الكاتبة الاسدية
طلعنا اني وحمودي حتى يوصلني للسيارة وشفت اخر شخص اتوقع اشوفة وصرخت بصوت بلا وعي مني
يااااااسر 😲 وبقيت بصدمة معقوله بقيت افتح عيني واسدهم اي هذا ياسر اتقرب علية كال دنوش شلونج بقيت بحالة من الذهول كال اشبيج دنوش جاوبت بصوت مهزوز وكوه يطلع ياسر كال ها سلامات دنوش اشبيج يا ياسر اهنا استوعبت الموقف كتلة اعتذر اقصد عماد بس سبحان الخالق من يكولون يخلق من الشبه اربعين يمكن لو توم هم ميكون هلكد شبه بينهم حسيت كلبي وكف السبع سنوات الي مرت علية كلها نمحت ورجعت الاخر ايامي وية ياسر كتلة عماد شوكت رجعت من السفر كال البارحة وصلت بغداد وجنت اعرف اخبارج من مريم واليوم اجيت عليج للكلية حتى اشوفج عرفت ذول الحماية الي وياج وكفت انتضرج يمهم انتي شلونج شخبارج كتلة الحمد لله ماشي حالي انت شخبارك كال على الله زين كال شنو ماتزوجتي اهنا انتبهت دورت بعيوني على حمودي مالكيتة وين راح ياربي كتلة لا ماتزوجت وانت كال مامتزوج انتضر رحمة الله عسى يفرجها علية وتحس بية كتلة الله كريم كال تدرين اجيت علمود اشوفج كتلة تشوفك العافية تحتاج شي كال لا مامحتاج تسلمين راح نتشاوف هواي بالايام الجاية كتلة خير صاير شي كال اي اني كملت دكتوراه واجيت اهنا انطي محاضرات كتلة الله يوفقك كتلة تسمحلي اروح كال الله وياج صعدت بالسيارة واني الدموع وحسيت كلبي راح يوكف اريد اتنفس ماكو ماعرف شنو السبب رجعت للبيت صارت ماما كبالي واني ذبيت روحي بحضنها بقيت بس ابجي اكللها ماما اريد اجر نفس اختنكت وماما ضلت تصرخ ولج ماما دنوش اشبيج يمة شكو اشو وجهج صار ازرك ماحسيت على نفسي الا ماما تذب بوجهي مي وتسمي وتبجي اريد احجي اجاوب ماكو حسيت هاي اخر لحضات حياتي يمكن شريط حياتي كلة مر كدام عيني من يوم شفت ياسر الحد ما مات بين ايدي الى لحضة الي شفت بيها عماد واني حتى النفس ماكو وبديت اغمض عيني واريد افتحها ماكو حسيت على نفسي واني بالمستشفى ومخليلي الاوكسجين وماما وبابا فوك راسي ماما من شافتني فتحت عيوني بقت تبوس بية وتكلي ماما اشبيج بابا يسالني ياروح بابا شكو منو وياج بس كليلي واني ابد ماكدر افتح حلكي واحجي كلمة دخل الدكتور كال الحمد لله على سلامتج شلون صرتي ماكدرت اجاوب كال الدكتور شنو الصاير منو حاجي وياها ماما كالت مادري اجتي من كليتها حضنتني وبجت وراها بقت تريد تتنفس متكدر وهيج صارت كال هاي صاير عدها انهيار عصبي شوي مهدئات وتنام وترتاح وتصير زينة بعدوها عن كل الضغوط والتوتر جانت ماعندي اي ردت فعل ولا اكدر اتحكم باي شي بجسمي ضربوني ابرة بالمغذي وراها نمت كعدت على صوت حمودي يححي يم ماما فتحت عيوني اجاني وكف يم راسي كال دنوش الحمد لله على سلامتج اني سمعت صوته وبس دموعي كامت تنزل كال اشبيج دنوش لتحركين كلبي باوع على ماما كال لتشلعين كلبنا عليج شبيج ياعيني احس بي يلوب بس يريد ياخذني بحضنة ماما كالت والله يا ابني مادري جانت مثل الورد اجتي من الكلية وهي حضنتني وبجت وبعد ماحست انت متعرف شكو اشبيها كاللها لا والله اخر شي وصلتها للسيارة وشافت واحد اسمة ياسر ونست نفسها وياه اني عفتها ورحت كالت ماما ياسر ياياسر هذا انت شتكول اني سمعت هيج يحجون واني بقيت ابجي اكثر اجتي ماما كالت منو ياسر هذا الي هيج سوه بحالج حسيت نفسي انهاريت من جديد ركض حمودي على الدكتور واجوي بسرعة شافني الدكتور كال بعد ممنوع تدخلون يمها خلي ترتاح رجعت نمت حلمت بياسر بس مو ياسر لا عماد اني واكفة على جسر الجسر خشب وبدايتة ماكو ونهايتة ماكو واني بالنص والمي كولش قوي يجري من جوه الجسر على لحظة المي ياخذ الجسر واني وياه اشوف عماد يمد ايده يكلي تعالي انطيني ايدج اني