الكاتبة الاسدية
رحت ادور على دنوش بالكلية مالكيتها سألت عليها محد شايفها طلعت لكيت الحماية واكفين يعني ماطالعة بقيت افتر واسأل عليها اخر شي شفتها طالعة من الحمامات والعيون صايره حمرة والخدود والشفايف منفوخات متت قهر عليها يعني جانت تبجي هاي العيون الي روحي بيهن الي هنه سعادتي اليوم حزينات والسبب اني فاتت من يمي وابد ما رفعت راسها ولا كأن شايفتني كتلها دنوش اريد احجي وياج ماوكفت لزمت ايدها حيل ودارت عليه كالت ماريد تلمسني مره ثانية وابد مارفعت عينها كتلها دنوش والله كذب والله مامتزوج بس اسمعيني
دنوش اذا صدوك مامتزوج هم كذب انت ماخاطب بت عمك
حمودي جنت خاطبها والله مجبور وخطبتها
دنوش يعني جنت اتخلي عينك بعيني وتكلي اريد اتزوجج وانت خاطب مو
حمودي والله ماريدها وماكتلج خفت اخسرج
دنوش وهسة جاي اتكول اكللها هيج لان دنوش غبية وراح اتصدك بيه واكدر اخدعها مثل قبل
حمودي دنوش اني عفت اهلي والدنيا علمودج
دنوش حمودي اذا على حجيك وصدك اتحبني ماريد اشوفك بعد
حمودي دنوش انتي شتكولين اموت وربي اذا ماشوفج
دنوش اوك اخذ راحتك واني راح اترك الدنيا كلها بسببك
حمودي انت ليش متنطيني فرصة افهمج
دنوش اخر طلب اطلبة منك ماريد اشوفك بعد وحتى للكلية بعد ما اجي
حمودي عافتني دنوش وراحت بدون حتى متنطيني اي فرصة افهمها او ابرر الها ومن حركة كلبي رحت على عماد اريد اشوف منين عرف بموضوع الخطوبة وليش هيج سوه
حمودي عماد ممكن اعرف ليش هيج كلت الدانية على خطوبتي
عماد اول شي احترم نفسك اني دكتور عماد وانت طالب بالكليه وثاني شي شتريد اعرف انت تخدع دانية واني اعرف وابقة اتفرج عليك وانت مستغفلها وثالث شي اني دانية احبها وكلها ايام وتصير زوجتي
حمودي من سمعت هيج هجمت على عماد ودك بوكسات فقدت كتلة اذا اتقربت على دنوش اخليك تلحك اخوك وداعت هي دنوش والطلاب التمت وبس تريد اتفاككنا
عماد وهو يمسح حلكة من الدم ويصيح على احمد انت واحد بلا اخلاق وراح ارفع شكوى بيك للعماده واذا مافصلتك ماتسمة عماد
حمودي اتدخلو الامن مال الكلية واخذوني الغرفة الامن واني اعصابي نار اخسر كلشي بحياتي بس دنوش لا لان هي النفس وهي الروح ماتخيل نفسي اعيش بدونها دزو علية بالعماده وحولوني مجلس تحقيقي وراها دنوش اسبوع ماجتي للكلية من اسال عليها يكولون متقبل اتداوم متريد اتشوفك خلص التحقيق وياية ولان يعرفون منو اني وعندي معارف اتوسطو اني اتفقت وية العميد بس احضر الامتحانات مال نهاية السنة طلعت من الكلية بس بقيت عيني على دنوش اشكد حاولت احجي وياها ابد متنطيني مجال بقيت اراقبها من بعيد وهاي الفترة بقيت مشغول شلون اوكف من جديد بس مشكلتي اهنا قلة الماده اي مشروع يحتاج فلوس واني ماعندي بس فلوس السيارة اشتغل بيهن بقيت اتواصل وية سامر طلبت منه يفهم دنوش كل وضعي بس بصورة غير مباشره تعبت هواي منا اهلي ومنا دنوش ومنا محتار بحياتي فتحت موبايلي بعد مده اتصل بية زوج اختي سألني شنو الي صاير بيني وبين اهلة حجيت كلشي هو اتفهم وضعي كال ارجع للاردن احسن من بقيتك بغداد كتلة ماكدر ابتعد عن دنوش وراها بفتره خابرتني اختي كالت دزيتلك حواله باسمك بس اترجتني ما اكول الاحد حتى ميوصل خبر الابوية ويزعل عليها كتلها ماريد شي منكم بس اريد اتحسون بية اني صحيح عايش بس ميت بلا روح لان روحي بعيده عني كالت مابيدي شي اسوي واني تدري بعيده وحلفتني اسحب مبلغ الحواله حتى ابتدي بيها رحت سحبتها جان مبلغ زين استغربت قيمة المبلغ منين دبرت هيج مبلغ اخذته والحمد لله نفعني هواي بقت عيني على دنوش اموت قهر من اشوف شلون طفت ضحكتها وحيويتها والحزن ماخذ جزء كبير من حياتها دائما وحيده منطوية ورغم كل هذا عماد بعده يحوم حولها ويحاول يستغل فرصة وحدتها والفراغ الي عايشة بي
