البارت ٣٦.
بيداء ....تزوجت محمد من اهل كركوك .ولد فقير باول فترة كعدت يم اهله .
ورى فترة كعدني بيت او نسميه مشتمل صغير صاله وغرفة نوم ومطبخ وصحيات .
ورى فترة تقريبا سنه بين ماتعودت عليه صرت حامل
وخابرت غيداء ولمياء وامي فرحوا حيل وجوي يمي خطار ظلن تقريبا اسبوع لان بداية حملي نظفولي البيت وامي ترستلي المجمدة هي ولمياء لفت كبه وبورك ودولمة وطبختلي يمكن عشر انواع مرك وخبزتلي
وضمتلي بالمجمدة حتى مااتعب وشويه بهذا الاسبوع غيرت جو لان جوي يمي .
وانوليت بالحمل مااكدر اروح للمقبرة ابغداد مقبرة رعد وجهالي .
بس من جتي امي والبنات رحت للمقبرة يمي مال سردار وسرو لكيت شغلة استغربت منها لكيت بس قبر سرو
قبر سردار ماكو تخبلت .
امي راحت على الدفان الي بالمقبرة كالتله يمة كبر نسيبنا هنا شو ماكو شنو السالفة .
الدفان كلها قصدج قبر سردار الكردي .
قالتله اي كلها اهله جوي نقلوا منا ودوا للشمال لسليمانية
وتركوا بس قبر بنته.
بيداء......كمت ادك والطم وابجي
غيداء .....بيداء.ملخت روحها وبقت تبجي وكالت ربي تعبت ليش هالعقاب هذا .
عاد حجينا وياها كلنا الها هسة انتي مرية متزوجة
وسردار راح لدار حقه هو واهله اخذوا .
عاد بيداء سولفت النا وكالت هاي امه تتخبل مني
وسولفت النا كالت جتي علية الصبح بالمستشفى من مات سردار وكالتلي الا يجي يوم احرك كلبج من المكان الي حركتي كلبي بيه وراها اموتج بس اني مافهمتها
احنا تخبلنا من كلامها
لمياء .....يمعودة خلي تولي شتريد تسويلج
وبعدين انتي شعليج. قابل اخذتيه من اهله غير ضرغام جاب سردار عليج تعرفيه يعرفج
بيداء ....اي هي امه تكول انتي بكتيه مني وسحرتيه واخذتيه .
لمياء..... دخلي تولي هي مرية خلي توصلج.
فاتت الايام .....وصرت تسعة اشهر وجهزت الطفل
وبالليل اني نايمة جاني وجع الولادة وداني محمد للمستشفى وجان اجيب.. (سيف).
الحمد لله ولد مثل الكمر ورجعنا للبيت اتصلت بأمي من الصبح جتي علية سودة علية لكركوك.
وهمت بقت يمي اسبوعين تعبت وياية .
فاتت ايام وصار عمر (سيف) سنتين وروحي معلكة بيه وابوه هم حيل يحبه وبيت جده اهل ابوه يموتون عليه لان اول حفيد الهم ...
واني كاعدة بمنطقة هادئة مرتاحة بيها جيراني منا بيت ام سناء. مرية صاحبة ست بنات ارمله تخبز للعالم ومعيشة بناتها خوش مرية. ومن هاي الجهه جيراني بيت ام حيدر . مرية ورجلها وجهالها اثنين يعتي مرتاحة الحمد لله .
محمد ..خابروا عليه بيت اهله امه تعبانة صاير عدها ذبحة ساعة ١٠ بالليل وراح كال قفلي الباب زين .
كتله خلي اجي وياك كال لا سيف نايم خطية يتبهذل
كتله ديلا مابيها غير العافية
طلع محمد بس مدري شلون طلع خايف على امه .خطية حتى لبس حذاءه برة .
اني فتت للبيت وسديت الباب
تقريبا ساعة ١٢ ونص سمعت الباب اندكت كلت محمد اجى وسريع طلعت فتحت الباب مافكرت اصلا.
بس فتحت الباب وصار بوجهي اربع زلم
داسد الباب دفعوا الباب وسدوا حلكي وفاتوا وسدوا باب البيت وفوتوني جوة بالبيت وسدوا الباب.
يتبع....
