صعدت خاص اني وحسام كتلة اتفضل احجي شنو رايد مني
حسام انتي اسلوبج حلو وهواي يتمنون يحجون وياج واني عندي دردشة اريدج وياية وبس تجين اسويج ادمن بالجات وتكونين مسؤولة بس المهم من تطلعين من هاي الدردشة اتكولين اني راح ادخل جات جديدة وتنطين اسم الجات مالتي
انطاني اليوزر الي ادخل بي مال الادمن كلت خلي ادخل واشوف هم تجربة جديدة وهم ناس جدد اريد اعرف شعور الادمن
دخلت الجات الجديد شفت عندي لون مختلف ونجوم يعني اني ادمن رحب بية حسام وعرف الموجودين علية بالجات
بس الحلو ماجان هوسة واحس بيهم واحد يعرف الثاني عبالك عائله وحدة
عرفت صاحب الجات من اهل البصرة ومدير الجات من اهل بغداد وحسام ادمن بالجات يعني مثلي
واكو بنات من العراق واكو قليلات من السعودية والولد من البصرة وبغداد عجبني ابقة بهاي الجات
اتعرفو علية بس ماحجيت الحقيقة لا اسمي ولا شخصيتي دخلت بشخصيتي الي اني اخترعتها النفسي والي جنت اتمنة اكونها بعيد عن دنوش وحياة دنوش وشخصية دنوش
دخلت اني دلوعة بشخصيتها المرحة والمحبوبة من اول ما دخلت صارت عندي شعبية والكل يحاول يتعرف علية
دخل صاحب الجات كان اسمة ماجد الي هو من اهل البصرة والكل رحبو بي مثل ماكلتلكم عبالك عائله وحدة وشفتهم يحبو
استغرب من شاف اكو وحدة جديدة وبسرعة ادمن صايرة سلم علية ورحب بية صعدلي خاص وسالني شعجب مصعديج ادمن
حجيت وياه وراها كال اسلوبج حلو تستاهلين وسألني انتي من وين كتلة من بغداد ونهينا الكلام الخاص ورجعنا للدردشة العامة
انتبهت البنات اكثرهم يذكرون واحد اسمة حمودي وان مكانة خالي وربي يرجعة بالسلامة ما سالت منو هذا وليش كل الي موجودين يحبو
بقيت وياهم اسبوع حقيقي نسيت نفسي وبقيت اكعد اكثر على الجات اتعرفت على الكل تقريبا والجدد اسولف وياهم
فجأة سجل دخول واحد اسمة حمودي اشوف الكل رحبو بي والكل انشغل وياه بالسلام والبنات موتن روحن علية بعد ما انتها الترحيب الحار بحمودي اني رحبت بي
استغرب وجودي لان ميعرفني واني ادمن سلم علية سلام عادي وهنا بدا السوالف الحلوه والضحك والشقة يعني روح الجات جان هو
غير الاسلوب كلة عرفت ليش هم يحبو لان اله نكهة خاصة وابد ميفرق بين احد من الموجودين اتشاقة وياية شوي وسالني انتي منين كتله بغداد
اتعرفت على وحدة اسمها مرام من كركوك كولش حبيتها واكثر حجينا جان سوه عرفت هي معجبة بحسام وهو هم معجب بيها
