"اصلا هم كيف يشكو في بعض والبيناتهم كبير زينب مستحيل تفكر انو عبدالباقي ممكن يكون الشبح لأنو حبيبها وراجلها وأبو ولدها مستحيل تفكر فيهو غلط وهو نفس الشي البنت الحباها وبقى شايف فيها كل الجمال الفي الدنيا مستحيل يفكر انو هي ممكن تكون الشبح"
الهدف الوحيد بقى الغواص
عبدالباقي كان بفكر كيف يمسكو متلبس لأنو خلاص اتأكد انو هو الغواص لكن ما عارف يعمل شنو وما عايز يغلط ويقتلو زي ما قتل عبد الرحمن وبعدين يطلع دا كلو وهم منو
كان قاعد بفكر فجأة جاتو زينب
-الغواص هو الشبح لازم نتخلص منو نحنا
-زينب انا عارف انو هو الشبح لكن خايف أغلط زي ما غلطت مع عبدالرحمن
-تغلط كيف يعني وأصلا مافي غيرنا الا انا والغواص لو ما بقى الغواص الشبح معناها أنا دا لو انت شاكي فيني
-زينب كيف يعني تقولي كدا انا مستحيل أشك فيك أصلا مافي غير الغواص وانا كنت شاكي فيهو من اليوم الشال مني فيهو الخاتم و بعدين الخاتم ضاع ولقيتو في غرفة عبدالرحمن
-أصلا هو ختاهو في غرفة عبدالرحمن عشان يخليك تفتكر انو عبدالرحمن هو الشبح وانت تقتلتو وبالفعل انت عملت زي ما هو فكر وأنا اليوم داك شفتو لما خت الخاتم في غرفة الغواص
-شفتيهو؟طيب ليه ما كلمتيني؟
- انا كنت عايزة أكلمك لكن هو هددني اني لو كلمتك هو حيقتلك ويقتلني وانا ما كنت خايفة على نفسي خفت عليك انت عشان كدا ما جيت كلمتك بعدين قلت انك لو عرفت حتعمل الذنب فيني عشان كدا جيت أكلمك لكن لقيتك قتلتو
-دا كلو حصل يعني؟طيب يعني الغواص هو الشبح؟
ضرب يدو في التربيزه قوي
-ياريت لو عرفت من البداية ما كان الناس البريئه دي كلها ماتت كان وقفتو في حدو كان قتلتو وارتحنا منو يعني هو القتل ياسر ولدنا؟يعني هو؟
-اي هو القتل ياسر حبيب قلبنا سلبو مننا وضيع ليهو شبابو وعذبو وقتل الناس دي كلها نحنا لازم نقتلو
- أنا حخلي يتمنى الموت وما يلقاهو
عبدالباقي قام زهجان وطلع برة وعروق يدو ظاهره من الغضب الفيهو وعد نفسو انو ما حيرحمو كان شايل ليهو كل الغضب والحقد والحسد الجواهو
زينب كانت ماشة وراهو ومترقبة البركان الحينفجر بعد شوية عبد الباقي طلع من البيت ومشى على الحديقة وبقى ينادي عليهو بغضب
-غواااااص أطلع يا جبااااااان يا حقيييير اطلع نحنا ورانا حساب كتير لازم نتحاسبو أطلع سريع عشان نصفي الحسابات دي كلها
ما كان في زول برد بس كان في نسمة هواء باردة فجأه جات في الحديقة الأشجار بقت تتحرك والباب الحديدي بقتح وبقفل ودي علامات الشبح.
عبد الباقي اتأكد في اللحظة دي انو الغواص هو الشبح وانو عايز يظهر أخيرا على وشو الحقيقي كان مترقبو ومنتظرو كان ماسك يدينو والغضب ظاهر في وشو وكأنو بتطلع من عيونو شرارة
فجأه ظهر قدام الأشجار جثة جثة بتاعة أنسان ظاهرة من بعيد أي واحد بقى يعاين للتاني واتمنو انو دي ما اتكون جثة
عبد الباقي وزينب جرو على الأشجار والجثة الشافوها طلعت جثة الغواص وملابسو الفاخمة اللابسها كلها مقطعة ومليانة دم ومكتوب في ظهرو جملة الشبح المشهورة
- you can not challenge me
-أنت لا تستطيع أن تتحداني
الغواص الكانو شاكين فيهو وفكرو انو هو الشبح أسي الشبح قتلو يمكن يكون طلع من ورطة كبيرة لأنو عبد الباقي ما كان حايريحو كان حيعمل ليهو أكتر مما الشبح عمل ليهو
-ش ش نو؟يعني الشبح قتل الغواص؟الغواص طلع ما الشبح ك ك ك يف؟
-كيف الغواص يطلع ما الشبح طيب الشبح منو؟
عبدالباقي قعد في الأرض وبقى ماسك راسو ما عارف يعمل شنو
-حتى الغواص يطلع ما الشبح طيب الشبح منو؟
ما كان في غير زينب وعبد الباقي هو كان بعاين ليها بكل حذر ودقة لأنو ما فضل غيرها هي الزول ممكن يشك فيهو حتى الحب البحبو ليها عبدالباقي في الأوقات دي هو ما حايفكر فيهو بس حايفكر في الشبح وفي الانتقام
