pop Fiction)

Chapter 7.1.4

#MeetBabyGirlKirsten

#JorTyHangChanceAtKirsten

********

CHAPTER 7.1.4

Jordan

May kung ilang araw na rin akong nag-stay sa unit ni Ty. Simula nang sabihin niyang impossible niya akong magustuhan ay ginagawa ko na lang din lahat para iwasan siya. Pinilit ko na ring 'wag matulog sa tabi niya lately. Natatakot na kasi ako sa nararamdaman ko. Feeling ko kasi ay hindi ako makakabangon kapag nasubsob pa ako. Haist... ilusyonada ko lang din para isipin na may something sa aming dalawa. Pero siguro nga, nasosobrahan ako sa pag-iilusyon. The past few days, madalas na din akong hatid-sunduin ni Chance. Mukhang seryoso talaga ang loko. Actually crush ko naman talaga si Chance. Sino ba namang gaga ang hindi magkaka-crush sa kagaya niya? Gwapo, mayaman at mabait pa. Pero alam ko, wala rin namang patutunguhan 'to. Sa tuwing maiisip ko ang layo ng agwat namin sa lipunan, nangliliit ang tingin ko sa sarili ko. Si Chance Daniel Ford ay anak ng isa sa pinakamayamang negosyante sa Asya. Katulad lang din siya ni Tyrone, mahirap siyang abutin. Hindi bagay sa katulad kong wala lang.

"Ate Jordan!" O.m.gee... si Kirsten, 'yung kapatid ni Ty. Ang ganda talaga niya. Mukha siyang Barbie doll sa ganda.

"Hi, Kirsten!" masayang bati ko rin naman. Sa tinagal-tagal nang pagta-trabaho ko rito sa canteen ay ngayon ko lang siya nakita rito. Kung sa bagay, tatlo nga pala ang canteen sa school nila. "Anong ginagawa mo rito?"

"Dito ako nag-aaral," natatawa pang sagot niya.

"Oo nga naman..." Tatangu-tango akong napakamot ng ulo. "Ngayon lang kita nakita rito sa canteen na 'to. Iyon ang ibig kong sabihin."

"Sa kabila kasi ang tambayan ng barkada, Ate. I was looking for Kuya and then I saw you kaya nilapitan kita."

"Ahh, kaya pala."

"Nakita mo ba si Kuya?"

"Oh!" Agad ko pang nilingon ang wallclock sa canteen. "Antayin mo na lang. Padating na 'yun."

"Great! Hihiramin ko kasi ang card nya. Nakalimutan ko bitbitin ang wallet ko."

"Ah, padating na 'yun. Gusto mo mag-merienda ka muna rito? Treat ko!" Actually, nakakatuwa rin naman itong si Kirsten. Kahit na hindi pa naman kami masyadong magkakilala ay sobrang gaan ng loob ko sa kanya. At siguro nga dahil na rin wala siyang kaere-ere sa katawan kahit pa anak mayaman siya.

"No, it's okay, Ate Jordan. Treat ko na lang 'yan," ngiting-ngiti pang sabi niya sabay upo sa bakanteng upuan doon.

"No, treat ko na. Afford ko naman ang food dito. Iyon ay kung kumakain ka sa ganitong lugar?" Iginala ko ang tingin sa paligid sabay mapaklang ngumiti.

"Oo naman, ano ka ba," nakangiting sagot pa niya.

Nang matanawan ko na ang hinihintay niya ay wala ako sa sariling kinagat ang aking labi. Nasalubong ko kaagad ang titig ni Ty, pero agad din niyang ibinaling ang tingin sa kapatid.

"Kuya!" Agad din namang tumayo si Kirsten at sinalubong nang halik sa pisngi ang kapatid.

"What are you doing here?" seryosong tanong pa ni Ty sa kapatid.

Samantalang si Chance ay nakangiting nakatitig lang sa akin habang kagat-kagat ang kanyang labi. Putcha! Ang gwapong nilalang naman talaga nito. Ngiti pa lang ulam na! Pero ang weird... Bakit hindi ko nararamdaman ang pagtalon ng puso ko sa tuwing makikita ko siya? Kay Tyrone ko lang nararamdaman ang gan'un. Pero alam kong kinikilig rin naman ako kay Chance. Ang gulo ko lang! Haist...