انقذج واني اخاف امد ايدي التفتت شفت احمد من الجهة الثانية وهو يكلي دانية تعالي انطيني ايدج واني بقيت بالنص محتارة المن انطي ايدي والوقت يمر والموج صار كولش عالي والخوف مسيطر علية بقيت محتارة بين الاثنين منو الي ينقذني عماد يكلي انطيني ايدج وحمودي واكف يباوع علية وعيونة كلها خوف وقلق ومد ايده يكلي دنوش غمضي عينج وانطيني ايدج ثقي بية غمضت عيني ومديت ايدي الحمودي حسيت بي نقذني وصلني للجرف وجان تجي وحده اتكلة انت مالتي ليش تنقذها واخذتة وراحت بس بقة هو متمسك بايدي وميقبل يعوفني وهي اتجر بي تريد تاخذه وهو يكلي دنوش لتعوفين ايدي فزيت على صوت احمد لكيتة لازم ايدي ويقرأ قران على راسي حسيت نفسي احسن وتنفسي طبيعي صدق وكال ها عمري شلون صرتي اشرت براسي يعني زينة وخرت الاوكسجين مني ردت اححي مكدرت كال ليش عمري تحركين كلبي عليج والله متت بدمي ليش ياعمر وروح حمودي بالكوه كدرت احجي كتلة مابية شي زينة اريد اروح للبيت طبت ماما شافتني كالت ها ماما موتيني خوف عليج كتلها ماما اريد ارجع للبيت كالت خلي نشوف الدكتور هسة اشوفة حسيت ماما تريد نبقة اني وحمودي وحدنا طلعت اجاني حمودي لزم ايدي كال كومي بالسلامة وعندي حجي وياج كتلة الله كريم واني هم عندي حجي وياك دخلو ماما والدكتور فحص ضغطي والنبض مالتي كال هسة شلون صرتي كتلة الحمد لله زينة بس اريد اطلع كال براحتج بس ديري بالج على حالج ولتفكرين بكلشي انتي انسانة حساسة لتخلين شي ياثر عليج اخذو راحتكم بس مثل ماوصيتكم تستمر على علاجها وبعدوها عن الضغوط طلعت للبيت حمودي كال خالة تحتاجون اروح وياكم كالت لا خالة فدوه العمرك ماقصرت تعبناك ويانة انت بس بالمشاكل نركض عليك كاللها لا خالة تدللين شوكت ما جان احسبيني مثل ابنج ولو الي يشوفج يكول اختي الزغيره كلت اشتغلت اللواكة كال شسوي اداري خبزتي وانتي كعدي راحة وضحك رجعنا للبيت ماما بقت يمي كتلها مابية شي روحي ارتاحي راح انام كالت ماما متريدين تحجين الصار وشبيج هيج صرتي كلتلها ماما باجر نحجي ثاني يوم مارحت للكلية جنت تعبانة سولفت الماما كل الي صار وشلون عماد صاير نسخة ثانية من ياسر وهي كالت هم من يومهم يتشابهون بس انتي مامنتبها عليهم وماما بعد ياسر راح وكلت نسيتي الي صار وعشتي حياتج ليش يا امي هيج تسوين بنفسج اريدج بنتي تكونين قوية والحياة بعدها كدامج اذا انتي من كلشي تنهزين وتنهارين شلون تعيشين وتكملين حياتج ماما اسمعيني زين اني ام يمكن اتكولين علية قاسية ويمكن اتكولين علية اكرهج وماريدلج الخير يا امي بس اريد اكلج كلمة اني من جنت معارضة على ياسر جان عندي اسباب ويمكن اول مره احجيها حتى البيبيتج وابوج ما كلتها اول شي انتي بنتي الوحيده ومن وعيتي على الدنيا ماشفتي بس الدلال وكل الي تريدي يجرالج ومحد بيوم سمعج كلمة وحده مو زينة وعمرنا ما كلنالج لا بيوم حبيتي ياسر اني اول وحده فرحتلج صحيح ماجيتي وكلتيلي بس من سمعت من بيبيتج عنه وشلون فداج بروحة كلت هذا انطي بنتي واني الممنونة لان راح يحافظ عليج وبيوم الي كلتي راح يخطبني الدنيا كلها ما واسعتني من الفرح لان كل ام تتمنة تشوف بتها عروس وية الشخص الي اتحبة ويحبها وتعيش بسعاده بس الي متعرفي من اجتي ام ياسر وخالتة حتى يخطبوج تدرين ام ياسر شنو طلبت مني كلتلها شنو ماما كالت طلبت مني ارفض هذا الزواج كالت هي ياسر جبرها تخطبج وانتي متناسبين ياسر وهو روحة متعلقة بيج وهي اتخاف عليه منج كالت انتي نار وبيدي راح اذب ابني بيها كالت بداعت بنتج وانتي ام ارفضي هذا الزواج اخاف على ابني وماكدر ارفض اني لان مياخذ حجايتي وراح يجبرني اجي واخطب بس اذا صار الرفض منكم بعد ماعنده حجة ويعوفها