البارت السادس.... بقلم نانو الشمري
هو الاعمى بس يشوف
ينكر فضل عوچيته💔
حسين...الصراحة اني استلطفت هاجر بس مال تصير مرتي لا لان اضوج من البنية هي الي تبادر وتذب ،روحها وهي من البداية ظلت تحاول وياية وتتودد واني اكره البنية هيج رغم ماطولت علاقتنا سنة ونص وتقريبا يوميا نتشاوف فحيل تعلقت بيا هيه ومن تبرعتلي بكليتها حسيته موقف انساني منها الله يجازيها عليه...
(هاجر)...اني بنية يتيمة الاب وعندي اربع خوات واني خامستهن جان عدنا اخ ومات بحادث سيارة وعدنا بس امي بنات محافظات على نفسنا لخاطر امي لان تعبت علينا حيل وعلى تربيتنا... اني حبيت (حسين) فد مرة وتعلقت بيه وحبيته موت وعلاقة حب اني وياه سنة وتسع اشهر ظبط من تخربط ونقلوه للمستشفى حسيت روحي راحت وياه مريت على المستشفى حتى اشوفه افتهمت هو محتاج كليه ضروري لو يموت كلت لو روحي تروح ولا هو يصير بيه شي بس ماكدرت افوت عليه اهله موجودين وعلى اساس راح يتبرع احد منهم فاني شفته من بعيد وافتهمت السالفة رجعت للبيت مجبورة امي دتسافر للحج ولازم اودعها وهي متدري بشي فرحت ودعت امي ورجعت وكلت سبحان الله هاي فرصة رحت للمستشفى تبرعت بكليتي لحسين بس ماكلت لخواتي بس لصديقتي وكتلها من اخلص العملية يله تكولين للبنات لان راح يعارضن واني مااكدر اشوف حبيبي يموت واني واكفة.خلصت العملية اول مسئلت على حسين كلت بشروني شلونه
الدكتور كال صحته تمام والعملية نجحت بس انتي عندج مضاعفات شوية كلتله فدوة المهم هو كام بسلامة الدكتور ابتسم وكال الله يشافيكم فرحت حيل
جان يجن خواتي تخبلن وبس يبجن كتلهن مابية شي سوولي عملية (الزائدة )مصران اعور اتفقت وية صديقتي والدكتور غيرت الخطة عبالي ااكلهم بس كلت ياكلون كلبي شفت خواتي جكد بجن كلتلهم مابيه شي يمعودات المهم صرت زينة وطلعنا من المستشفى اني وحسين وراها رجعنا للدوام وما اصدك شوكت يجي اليوم اللي يجمعني بيه بيت واحد .وفرحانة لان قطعة من جسمي عنده وفرحني اكثر من كال شوكت تجين ابيتي واداريني بس شوكت يفتح الموضوع ماادري واني استحي اكوله قابل اكله شوكت نتزوج .
