ضليت اقرأ بالرسائل مال ياسر وعقلي يكول هذا بس كلام وكلبي يكول لا كل كلمة طالعة من القلب
افتح كتابي اريد ادرس للامتحان وابقى افكر بياسر
ابد ما استوعبت شي من الدراسة
اخر شي اخذت الرسائل وضميتهم بالجراره خابرت على مريم هلو مريومة شلونج
مريم هلو عمري دنوش شلونج هسة ردت اخابر عليج
دنوش ماكو فرق
مريم كاعده اقرأ فيزيا وكلشي مفهمت شلون بية
دنوش اني هم كلشي ماستوعبت
مريم انتي متستوعبين هو انتي عبالك انشتاين كلشي سهل عندج
دنوش 😠😠😠😠 كله من وراج اشسويتي بية
مريم 😊😊😊 اني شعليه ليش اكو افقر مني
دنوش خطية براءة الاطفال في عينيكي ولج شنو هذن الرسائل الي مخليتهن بالكتاب
مريم ها ها واني اكول وينهن عبالي خليتهن بالكتاب مالتي
دنوش اي مسكينة انتي واني صدكتج
كولش ليش ماعرف سوالفج لج لخبطتي كياني حتى ماكدر ادرس
مريم ولج دنوش تدرين اشكد احبج
وماريد اذيتج والله ياسر يحبج ومتعذب من وراج
دنوش اهوووو رجعنا خلي اروح انتي بس مغثة باي
ثاني يوم الصبح رحت للمدرسة شفت ياسر واكف بنفس المكان ومشغل اغنية كاظم الساهر احبيني بلا عقدا وضيعي في خطوط يدي
دخلت بسرعة للمدرسة من انتها الدوام طلعت هم لكيت ياسر من شافني شغل نفس الاغنية احبيني لاسبوع لايام فلست انا الذي يهتم بالابدي احبيني
رجعت للبيت واني ادندن بيني وبين نفسي احبيني اول ما وصلت الغرفتي شغلت الاغنية وبقيت اتمعن بكلماتها
اعشق كاظم الساهر وكل كاسيتات مالته عندي ضل الوضع بيني وبين ياسر نفس ماهو
بيوم الصبح رحت للمدرسة نزلت من السيارة ماشوف الا سيارة طبكت يمي
اجتي بكل سرعتها مافكرت كان الدنيا وكفت وماحس الا اثنين نزلو منها حاولو يصعدوني بالسيارة واني اقاوم بكل قوتي
بعدها ماعرف شنو الي صار اغمى عليه وراها فتحت عيني شفت نفسي بحظن ياسر وهو يحاول يصحيني بقيت اصرخ وابجي واني منهاره مامستوعبة ولا اعرف الي صار
اخذوني الحماية بالسيارة للبيت وياهم ياسر الي فهمتة من رادو يخطفوني جان ياسر موجود فصاير رمي على الخاطفين وياسر مصوب اثنين منهم
والحماية لازميهم ومتصلين على بابا وحاجين الموقف وحاجين على بطوله ياسر وان هو الي نقذني
بقيت بحالة صدمة اكثر من اسبوع بابا كال بعد متبقين بالعراق ترحين يم اخوانج صدوك انهاريت
اول شي ماريد اعوف بغداد ولا اريد اعوف بيبي
الي لولا وجودها ومساندتها الي ماجان عبرت الازمة ولا اريد اعوف مدرستي ومريم
ماما فرحت من كاللها بابا ترجعون للدنمارك لان الوضع خطير اهنا وبس الله ستر جان خسروني واني ماقبل اروح لو مهما يكون
بس بعد خلص بابا قرر ومحد يكدر يتناقش وياه
حبست نفسي بغرفتي وبقيت بس افكر بياسر
معقوله بعد ماشوفة وبقيت اقرا الرسائل مالتة واسمع كاظم احبيني
دخلت بيبي عليه شافتني ابجي
حظنتني وكالت بيبي لتنقهرين انتي طول عمرج عايشة اهناك وهناك امان
يابيبي لو صاير بيج شي شجان سوينا ولوما ربج سخر هذا الضابط جان موجود شجان سوينا كافي يابنتي لتبجين
وخليها على ربج كتلها بيبي ماكدر افاركج وبعدين هذا ياسر هو نفسة الي حجيتلج علية
ياسر رجعت من الدوام مثل كل يوم رحت يم مدرسة دنوش حتى اشوفها
نزلت من السيارة بس اول مره احس بنظرتها الي مختلفة حسيت اكو تغيير بس بلحظة شفت سيارة اجتي بسرعتها ونزلو منها اثنين وحاولو يسحبون دنوش ويدخلوها للسيارة
بسرعة فائقة سحبت مسدسي لان متدرب على هيج مواقف ورميت اول شي على السايق حتى ميكدر يسوق
وراها شفت الحماية الي وياها يرمون بشكل خفت ليصوبون دنوش اشرتلهم اتوقفو واني اتكفلت بالباقي من صوبت الثاني
عافوها وحاولو ينهزمون اني ركضت على دنوش وهي مغمى عليها خليتها بحظني مثل الام من اتخاف على ابنها
وبقيت اضربها على وجها حتى تصحه شفتها فتحت عيونها كلبي ارتاح بس هي جانت بحالة صدمة
ضمت راسها بحضني حيل وبقت تصرخ وتبجي واني بس حاضنها واحاول اهديها
كون اضمها بنص كلبي ولا اخليها يمسها مكروه
اخذوها الحماية واني رحت وياهم لان خافو يكونون متابعيهم
وصلتها للبيت ورجعت بس عفت كلبي وعقلي كله وياها وبقيت احظن بالقميص مالتي لان عطرها باقي بي من حظنتها
واني ادعي ربي ميفاركنا ويحفظها الي
ضليت اروح للمدرسة بس دنوش ماكو وماعرف شنو الي صار كلت اخلي علي يتصل بمريم وتفهمة شنو الصار
