مشى جوا لزينب لقاها منهارة شديد وعبد الرحمن جنبها والاثنين ببكو ما كان قادر يهدي واحد فيهم لأنو هو كمان الفيهو مكفيهو الغواص جاء خاشي ومعاهو زول
-انت مشيت وين انا من قبيل بفتش فيك
ما كان برد ليهو
-عبدالباقي دا أنس ضابط معي في الشرطة ومن الليله حايكون مسؤول عن حمايتكم انت وزينب عشان ما تحصل ليكم حاجه
-تاني ما مهم البحصل لي بس خليك مع زينب ما عايز أخسرها
وطلع وهو متحبط شديد مشى قعد في الحديقة ما كان في راسو أي فكرة حيحصل شنو لقدام ولا هو حيعمل شنو بعد موت ياسر أعز زول ليهو كان بفكر في كلام المرة الجات اتكلمت معاهو لعنة شيطان؟جدي مذنب؟انا السبب؟وهو بفكر في الكلمات دي وهي بتتردد عليهو كتير
فجأه قال لنفسو أنا لازم أعرف جدي عمل شنو وخلا الحاجات دي كلها تحصل معانا عمل شنو لما بقى يقتلنا واحد ورا التاني وهو بتذكر عمل حاجه وبسببي أنا؟الكلام دا لما كان جدي عايش يعني لما كنت أنا صغير طيب لما انت كنت صغير حصل شنو وبقى يتذكر في طفولتو مع جدو لكن ما اتذكر حاجه بتلفت النظر وممكن تفيدو كان بجيهو طشاش طشاش لما يحاول يتذكر كتييير تاني وقف التفكير ودخل جوه البيت وهو بتذكر في ياسر
-Ilove you dad
-أحبك أبي
ولما يبكي لأنو هو بصرخ فيهو عشان بتكلم انجليزي وبقول ليهو الا تتكلم سوداني وبتذكر كلامو
-اتكلم انجليزي أسباني فرنسي الإنت عايزو انا مت بسألك بس ارجع حبيبي أرجع ياااااااااااسر
ورجع تاني يبكي ويبكي
الغواص جاء على صوت بكاهو ربت على كتفو
- انت مفروض تصبر عشان زينب عشان حالتها ما تسوء أكتر
وهو ببكي ودموعو جارية
-الغواص أنا تعبت خلاص البحصل دا كلو فوق طاقتي وانا ما بقدر استحمل فوق طاقتي والله ما بقدر
-دي كلها امتحانات من الله انت اصبر وان شاء الله بتتحلى
-ونعم بالله
قعد يتكلم مع الغواص مسافة طويلة بعدين مشى شاف زينب مع انو كان متردد يمشي يشوفها لكن اتشجع ومشى لقاها زي ما هي في صدمتها
-زينب انا ما عايزك تزعلي وتتضايقي عايزك تقومي تدعي ليهو ياسر محتاج دعواتنا
وهي بتصرخ
-ليه الا ياسر ليه الا حبيبي وقطعة مني ليه بس دا اخدو أي شي أخدو الا هو بس خلوهو لي انا ما بقدر أعيش من دونو يااااااسر
هو مسكها وبقى يبكي معاها لمسافة طويلة يمكن بكاهم مع بعض هو الخلاهم يرتاحو شوية بعدين عبد الباقي خلاها وطلع ماشي في الحديقة كان عايز يشوف علم لأنو من اليوم الخش فيهو المخزن ما طلع ولا حتى هو عارف عنو حاجه أثناء وهو ماشي شاف أنس واقف بعيد ومديهو ظهرو كان واقف في مسافة بعيدة شديد من عبدالباقي لكن هو عرفو بقى مراقبو أنس اتلفت على عبدالباقي لكن ما كان شايفو وطلع سكينة من جيبو بتاع البنطلون ودي ياها نفس سكينة الشبح البقتل بيها ضحاياهو نفس حجمها وصغرها نفس لمعتها الفضية الظاهرة من بعيد نفس حدتها كان ماسكها في يدو وبعاين ليها بطريقة شريرة فجأه بقى يضحك هههههههههه وشال السكينة ودخلها في جيبو ودخل البيت
عبدالباقي بقى شاكي فيهو أنس؟ياهو الضابط الجابو الغواص وقال يحمي زينب اي ياهو وشايل نفس السكينة ياها سكينة القاتل يعني هو...؟معقوله؟انا لازم اتأكد
مشى وهو قاصد المخزن لقاهو مقفول بقى يدق في الباب ومافي زول بفتح ليهو ودق مسافة طويلة في النهاية علم جاء فتح الباب وهو بدعك في عيونو
- في شنو يعني انت بتحب تزعج الناس كدا؟
-كنت عايز أشوفك
-تشوفني؟هه يعني عشان تعرف انا حاطلع متين كأنو بيت ايجار وانا ما دفعت وعايز تطردني
- لا انت فهنتني غلط
- طيب طيب أطلع انا عايز أكفي باقي نومي
علم اتلفت وهو ماشي عبدالباقي شاف مكتوب في ظهرو
- you can not challenge me
-أنت لا تستطيع أن تتحداني
وقف علم
-دقيقه
- في شنو
-أمشي مافي شي
-بسم الله ناس غريبه
وهو ماشي اتلفت لكن المره دي عبد الباقي ما شاف نفس الجملة
مشى من علم وهو بفكر معقوله أكون شفت الجملة دي مرتين في ظهر علم وأكون متخيل؟مستحيل معناها الشبح قريب من علم يا اما عندو بيهو أي علاقة وهو من اليوم القعد فيهو في المخزن ما طلع منو ومع انو المخزن كلو وساخة وظلام هو رضى يقعد فيهو وكمان من غير ما يشتكي ولا يقول حاجه وأسي هو نايم فيهو عادي
