شنو رايحه لاهلج
اي
شبيج
ما بيه شي ..نترت
ومرض صوتج لا يعلى
سكتت عنه كملت ملابسي ولبست عبايتي لزمت اليده مال الباب اريد اطلع لزم ايدي وجرني
انتي رايحه حركات منا منا ما اريد رجلي هيج ديري بالج اسمع شي منا منا افني عمرج فهمتي .
خزرته ونصيت هد ايدي رايحه اشوف اهلي ما رايحه اسوي مشاكل
طلعت بسرعه من الباب عمي واكف ينتظرني باب غرفتهم
هاا عمي كملتي
اي عمو
يالله بويه امشينه
مديت راسي من باب الغرفه نجيه ومشاعل وابتسام كاعدات كلت ..
مع السلامه
الله وياج .. كالن كلهن سوا
عمتي صاحت سلمي على اهلج
الله يسلمج يوصل
طلعت وبيدي الجنطه البيها المهمات ومخطط براسي انوا ما ابقى وياه بعد بس اوصل اسولف لاهلي على معاملتهم وياي واكطع العلاقه وياهم بطلاكي من ابنهم
الطريق كله متجيه على الجامه وعمي يمي صاعدين بلباص وتمشي اكوا مره كاعده كبالي عيني كل شوي وتروح عليها الكها تباوع الي
وصلنه وانه ما ادري اله صوت عمي الي نبه عليه وهو يصيح يابه نازل نازل
صاح عليه السايق اي عمي بس خل اطبك وكفت السيارة ونزل عمي وهميت انزل
المره الجانت كاعده مقابيلي كالت خاله تمشي هنا بعد لو هذا حدك
ما اعرف شنو رد عليها لان نزلت بس تفأجئت شفتها وراي
تمشي وعمي كدامي خطواتها اسرعت بحيث صارت تمشي بصفي
انتي حبلى
درت عليها متفأجاة تحجي وياي
اي خاله حامل
الله ينولج مرادج
ما فهمت كلامها سكتت ومشيت وهيه بصفي تتقرب كلش التفت عمي شافها ودار يمشي
البطنج بنيه وبكصتج مهرين انتي وهاي بتج سميها زينب
هااا فكيت حلكي هاي شجاي تحجي
لا تخافين ترى جاي احجي الي راح يصير الج حياتج تعب بتعب ما راح تلكين راحه وموت الاعزاز يفت الكلب فت
كلامها خلاني بصدمه وحبيت اعرف اكثر واكثر بدي تحجي وشنو قصدها بموت الاعزاز خاله اي والله حياتي كلها ضيم شنو خاله انتي كشافه كلت هيج لان مره من تمرض رجل رسل امي ورسل جابن وحده وكعدت تفتح قرآن وتذب ورسل كالت عنها هاي كشافه وكلامها تقربيآ نفس كلام هذيج بس الفرق هاي ما بيدها قرآن ولا طلبت فلوس
عمي جان يمشي بهدوء لان حامل ويخاف امشي حيل ما ضل شي ونوصل بس فرعين وحبيت تسولف اكثر وما بدي حتى اوصل ويخلص الطريق
جان تكول
ههههه والله ياخاله مو هيج بس الشخص اعرفه من عيونه وعيونج حجت ومن شفت الي بطنج وشفت التعب الي راح تمرون بي كلت احجي الج وطريقي منا وصلت انه يالله فيمالله مع السلامه وتحرسج السيدة زينب
راحت وجسمي كله تعب بدي اكعد رجفه سرت بيه وعمي دار بعد ان ابتعدت خطواتها كال هاي منو تعرفيها بويه
لا والله المره نزلت من الباص .. ما ادري شبيه
شجانت تحجي
تكلي بطنج بنيه
كلشي يجي من الله هلا بي وهيه شعرفها
والله ما ادري بس يمكن بطني بنيه صدك
بويه خالقين ايد رجل بنت لو ولد اهم شي تمام الخلقه
اي والله احب البنات انه بس ردت ولد لان ما صار عدنه اخو
هههه جاا الابن مثل الاخو .. ما كمل كلامه بشوفت عمي ابو علي عم رسل
شفناه كبالنه سلم عليه التفت شافني مد بوزه بس كال هاا شلونج
الحمدلله مشيت عمي كلي روحي بويه جاي وراج
وصلت دكيت الباب
صوت فطم
منو
انه
منو انته
شبيج انه بسهن
يااا بسهن
اسمع ركضتها فتحت الباب دخلت رادت تسده وتسلم بوستها واني اكلها لا تسدينه عمي جاي جاي يسلم على عمي ابو علي
هاا ولج شلونج هاي شصاير بطنج
اي كبرت
طلعت رسل هاي منو بسهن فدوه والله تونه بسيرتج
هلا بيج شلونجن والله مشتاقه الجن ولسوالفجن
بخير اذا انتي بخير ردت رسل
دخلت واجاني صوت امي منو اجه
فاطمه.. يمه بسهن وعمي جاي وراها
اجت تركض بوستني شلونج يمه
الحمدلله يمه شخباركم
بخير يمه لا يضل بالج اهم شي انتي وضعج ابنج شلونج
ههه الحمدلله ولوو شاكه البطني مو ولد بنيه على كلام هاي المره
يا مره ..كالت امي متفأجاه
مره توني شفتها وعبالك تكشف نفس هاي الي جبتنها
