same mistake <* C >

same mistake-4

မနက်ခင်းကတည်းကစလိုက်သော အစည်းအဝေးသည် နေ့တစ်ဝက်ပင်ကျိုးလုပြီ။ ရှယ်ယာရှင်တွေနှင့် နေ့လည်စာအတူစား၊ ထို့နောက် ဟောင်ကောင်ရောက်တုန်းရောက်ခိုက် ဧည့်ဝတ်ကျေပြွန်ပါရစေဆိုပြီး မြို့၏အထင်ကရနေရာတစ်ချို့ကို လိုက်ပို့ပေးမည်ဟုဆိုလာသည်။ ချန်းယော်လ်လည်း ယဉ်ကျေးမှုအရ ငြင်းပယ်၍မကောင်းပေ ။ သို့နှင့် ဟောင်ကောင်မြို့ကို ခြေဆန့်ဖြစ်သည်။

မြို့ကြီးဖြစ်သည်နှင့်အညီ အ​တော်စည်ကားလှသော ဟောင်ကောင်မြို့ဖြစ်သည်။ ခေါက်ဆွဲသည်က ချန်းယော်လ်တို့ကိုးရီးယားနှင့်မတူပဲ ကွဲပြားစွာဖြင့် အရသာတစ်မျိုးထူးကဲ၏။

အစားအသောက်ကောင်းများစားရသည်ဖြစ်စေ၊ နေရာကောင်းများရောက်သည်ဖြစ်စေ၊ ကောင်းမွန်သည့်အရာများခံစားသိရှိနေရလျှင် ချစ်ခင်မြတ်နိူးရသူကိုပါ သတိရနေတတ်သည်ဟူသောအဆိုကို
ချန်းယော်လ် လက်ခံမိလိုက်၏ ။ ရှုခင်းကောင်းတစ်ချို့၊ ပုံစံလှလှအစားအသောက် တစ်ချို့ကို ဖုန်းဖြင့်ရိုက်ယူထားလိုက်သည်။

နောက်များ အလုပ်တွေအားလပ်မှ ကောင်လေးနှင့်အတူ ခရီးထွက်လာပါဦးမည်။

" Thank You Mr.Yang , see you tomorrow"

နေရာစုံလိုက်ပို့ရုံမက ဟိုတယ်ကိုလည်း ပြန်ပို့ပေးကြသဖြင့် ချန်းယော်လ်မှာ အားနာသမှုနဲ့ထပ်ပြီးကျေးဇူးတင်ရပြန်သည်။ ဤသို့ဖြင့် ဟိုတယ်ပြန်ရောက်ချိန်သည် ညအချိန်ပင်ဖြစ်သွားတော့၏။

တစ်နေကုန်လှုပ်ရှားသွားလာထားသည်မို့ အခန်းပြန်ရောက်သည်နှင့် ချန်းယော်လ် ဆိုဖာပေါ်မှာ ခဏအနားယူလိုက်သည်။ အိမ်မှာဆိုလျှင်တော့ ကောင်လေးယူလာပေးမည့် အရသာရှိရှိအအေးတစ်ခွက်က ချန်းယော်လ်ကို အမောပြေစေဦးမှာအမှန်။ ထို့နောက် အိပ်ပျော်သွားမှာစိုးသဖြင့် ခပ်သွက်သွက်ပင် ရေမိုးချိုးလိုက်သည်။ တစ်နေ့တာအတွက် မည်မျှပင်ပန်းနေပါစေ အလိုက်တသင့် အနားရှိပေးမည့်သူက အဝေးမှာပေ။ ဒီတော့ ကိုယ်တိုင်သာ အသိကပ်ရသည်။

' ဟူး ပင်ပန်းလိုက်တာ '

ဖုန်းကိုယူလိုက်၍ Galleryထဲကသူ့ပုံလေးမြင်မှ ပင်ပန်းတာပြေသွားသလိုပေ။