ابوي اسمع صوته رج البيت اطلللع ولككك شنووو داخل وياك على طمع انه انه تكلي اسجل باسمها مزرعه شعبالك بتي طماعه لو تقبل بيك بعد كووووم اطلع
خويه على كيفك خل نتفاهم انطيني مجال
عمي رايد مرتي خلص اعتبرها غلطه يعني محد معصوم ترى
اكلك معصوم ما معصوم اطلع تكلي اسجل والله لو ما ابوك جان طلعتك سحل هسه
استمرت مناوشات عمي وابوي وياسر بفشل تام وطلعوا من البيت خايبين ودخل ابوي فاير ومحترك دمه وهو يصيح والله ما ارجعها اله لو يبوووس القنادر
مشت الايام وعمي يروح ويرجع ياسر بعد ما اجه ابدد
امي متأثره بيه ومنا سالفه رسل وسفرها للخارج خلاها الليل ما تنامه الى ان شكل بيها سكر
بيومها من طاحت اذكر شنو صار بينه واحنه نشوفها ترعش بلكاع شفافها انكلبت بيض وعيونها كلبتهن وفاطمه تدك وتلطم راحت امي وانه ابجي وحايره بخواتي سمعت كاظم دخل يالله
وفاطمه تصيح بسرعه امي راح تموت
طلعت وهيه توصي بيه وعيونها حمرر
الجهال والبنات عينج عليهن
اخذتهم جوه ادخل بيهم واهدي بخواتي الي فرفحن على امي وبجيهن وصريخهن ما سكتن الى ان طلعت جيس حلويات جايبه ابوي وانطيته الهن
خوفي على امي خله وجع بطني حسيت راح اموت من الالم ضليت اروح منا واجي منا وابجي لان بحدي وكلشي ما اعرف هنوب البنات وجهال فطم شافوني ابجي كعدوا يبجون وياي واني ما اعرف شنو او شلون اتصرف
سمعت الباب اندك اشرت بيدي لاختي تروح تفتحه راحت اجت تصيح بابا
شافني وكأن اجه المنقذ الي هااا يبا شبيج
بطني يبه راح اموت
كومي كومي صدك جذب كاعدن بلكاع
امج وين فاطمه فاطمه
اخخخ راحن اخ راحن يبه امي اخذها كاظم للمستشفى
شبييها
ما ادري شفايفها صارن بيض
هسه شلون تحملي بويه شوي بس اصيح بت عمج
راح يركض شوي ورجع جايب بت عمي ندى واجه
كالت كومي خل عمي ياخذج انه اضل يم الجهال
لا شووي الالم راح
ببويه كومي
ما اريد يبه انته روح شوف امي
حسيت شوي الوجع راح ضليت اتنفس سريع التفت على بت عمي عفيه فرشي الي بسرعه خل انام شوي ارتاح
ابوي طلع بسرعه اخذ يوصي بت عمي علينه
نمت بعد ما فرشت الي
ضليت اتكلب رجع عليه الوجع بالي كله يم امي مو يم الوجع ولا شي خاف يصير بيها شي شنو يصير بينه
شوي وندكت الباب طفرت بت عمي دخل ابوي وكاظم وفطم وامي خطيه وجها اصفر اجيت اكوم رجعت حسيت نفسي الالم اخذني من صفحه وحده اتمددت امي رغم مرضها كالت هاا شبيج يمه
فاطمه شبيج بسهن
مابيه شي يمه شلون صرتي احجي كوه
الحمدلله شوي احسن فرشت الها فاطمه وكاظم راح يوصل اخته ورجع
كال ابوي اخذج يبه
لا يبه
ما تحجي بتك شبيها امي تجر بلكلمه جر
والله ما ادري اجيت لكيتها تصرخ والبنات يمها تبجي
كالت بطني
فاطمه.. يااا بس لاعندج ولاده
لا بعدني توني سابع
اي يصير بلسابع موو يمه
اسم الله هنوب سبيعي يصير هلكده لا يمه بعدج
انتي شنو بيج فاطمه شكال الدكتور
بيها سكر
شنو سكر
هبوط صاير عدها بلسكر وكال الدكتور خلوا بالكم منها لان ما مستقر
يمه تعوفج مني انتي منين توجعج بطنج
كلها
ييااا خاف صدك هاي ولاده
ابوي...ناخذها
فاطمه..واحنه اليوم نضل ناخذ هذا نرجع هذاههه
يعني شنو هسه تضل
هسه شوي اصير احسن عوفوني انام واصير زينه
جاا يمه روحي نامي بلغرفه لو الديوانيه بيها هوى بروده احسن منا
كمت وفاطمه لحكتني بفراشي بسرعه فرشت تمددت ونمت
بين نايمه وكاعده حلمت كأن شخص هو اشوفه انه كاعده اباوع بس احس نفسي مغمضه عيوني كال وخري ايدج
مد ايده على بطني فزيت فتحت عيوني عركانه وخايفه رجعت خليت راسي على المخده رجعت شفنه نفسه الشخص الي اشوفه بس وجهه
فزيت بسرعه فتحت عيوني ومنعت نفسي ارجع اغمض حتى ما اخاف
ضليت ابجي بسكوت خايفه من شنو ما اعرف رغم هيئه الشخص الي شفته كلها نور ما تخوف بس خفت حيل
مديت ايدي على بطني ماكو وجع
كمت على حيلي
رحت للغرفه لكيت الكل مجتمع باوعت عليه فاطمه دخيلك ربي عفتج نايمه منو كعدج
هههه كعدت ما اريد انام
شلون صرتي يمه
الحمدلله
هااا مو كتلج بتج خايفه عليج وصار بيها هيج اكلت هبطه منج
اي والله ابوي كال
اسم الله عليج يمه لا تخافين يمه ما بيه شي
انشالله يمه
امي كعدت على حيلها جانت متمدده كالت لابوي ماكو خبر عن رسل
لا والله لحد الان ماكو كلشي ماكو اي خبر ما سمعت حتى رحت لاهله عود بلكي سامعين شي هم كالوا علمنه علمك ماكو
