تنفسي سريع جسمي اختض بلرجفه حسيت نفسي راح انصرع لان شفت مره اختي الزغيره من صعدت حرارتها شلون صرعت عبالي صرت مثلها
ضليت ابلع ريك ريجي ناشف نمت اتغطى رغم الهوه حلو فوك بس ما احس بشي من شفته
عده شي والله عده شي خيال جان يمه منو يصدكج لو حجيتي خاف انه متوهمه خاف طفر يردون شي
لا شنو يردون شي هاي ما عدها احد مو كالوا عنها مرت الشهيد ما عدها احد هاي هيه ربطت السالفه عندي
حسيت باشمئزاز منه ما اضل وياه بس خل يطلع الصبح اروح لاهلي ضليت اتكلب شوي وكتمت النفس مالي واني سمعته يرجع يطفر على سطحنه ونام على فراشه وكأن ما مسوي شي
دموعي تهل عليه شبيه انه شبيه وتطفر على النسوان
ثاني يوم الصبح كعد وصبح وعادي عده اجيت انزل من الدرج حسيت بدوخه ولعبان نفس على ما وصلت اخر بايه طحت ما ادري بروحي بعد وين صرت شلون وصلت وانه بلمستوصف كاعده وهو وعمي فوك راسي
فتحت عيوني
عمي كبالي هاا بويه كعدتي
ااه اه ضليت اون وابلع ريك
صاحوا على الممرضه
اجت باوعت عليها
لا تخافون عليها بس يخلص المغذي نطلعها ما بيها شي غير العافيه بس تطلع التحاليل تروحون للدكتور تشوفون شنو يكول
باوعت عليهم وعمي يكل لياسر يالله كوم مرتك يالله خلي نمشي
الممرضه ساعدتني وهيه تشيل الكانونه من ايدي خله ايده وره ظهري
شعور غريب كره حقد مرض شنو البيه ما اعرف ساعتها
طلعنه نمشي وره عمي وياسر من صفحتي عود لازمني وبدي اكطع ايده
وصلنه للغرفه عمي دخل كبلنه جان الدكتور فارغ محد عليه بس احنه كله هاا دكتور بشر شنو بيها بتنه
باوع عليه انتي من يمتى تجي الج هاي الحاله يعني تدوخين وتوكعين جي ما تأكلين شنو الحصار على البلد كله درينه بس مو مره حامل معناها ما تأكلين
ياسر انه عمي كلنه نفس الصدمه طلعت منه حامل حامل يالله كال حامل فرحتي نستني كلشي خيانه كرهي حقدي عليهم حتى مشاعل لو اشوفها كبالي هسه اروح ابوسها
عمي رد عليه حامل .. اني انشك حلكي من الابتسامه الي ابتسمتها
الدكتور .. اي حامل وعليها شهرين وعدها فقر دم وسوء تغذيه صح البلد عليه حصار مو معناها تعوفوها بلا اكل حاول قدر الامكان توفر الها تغذيه حتى تكوم على حيلها
انشالله انشالله دكتور ..ياسر بصفي حسيت بي مصدوم ما باوع الي ولا حجه وي الدكتور شي طلعنه للبيت وعمي بلطريق تسوك رغم اكو حصار بس عمي عنده خير وعمتي ذهبها خذوا الحزب بحجه الحصار ويرجعونه على اساس مساعده للدوله اعتبار هاي المهم مو هاي سالفتنه
وصلنه للبيت وعمي يوصي بيه وديرن بالجن البت حامل وياسر لحد الان ماكو لا كلمه
قله الوعي العندي نستني انو شفته شفته بهاي عيني يطفر عليهم وراح بصف بيتونتهم بس نسيت وتذكرت كلمه فاطمه هسه يصير عدكم جهال وراح ينعدل واحتمال جبير اذا صاروا جهال بعد ما يروح الها خلي لا اطلك ولا اكل لابوي عليمن اضل بيت رجلي احسن