دنوش بعد ماشفت احمد وعيني عينك يكلي اي خاطب وتبرير مالته ان هو مجبور على الخطوبة واني مستحيل اقتنع احنا بيا زمن هسة البنية اهلها ميكدرون يجبروها مو رجال وهو مو زغير واهله يتحكمون بي حسيت بجرح كلش جبير واحس كسر كلبي شلون كدر هيج يسوي بية ليش شنو الي سويته وياه حتى يكسر كلبي ماردت اشوفة ابد لان من اشوفة اشوف انسان خاين خداع اني انخدعت بي يمكن طيبة كلبي خلتني ماشوف حقيقتة حتى للدوام ماقبلت اروح شلون التقي بي يومية بعدها عرفت متعارك وية عماد ومسووين بي مجلس تحقيقي لان هو محمل عماد مسؤولية اني عرفت بالغش مالته وراح يجي بس على الامتحانات رجعت للدوام بس مكسور واهسي وين ما اروح بالكلية الي وياه ذكرى جانت حلوه وهسة مره سامر اشكد حاول يبرر موقف احمد بس كلبي مجروح ماريد اسمع اي شي عنه فكرت انتقم من نفسي ومن احمد من نفسي لان فكرت اكو حب حقيقي عبالي اكو انسان مثل ياسر ومن احمد لان ثبتلي العكس واكو هواي ذئاب بشرية وبعد فتره وقربت نهاية السنة وامتحانات الفاينل واني افكر شلون راح ارجع اشوف احمد كاعدة بالكلية واشوف عماد
عماد هلو دنوش شلونج وين شنو هاي الغيبة محد يشوفج
دنوش هلو عماد اني زينة وبعدين ياغيبة موجوده يومية اداوم واشوفك
عماد اني ماريد اشوفج هيج اريد تتعمق علاقتي بيج دنوش انتي تدرين شنو بالنسبة الي وتعرفيني زين صار سنين وتعرفين اخلاقي دنوش خلي نحجي شوي جديات وانتي سمعيني وفكري بكلامي زين من استشهد ياسر تدرين بعد واحد اخوه وحزام ضهرة ويروح من ايديه شيصير بحاله صراحة ذبيت مسؤولية موتة بيج وبعائلتج كلت اكيد مو من مستواهم ورادو يتخلصون منه
دنوش انت شلون تفكر هيج تفكير
عماد دنوش خليني اكمل اي واحد بمكاني جان لازم يفكر مثل تفكيري وحتى لو مافكر اهلج رادو يتخلصون منه هم انتي وابوج السبب بموتة لان اكيد جانو يستهدفون ابوج بعملية الاغتيال لهذا اتقربت منج حتى انتقم ما انكر هذا الشي واستغليت نقطه ضعفج لان انتي مكسورة وحزينة كلت راح اوصل الغايتي بسهوله شوفي هذا كلامي بي جرءة لان ماكو احد يعترف بهيج شي بس من اتعرفت عليج وبقينا متواصلين عرفت بيج طيبة وحنية ماموجوده شفت اشكد براءة عندج عرفت ليش ياسر جان يعشقج وشوية شوية ماحسيت على نفسي الا واني احبج
دنوش عماد لتكول انت اتحبني
عماد دنوش اني مو بس احبج اني اعشق كل ذرة بيج اني اتحديت نفسي والزمن والضروف وكلت لازم اوصل الدنوش لازم اكون الشخص الي يليق بيج درست واشتغلت وصرت دكتور عماد بس حتى اكون انسان لائق يتقدم ويكول دنوش اني احبج واريدج تصيرين زوجتي وام بيتي وام جهالي
دنوش عماد بس اني مافكر بيك غير اخو ياسر
عماد ميخالف اخو ياسر وافتخر بس ياسر راح يعني ماضي واني حاضر ومستقبل دنوش صدكيني عمرج ما راح تلكين شخص يحبج بكدي ولا شخص يكدر يحتويج ويحتوي حزنج غيري دنوش كلتها واكولها تتزوجيني واذا وافقتي راح اكون اسعد رجل على وجه الكون واذا رفضتي راح اكون اتعس رجل دنوش والله احبج واتمنه ولو شوي مو هواي من حبي الج اتحبيني حتى لو متحبيني على الاقل اتقبليني والايام كفيله اتخليج اتحبيني من اتشوفين اشكد احبج
دنوش عماد انت صدمتني بطلبك عمري ما فكرت بيك ولا بيوم راح افكر
عماد ماريد هسة جواب منج اريدج اتفكرين زين وتتخذين قرارج بدون ضغط
دنوش مادري شجاوب وشنو احجي
عماد كلشي لتحجين هسة صار اشكد ماحاجية وية مريم
دنوش صار اكثر من سنة مشاغل الحياة اخذتها واخذتني وياها
زين دقيقة شوفي شي طلع تليفونة خابر مكالمة فديو حجة وية مريم كاللها مريم وين ياسر ودنوش اريد اشوفهم
