الكاتبة الاسدية
القصة حقيقية فقط تغيير بالاسماء
دنوش مرت علية الايام كولش صعبات واني باقية بعنادي حتى الاكل كاطعتة
نزل وزني الي يشوفني يتفاجأ بية
اشكد حاولو اخواني احمد ومحمد يطلعوني من الحالة الي اني بيها ماكدرو
اشكد طلبو مني ارجع الدراستي وتصلو بصديقاتي القديمات حتى يتواصلون وياية ويرجعوني للاجواء الي جنت عايشتة بس كلما يحاولون اني اتمرد اكثر
عزلت نفسي عن العالم كله نهاري وليلي اما نايمة اما اسمع كاظم الساهر واقرا رسائل ياسر
بيوم ماما دخلت علية همزين اتذكرت عدها بنية
ماما دنوش ماما اريد احجي وياج
دنوش اي ماما احجي
الام انتي ليش هيج تسوين بنفسج ليش تشلعين كلبنا
دنوش اني ماشالعة كلب واحد ولا ماذية واحد
الام لا انتي مسوده عيشتنا كلنا كافي هيج تسوين ومن باجر ترجعين الدوامج غصب عنج
دنوش يعني عادي تكدرين تغصبيني مثل ما جبتيني اهنا بالغصب
الام انتي صايرة متخافين من احد
وراسج يابس ماعرفت اربيج اني
دنوش هو انتي شوكت فارغتلي حتى اتربيني يايوم حسيت عندي ام مثل البنات من احتاجها الكاها اهم شي عندج نفسج وطلعاتج وصديقاتج
مو مهم بنتج
الام مو اكلج انتي ينرادلج تربية من جديد من يومي واني اتندمت من صارت عندي بنية
دنوش هو هذا الموضوع اتكرهيني لان بنية اهم شي عندج ولدج الي من رجعتي للعراق الحد ما رجعتي اهنا مافكرو حتى يتصلون بيج
الام لتخليني امد ايدي عليج
دنوش اي اضربيني حتى اروح للبوليس واشتكي عليج ومتشوفوني بعد طول عمركم
بقيت اصرخ بدون وعي لان حالتي النفسية كولش اتازمت عافتني امي وطلعت
واني بقيت بس ابجي اتصلت على بابا دك انطاني رفض يعني مامتفرغ يجاوبني
اتصلت على بيبي سمعت صوتها حسيت بيها تعبانة كتلها بيبي اشبيج كالت مريضة شوية والوحده كتلتني
كتلها بيبي تعالي يمي اني ماكدر بدونج كالت بيبي تدرين بية ماعيش خارج العراق اموت
كتلها ديري بالج على نفسج
ياسر من بعد سفر دنوش والدنيا ضاكت بعيني غيرت مكان دوامي وتحولت على مكافحة الارهاب وتعاملنا كلة وية العصابات ومداهمات وخطورة وجنت اول واحد ادخل بالمكان الي نريد نداهمه
والكل تحجي عليه ايكولون شنو انت تريد تنتحر ماهامتك نفسك اكللهم العمر واحد والي الله كاتبله الموت يجي حتى لو بفراشة
خطية الحجية جانت هواي خايفة علية وكل يوم اتحلفني اتكلي يمة برضايه عليك اتعوف الدوام ليش تحرك كلبي
والوالد يكلي عوف الدوام وخلي نطلع السوريا نستقر اهناك واني اكله ماعوف الدوام وماطلع
اختي علياء سافرت هي وزوجها السوريا وراها عماد هم سافر واستقر اهناك يمها
علي ضل يتوسل بابوية حتى يدخل دوره مال ضباط وابوية وامي ماقبلو كالوله مو كافي واحد ذابي بحلك الموت انوب ايصيرون اثنين
اضطر يداوم كلية وبقت علاقتة بمريم
جنت من اشوف مريم عبالك شايف دنوش
امي اشكد حاولت وياية حتى اتزوجني كالت بس تزوج تستقر وتنسه دنوش
كتلها دنوش انزرعت بالروح متنسي الا من تطلع روحي
اني ادري الي بعيد عن العين بعيد عن القلب اني بالعكس كل يوم دنوش اشتاقلها اكثر واحبها اكثر واكول ربي ماراح ينساني
لازم بيوم يجمعني بيها
دنوش جنت كاعدة اتصفح بالنت دخلت علية امي كالت حضري نفسج راح نسافر للعراق
انصدمت كتلها شنو كالت اشبيج انسافر للعراق كتلها شوكت كالت حصلت حجز السوريا بعد بعد يومين ومن سوريا حجزت البغداد
اني من الفرحة ماعرف شنو اسوي اروح للكنتور مالتي افتحة واسد انخبصت شنو الي اريد اسوي مادري
جهزنا نفسنا بعد يومين سافرنا كمت احسب الدقايق دقيقة دقيقة مو ساعة ساعة شوكت اوصل بس اريد اوصل بغداد
وصلنا السوريا طلع الحجز مالتنا ثاني يوم واني انجنيت ليش مو نفس اليوم
بقينا بسوريا حتى ما اخذت عيوني نوم
ثاني يوم سافرنا البغداد وصلنا للمطار جانو الحماية منتظرينا اخذونا وطلعو بينا بس مو على البيت لا على مستشفى
كتلها ماما وين رايحين شكو شنو الصاير كالت ماكو شي بس بيبيتج شوي تعبانة
اني انهاريت كله ولا بيبي بقت عيوني اتصب دموع وادعي ربي مابيها شي
وصلنا للغرفة الي مخلين بيها بيبي سالنا الدكتور كال عدها جلطة وصاير عدها شلل نصفي وحالتها بعدها ما مستقره
كلت الماما ابقة يمها كالت هي فاقدة الوعي هسة وبقائي يمها مابي فائدة
رحت للبيت واني بالي كله يم بيبي يارب اخذ من عمري وانطيها
بقيت اروح وارجع على بيبي الحد ما كال الطبيب وعت وسألت عليكم اطمنت على بيبي وطلبت من الحماية ياخذوني على المدرسة
حتى اشوف مريم وصلت للمدرسة جان خلصان الدوام والكل طالعين فكرت
بياسر كلت للسايق اخذني البيت مريم
واني جنت اقصد بيتهم القديم يعني بيت ياسر
وصلت واني كلبي وجسمي كله يرجف
دكيت الجرس طلعتلي بنية تقريبا بعمري سلمت عليها كلتلها اني دنوش اجيت اسأل عليكم
هي راحت تركض جوه وتصيح ماما ياسر تعالو طلعت الحجية شافتني كالتلها علا ماما هاي دنوش