بقيت مصدومة ماما انتي صدوك تحجين معقولة ام ياسر هيج تسوي زين مو هي اتحبني كالت الشهاده لله اتموت عليج مو بس اتحبج بس هي جانت خايفة على ابنها وكلب الام دليلها وشوفي كل هاي السنين وانتي عبالج اني ماحبج وماريد مصلحتج وسعادتج وماحجيت كلمة كلت ميخالف اهم شي بنتي الي ميشتريها بالذهب ما اشتري بتراب ورغم كل هذا والي سويتة جانت قسمتج اتصيرين اله والله ما تممها ونجمعتو وهسة هم اشوف الفرح بعيونج حسيت كلبج فرحان ومليان ومن شفت احمد كدام عيني وشفت اللهفة ااي بعيونة عليج عرفت شنو سر سعادتج لان محد يحس بيج بكدي واول ما وكعتي البارحة كلت محد يكدر يطلعها من الي هي بي بس احمد اخذت تليفونج واتصلت بي وهو اجاني مثل المجنون خايف عليج وشفتي شلون كلبة نار وماعافج الا من طلعنا حظنت ماما وبقيت ابوس بيها كتلها شكد ما راح اعتذر واسوي قليل بحقج كالت ماريد اعتذار بس اشوفج كدام عيني سعيده تسوه الدنيا كاعدين نسولف اني وماما اجتي الخدامة كالت عمة زملائج بالكلية جايين يشوفوج ماما كالتلها قدمي الضيافة وانتي ماما كومي رتبي نفسج راح اروح استقبلهم الحد متجين كتلها ماما احبج وبستها كالت بسرعة ولتطلعين هيج يخترعون منج وضحكت كتلها ماما تدرين منو قنعني ارجع اكمل كلية كالت منو كلتلها احمد كالت الله يرضى علية رتبت نفسي ونزلت اشوف حمودي وهدى وسامر وسن وسيف وماهر ونبراس كلهم منجمعين وجايين استقبلوني يغنولي سلامتك من الاه سلامتك من الاه وسووها عبالك حفلة مو جايين يزورون مريض اشكد فرحت بيهم كعدنا وسولفنا وراها راحو وصلتهم للحديقة حمودي كلي دنوش راح ينفجر راسي من البارحة لليوم كتلة سلامتك بية ولا بيك كال اسم الله عليج بس اريد اعرف منو هذا ياسر الي من شفتي نسيتيني ونسيتي الدنيا كلها كتلة حمودي مو وقت هذا الحجي بعدين نحجي وهذا مو ياسر هذا اسمة عماد كال انتي ماشفتي نفسج من شفتي ولد دنوش كلبي موتني كتلة حمودي بداعتي خليها هسة كال الله يصبرني بس اخاف اطك واموت ماكدر انتضر كتلة فدوه لتحجي هيج اتحملني ياعمري وراح ثاني يوم رحت للكلية جانو الكل كاعدين بالسنتر بس حمودي ماكو دكيت علية كال جاي بالطريق لتدخلين محاضرة انتضريني بقيت منتضرة واجاني حمودي كعد يمي
حمودي دنوش حتى نوم مانمت صار يومين انتي كلتيلة ياسر وبعدين اتكليلي عماد ومن شفتي نسيتي الدنيا كلها حتى نسيتيني وراها انهاريتي ودخلتي مستشفى شنو القصة
دنوش حمودي هذا عماد اخو ياسر الي جان خطيبي بس من شفتة بعد كل هاي السنين انصدمت لان صاير يشبه ياسر حتى اني ماميزتهم جانت صدمة الي شلون ياسر كدام عيني وشلون مات بين ايدية
حمودي زين واني
دنوش انت شنو حمودي
حمودي هو اني اسالج اني شنو بحياتج رغم حبي ورغم عشقي بعدج تحبين ياسر وتنسيني بلحظات من شفتي اخوه يعني اني لاشيء عندج
دنوش حمودي فدوه لتحجي هيج والله احبك واموت عليك بس قدر ظروفي يعني فجأة الانسان الي حبيتة وقريب نتزوج يموت وبعد سنين اشوفة كدام عيني شتريد يصير بية يعني عادي ما اهتم
حمودي يعني اذا جان ياسر عايش وعافج وبعدين اني طلعت بحياتج من تشوفي كدامج من جديد تعوفيني وترحين عليه
دنوش حمودي انت شتحجي شلون اعوفك انت حبيبي وروحي انت رجعتني للحياة من جديد حمودي والله احبك وماعوفك لو مهما يصير
حمودي دنوش مادري شكول لج حسي بية لج انتي مالتي كل شي بيج ممتلكاتي الخاصة والله لوبيدي اخليج هيج بجام خانة وابقة بس اني اتفرج عليج وضمج عن عيون الناس اني اتنفس وجودج
دنوش واني بس الك اعشق كلامك واعشق وجودك
نحجي اني وحمودي جان اشوف عماد واكف فوك راسنا
عماد صباح الخير دنوش
دنوش صباح النور اهلا عماد
حمودي اعتقد الي يجي يم ناس يكول السلام عليكم