دنوش اني انصدمنت شنو ياسر ودنوش كتلة منو
عماد التوئم مال علي ومريم سميتهم ياسر ودانية حتى ابقة اصيح دنوش براحتي هاج شوفي
دنوش شفت اطفال يجننون عيوني بقت بس اتصب دموع شفت مريم حاضنتهم وسلمت علية كالت شوفي دنوش اشكد حلوه كتلها ياسر احلى لان هواي بي شبه من ياسر هو هذا الوجع الحقيقي يعني ياسر ودانية انجمعو سوه من جديد كتلها مريم اريد الزمهم واحظنهم وابوسهم فدوه كالت الله كريم وسدينا التليفون كتلة عماد اريدهم احتاج احضنهم
عماد ان شاء الله تحظنيهم ويجوز يكبرون على ايدج اذا قررتي ترجعين تنتمين العائلتنا وتوافقين على طلبي
دنوش نزلت راسي ماعرف شنو الاحساس الي حسيتة يمكن صحيح اني انتمي الهاي العائله زين ليش هيج كلبي رف من شفت ياسر ودنوش زين هاي الدموع اشبيها متوكف استاذنت من عماد وكمت حسيت نفسي ضايعة حسيت نفسي محتاجة حمودي مو حمودي الخاين لا حمودي الاول صديقي وتوئم روحي طلعت من الكلية طلبت من الحماية ياخذوني للمرسى اول مكان التقيت بي وية احمد وصلت النفس المكان واني شكو قهر بكلبي طلعتة ماشفت غير ساحبة التليفون ودكيت على حمودي اجاني صوتة واني فقدت من البجي
حمودي الووو دنوش
دنوش بس صوت البجي
حمودي دنوش عمري اشبيج شنو الي صاير احجي
دنوش 😭😭😭😭😭
حمودي الخاطر الله احجي اشبيج مو موتيني فدوه العينج
دنوش حمودي محتاجتك راح اموت
حمودي يروحلج فدوه حمودي شكو انتي وين
دنوش مو مهم اني وين بس محتاجتك
حمودي كولي ياعمر وروح حمودي احجيلي اشبيج
دنوش مادري احس كلبي مكسور
حمودي شنو هذا الصوت الي يمج انتي وين دقايق واكون يمج
دنوش ماكول اني وين بس المكان كلة يكلي اني محتاجتك
حمودي احجيلي اشبيج
دنوش 😭😭😭😭😭
حمودي زين بداعتي انتضريني عشر دقايق اني يمج لان احساسي ميكذب اعرف انتي وين هسة جايج انتضريني
دنوش بقيت بمكاني جنت محتاجة حمودي الصديق مو الحبيب الخاين صدك تقرببا ربع ساعة واحس جسمي كلة كام يرجف ماعرف من شنو حسيت حمودي قريب مني التفتت شفتة اي صحيح هذا حمودي يعني صدوك حس وعرف اني وين موجوده رحت شمرت روحي عليه وحضنتة خليت راسي على كتفة كتله حمودي انت هسة حمودي صديقي وتوئم روحي وبس انسة ذاك حمودي الغشاش والخاين اريد حمودي الي عرفته زمان
حمودي اني بخدمتج وباي صفة ترديني المهم انتي اشبيج احجي اسمعج غمضت عيوني واني اتذكر حمودي الي جان محد يفهمني غيره ومحد يستوعب معاناتي مثلة وبديت احجيله عن عرض عماد وعن احساسي من شفت ياسر ودنوش وعن احساسي بانتمائي العائله ياسر حسيت نفسي ارتاحيت من حجيت الي بكلبي
حمودي دنوش ماريدج تتخذين قرار وانتي منكسرة وحزينة لان اكيد قرارج راح يكون غلط ولا تتخذي وانتي بحالة ضعف ولا تفكرين تسوين شي الخاطر شخص معين اهم شي فكري بنفسج اهم شي انتي وبس
دنوش حمودي اني اشكرك ارتاحيت هسة اني راح اروح عفتة ورحت
حمودي جنت اتعامل وية زبون على سيارة ابيعها دك تليفوني شفت دنوش متصلة بية استغربت من اتصالها ومن رديت عليها لكيتها منهاره وبس تبجي وتكلي محتاجتك بس الي حرك كلبي هي محتاجة حمودي القديم الصديق وبس بعد اعرفو شنو احساسي بهاي اللحظة يعني نست حمودي الحبيب الي يعشق تراب الي تمشي علي بس المهم هي بحاجتي سالتها انتي وين مكالت مكانها بس من كالت المكان يذكرني بيك عرفت اكيد اول مكان نلتقي بي هي موجوده رحت عليها وصدك لكيتها بالمرسى حظنتني وخلت راسها على كتفي شلون الطفل من يتعب يخلي راسة على كتف امة او ابوه حتى يرتاح كتلها احجيلي شنو بيج حجتلي كلشي واني النار تسعر بكلبي من عرفت عماد عارض عليها الزواج وشلون استغل موضوع اطفال اخوه التوم ياسر ودنوش واحتياجها الهم اخ منك عماد حسابك ثكل وياية
