اضغط على النجمه 😍
بس اسمع صوته واستحي اطلع من اسمع صوته
وبيوم انه كاعده اغسل بلحصيره واشوف واحد فوك راسي جرني من شعري وسطرني بلكاع وهو يصيح عليه
التفت عليه واحاول افك شعري من ايده وهو يجر بيه منا ويودي بيه منا صرخت وهو يصيح طكيتها طكيتها
هي وخررر ابن الجلب
غلطه عفويه طلعت مني بألم بدون ما احس ولا اقصد بيها شي
طلعت عمتي وهيه تصيح يااا هاي عليمن ابن الجلب
وتجر بي
وهو ما يفك مني
ضليت ابجي
صاحت ما تستحين هو مو بعقله وانتي تغلطين هيج غلط صدك بلا تربيه
كمت على حيلي واحاول اجر بملابسي واشهك بلبجي
عمه اذاني جر شعري جر والله ما اقصد اغلط عليه
سكتي يالله سكتي تحاول تغطي عيبها بلا مستحه حاطه عقلها وي واحد مو بعقله
مسحت دموعي اخذت ابنها وراحت
واني اشتغل بحركه ومقهوره على نفسي شلون غلطت حاسه بذنب مسويه
اجه عمي وتلكته عمتي من الباب وتبسبس وياه ما ادري شنو انه جنت بلمطبخ وي حماتي ومره حماي اشتغل وياهن دخل علينه
الكوه يبه
الله يساعدك .. كلنه حجينه سوه
هلا بيجن هلا بويه بويه بسهن تعاي عندي حجي وياج
طلع من المطبخ مرت حماي كالت ياااا هاي شوف شنووو وزته عمتي عليج الله يستر منها
طلعت وارجف خايفه اول مره اتواجه وي عمي هنوب غالطه عليه هسه اكيد عمتي كالت اله غلطت بن الجلب
رحت للهول ماكو صاحت عمتي بغرفتج تعاي
طلعت بغرفتها
شفتها كاعده وهو على الجربايه
كعدي بويه. تعاي هنا كعدت كباله بلكاع
شلونج بويه شلون وضعج
الحمدلله عمي بخير اذا انته بخير
عساج بلخير بويه عساج بلخير انشالله مرتاحه خو محد مضوجج
لا عمو التفتت على عمتي تخزر بيه وتدنك ما عاجبها
كال
بويه رضا لا تدنين يمه ولا مشاعل ترى ذوله مو بعقلهم يعني شلون اوصلها الج يعني خطيه خوانج مرضى بحسبه اخوتج هذول
عمو ما اتدنيت الهم والله حتى مشاعل ما اعرفها ولا شايفتها
ادري عمو اعرف مشاعل هسه بيت خالها موديها بس خاف تجي هنا عفيه الي اريد منج لا تحطين عقلج بعقلها ترى مو شي عقلها وحتى رضا ترى عقله على كده اعرف اليوم يحاول يطكج وانتي تغلطين عليه عيب وتطكينه
والله عمو ما طكيته ..دنكت للكاع بس غلطت لان جرني من شعري وهلس شعري وسطر راسي بلكاع هاي عمتي اسألها بلكوه فكتني منه
اعرف اعرف سولفت الي عمتج
.. هيه باوعت عليه دار عليها وكأن يكلها انتي ما كلتي هيج
طلع وهو يوصي بيه على بته الي اصلآ ما اعرفها ولا شايفتها وابنه هذا الخبل لزمني موتني وهو على غلطه كاعد يحاسب تهي بهي
صدك انقهرت يعني هسه شلون حالتي راح اكعد بين ناس مخابيل هنوب ضليت اخاف اطلع عروس بعدني اسبوع توني يالله
