بدت معانتي وياهم بعد موت رضا حيل تعبت يعني ثوبات وناس رايحه. وراده وياسر وطلبته وعمتي وانه الخدامه الي غصب عنها تسوي كلشي وهيه ممنونه
سواء حجيت او ما حجيت لا يقدم ولا يأخر
ضليت ساكته ومتهاونه عن كلشي بس غصه بكلبي تضل لمن اكعد بليل وما الكه يمي او احس بي من يطفر عليهم
ساعات ابجي واندب حظي شيسوي وياها اتخيلها شلون وياه واسكت بدون رده فعل
خلصت الثوبات وصلنه لاربعينه رضا كلها راحت وانه ضليت يم خواتي اخذني ياسر لان حامل عمي كله طريق بعيد خاف ما تتحمل ضليت بلبيت وصلت لاهلي امي وابوي راحوا وياهم بس انه وي خواتي اجت رسل وفطم وزهره من سمعن بيه واجت الفرصه لحد عندي حتى اسأل عن سفرها وشنو السبب
وجاوبت .. علي يكول نطلع منا للاردن ومناك نطلب لجوء احسن ما نضل بلعراق وبلكي والله
فطم جان ما عاجبها السفر وسالفته وردت على رسل بغيض وانتي شلون ينطيج كلبج تعوفين اهلج وترحين
ليش انه منو كلج عايفتكم راح اتصل عليكم بين فتره وفتره واحتمال جبير اجي اذا تحسن الوضع بس خلي نطلع منا عاد نشوف الدنيا والله فد متحمسه
زهره..الله خيعونج والله علاوه حتى انه كلت لرجلي بس ما قبل
فطم.. انه بلنسبه لكاظم طلعه من البصره ما يطلع مو بس هو حتى انه البصره ما ابعد عنها هو اروح منا لكربلا ليكول رايحه غير دوله مو هنوب اطلع من العراق
جاوبت فطم ترى حلو واحد يسافر ويشوف الناس والدنيا يعني يضل بيته متحسر ويشوف الناس تطلع وتطب
ردت فطم .. جاي احجي عن نفسي بسهن مو قصدي على الناس وبعدين والله بدي كلها بخير شعليه من احد بس اكول شلون رسل تتحمل تبعد عنا
رسل.. هاي تروح تروح وترد عليه وشلون تعوفينه وتسافرين لو تدرين شكد اجت تريد بس تقنعني اضل ما ادري عدها شي مضيعته يمي مدري تغار
اغار انعم الله عليج على شنو اغار والله مو قصه غيره بس مقهوره لان رجلج كال اذا رحنه ما نرجع بعد يعني شلون ينطيني كلبي ما اشوفج
ليكول هسه انتي كاتله روحج عليه ههههه
ولج انتي حقيره لو شكد ما اسوي اطلع مو زينه
.. تقربت رسل شبكت فطم وهيه تبوسها انتي رغم ازغر مني بس والله طيبه كلبج ما شفت احد بهاي الطيبه مقهوره والله ادري بيج واعرف لان حتى امي ما سوت الي انتي سويتي كاعدن تبجين عبالج ما تدري مجرد سمعتي راح اسافر يروحي انتي .. كلام رسل وهيه تحظن فطم خلانه نبجي ونشهك وزهره خوو خلتنه نشبع ضحك بعد دموع وموقف جدآ حزين رفعت اديها وهيه تمسح بخشمها وتصيح هسه من وراجن خشمي ضل يصب الله لا يطيجن ضلينه نضحك ورسل تكلها دخلي اسافر والله ادز الج كله من هاي المحارم درازن درازن هيج وهيه تضب على ايدها
ضليت يومين بموقف ضحك واحنه نذكر ايام الطفوله وخواتي الثنين اغلب الوكت يم فطم وره على ما اجو من الاربعين واجه ياسر اخذني
