الكاتبة الاسدية
رجعت البغداد وياريتني ما رجعت رحت وية ام ياسر البيتهم كأن جنت انتظر ياسر موجود وراح يستقبلني مثل اول مره
من رجعت يحضني وياخذني على صدرة بس خابت كل امالي
شفت البيت فارغ صعدت الغرفة ياسر رجعت بذكرياتي من شميت عطره لسة موجود بالغرفة فتحت كنتوره ملابسة على حطتهم ام ياسر كالت كل يوم ادخل للغرفة انظفها واعطرها كان هو موجود
طلبت من ماما وام ياسر يعوفوني بالغرفة وحدي قفلت الغرفة الي مجانو يعرفو ان ياسر جان موجود اول ماراحو ركضت عليه وحظنتة
كال دنوش اشتاقيتلج هواي ليش هلكد عفتيني
ماتوقعت هيج كلبج ينطيج كتله اعذرني حبيبي ماجنت ادري بيك تنتظرني بقيت حاظنتة اوف ياربي اشكد احبك
كال كافي ماتحمل كلامج احترك عمي جبار
ضحكت على كلمتة كتله بعد متقشمرني اعرف ماعندك عم اسمة جبار
بس ضحكت بصوت عالي ضحكة هستيرية طبت ماما علية وهي خايفة وتكول دنوش ماما شبيج حبيبتي كتلها مابية شي جنت اضحك وية ياسر
ام دنوش ياياسر ماما هو وين ياسر كتلها هذا متشوفو التفتت ياسر ماكو كتلهم والله هسة جان موجود ليش متصدكون
ماما اخذتني وطلعتني من بيت ياسر ورجعتني للبيت وهي تحجي وتهدي بية وتتوسل وتكلي ماما مو هسة جنتي يم قبر ياسر
بعد ماخليج توصلين يمهم اذا راح ترجعين مثل الاول رجعتني للواقع كلتلها لا ماما هاي هية اسفة بس والله مو بيدي اني شفت ياسر بغرفتة وحجيت وياه
وصلنا البيتنا رحت على بيبي حظنتها وكلتلها علمودج رجعت البغداد
ثاني يوم اجتي مريم يمي وبقينا نسولف وشكد حاولت اتخليني اكمل كلية حاولت بكل الطرق واني ابد جنت رافضة رفض قاطع
مرت علية الايام كولش صعبة وممله مابيها اي شي جديد حسيت روحي راح انجن ماما نفس الشي مشغوله بالمجتمع مالتها وكل يوم جايبتلي عريس جديد اتشوفة كولش مناسب الوضعها الاجتماعي والبرستيج مالتها واني ارفض
بيوم اتصلت علية مريم كالت عماد اخو ياسر طالب منها اتصل علية سألتها شنو يريد مني كالت ما اعرف
اخذت رقمة واتصلت كتلة طلبت اتصل عليك كال اي حبيت اسلم عليج لان اني اعزج بمعزة ياسر جان كلامة كله بادب وسؤال عن احوالي ماجان اكو شي مهم بالاتصال وبنهاية المكالمة طلب ان اتصل بي كلما احس نفسي محتاجة صديق او اخ
اتشكرت من عنده وسديت التليفون اتكررت اتصالات عماد وياية واني جنت احس بفراغ قاتل جنت اسمع صوت ياسر بي وهو استغل هذا الشي استغل وحدتي واستغل انشغال عائلتي عني