حسين ...امي خطبتلي (هبة) ودنحضر للحفلة واجتي اختي لمياء والكرايب حتى نروح نلبس الذهب كملنا الخطوبة وبنفس اليوم عقدنا سيد وباجر نروح نكطع مهر بالمحكمة فاخذت اجازة يومين عقدنا بالمحكمة وسوينا غداء لبيت اهل هبة وعزمنا جيرانا ام رعد
بيداء....اني والبنات خواتي والكرايب نسوي بالاكل نساعد امي ..بس امي هي الي تطبخ امي عاد سوت برياني وفاصوليا وتشريب لحم وتشريب دجاج وشوينا سمج وسوينا حلاوة نشأ وحلاوة شعرية صار الاكل يموت كلهم يكولون الله شنو هذا الاكل عاد ام رعد تباوع علية من امشي كلت شبيها معقولة تدري جان ام رعد كالت اي والله اكل ام وضاح يجنن دزتلنا برياني وتشريب دجاج وحلاوة نشا يخبلن علاوة لو تكولنا الطريقة شلون خاصة حلاوة النشا ابد ماظبطتها وام العروس هم كالت من زمان اكل ام وضاح يجنن
ام وضاح...والله يادادة نفس اكلكم واذا على البرياني اني اسوي التمن مالته اصفر وتصفاه يعني (شخل)
افور المي وواحط للمي كركم وفلفل اسود وملح ومن يفور اذب التمن واكلبه من اشوف التمناية ادوسها تقريبا مستوية مو ممرودة اصفيه بالمصفي وهو بالمصفي اذب علية نومي بصرة وهيل مطحونات واقلبه واجيب الدهن لازم محروك قصدي وافركعله ادوغله اذب علية الدهن المحروك واقلبه واغطية بعلاكة اوكيس نايلون واعوفه يتهدا
الحشوة ...اسوي الشعرية وعلى جهه اكلي بتيتة مربعات وبصل مربعات واحمس لوز واحمس كشمش
وعلى جهه بطاوة اسوي لو دجاج لو لحم مربعات مو كلش جبيرة احطهم بالطاوة واحط مي وملح شوية واخليه يفور قريب ماينشف ميه احط علية دهن وبهارات واحمسة .مو تستوي الشعرية وتتهدا اذب فوكاها البصل والبتيتة واللوز والكشمش هاي كلهن محموسات واضيف الدجاج او اللحم واضيف بزاليا واخلطهم كلهم وية الشعرية واحط عليهم نومي بصرة وعيل مطحونات وبهارات برياني وشوية ملح.ومن يتهدا التمن اصب التمن واحط الحشوة على الوجه.كالوا عاشت ايدج وتشريب الدجاج شلون طريقته ..كتلهم اني عندي كذا طريقة بس هذا الي دزيته لام رعد
تشريب الدجاج ..قطعت الدجاج وغسلته وحطيته بالجدر وقطعت بصل مربعات وقطعت بتيتة مربعات وضفته فوك الدجاج وحطيت عليه كركم وفلفل اسود وكمون وكاري وحمستهن كلهن من خلصت حمس حطيت علية مي ونومي بصرة كبار اثنين بدون ماازرفهن حتى لا يمرمر وخليتله ثلاث قطع ماجي وخليته يفور الى ان ثخن واستوى من استوى اعصر عليه نومي حامضة وحدة او وحدة ونص واطلع النومي بصرة على صفحة خاف احد يحبها اعوفها وهذا تشريب الدجاج
وحلاوة النشأ....خاشوكتين نشأ مقابليها اربع خواشيك شكر وكوب مي ...عادي انتي بكيفج زيدي بس على هذا القياس ...وطريقتها ..احط دهن بالجدر واجيب كمية من المبروش(جوز هند) احمسة بالدهن الى ان يصير جوزي طوخ طوخ اجيب المواد الي خلطتتهن النشا والشكر والمي اذبهن فوك المبروش واظل اخوط الى ان تثخن واصبها بالمواعين واحط عليها لب جوز والف عافية
عاد كلهم عاشت ايدج تعبناج ويانا كلتلهم يمعودين شسويت قابل .
حسين...
المهم العصر راحوا بيت ام هبة واتفقنا على الزواج بعد شهر ...ثاني يوم الصبح رحت للدوام عادي وداومت شافتني هاجر كالت ظل بالي عليك لابت روحي عبالي بيك شي كلت الها لا مابية شي بس جنت تعبان شوية وماكدرت اجي انتي شلونج شخبارج كالت مشتاقتلك كتلها اني اكثر ...عبر تقريبا عشرين يوم بقى عشرة ايام على زواجي واني بالدوام كاعد جتي هاجر كالت غمض عينك غمضت طلعت جايبتلي سلسة ذهب لان عيد ميلادي استغربت وهو اني ناسيه و خطيبتي او مرتي بحساب ماذكرته كتلها شلون ذكرتيه كالت اكو واحد ينسى يوم اجى بيه اعز بشر على كلبه...💖💖💖
يمشكلتي..
ويسالفتي
ويعشگي الــ من طرف واحد💔💔...
