منى الطيف
سمعت الصوت شنو هاي ويامن يحجي
ضحك عالي وصوته وهو يسولف
مشيت يم الباب اكو زرف زغير خليت عيني اباوع لمحته كاعد وهيه مخليه الصينيه بلكاع وتحجي وياه ما اعرف غرت بوكتها او ما غرت بس الي اعرفه احساس ما اعرف اوصفه قهره وخفقان بكلبي هسه خلصت من وحده هاي منين اجت
مشيت بسرعه لغرفتي دخلت وسديت الباب بقوه اتمددت على الجربايه
جاي تشوف ايدي على بطني واحجي من تكبر ما اريدك تشبه ابوك واذا انتي بنيه ما اريدج تشبهينه
خليت ايدي جوه خدي وكلبت على صفحتي اووف هسه انه ليش مكبره الموضوع كاعد يسولف يعني شنو
لا شنو يسولف وصوت الضحك ماله واصل لراس الشارع
يارب ساعدني مالي غيرك انصرني انه فقيره مو مال فضايح
انفتح الباب
دخل هاي بعدج نايمه بسهن بسهن يالله كومي
كاعده ما نايمه
يالله جبت كيمر شلون كيمر
كمت واحجي بكلبي حتى الكيمر كرهته من وراك جاي يتغزل بلكيمر هو انته علمود صاحبته
ام الكيمر جانت حيل حلوة ومعروفات بجمالهن يعني الوجه مدور ليكول قرص وابيض بحمار وعيون زرك مو حقه يدوخ هو انه اباوع بعيونها ادوخ واكول خيعونها على هلجمال شحال هو شيكول
حظرت الريوك بسرعه وجبته عمتي من اجينه لهذا البيت لحد الان صارت تنام لل٩ جانت من ال٧ تكعد
ونجيه هم
وي جيتنه لهذا البيت لاحظت شي بنجيه يمكن كبرت بهذا الزواج وصرت افهم نظره المره شنو معناها لمن تباوع عطر ياسر وكشخته وهو يتقصد يلبس ملابسه الضباط ويطلع جانت تخلي نجيه تبعه بعيونها وي ما يروح وحتى كلامها زاد
وشقاها وخاف جنه بهذاك البيت ما يجاملها هواي هسه صار لا عادي يشاقه وياها ويضحك
كاعده العصر امشط جنت توني طالعه من الحمام وكعدت بلممر لان اضوج امشط بلغرفه وجي جوها اظلم
كعدت هنا مشطت وخصلت جاي اظفر شعري لمحت ياسر واكف يباوع عليه ومتجي على الحايط ومخلي جتفه عكس ويباوع عليه ورجليه اليسرى على اليمنى شابكهن
خلصتي
ايي شنو تريد شي
لا ما اريد بس شعدج هنا خو امشط بغرفتي
ظلمه وانته جنت نايم كلت خاف تصير طبطبه وتكعد
ابتسم مكتف ايده هاا اكعد
.. اثناء ما حجه طلعت نجيه وانه اطلع الشعر الطاح بلمشط بيدي وكفت كبال ياسر
هاي شنو شعرج يطيح
اي هواي يطييح
اووو مو خوش سالفه جاا شوفي شعري جذب مثله وحتى بتي شعرها عليه طالع هم ثخين بشكار
اي انه شعري جي بس كسره بس اقوة من شعرج شعرج خفيف
ياااا شعري خفيف انتي غلطانه .. حجت هيج وهيه تطلع كصيبتها باعي شعري باعي شطوله على اساس هيه محجبه صفنت هاي شمالها من كل عقلها وانه الثوله من كل عقلي اجيت اكلها حرام بس ما لحكت وهيه تضم كصيبتها جوه الحجاب وتعدل بي وتروح تمشي تتمختر بمشيتها
كمت اخذت الشعر بيدي صاح ياسر تعاي لحكيني لحكته للغرفه
ليش ما تصبغين شعرج خلي يصير اصفر
اي انشالله
اي والله شبيج مو احسن من الحنه الي تخليها
رفعت عيني بعينه انه احب الحنه تعجبني وتقوي الشعر وبعدين ما صارلي هواي من صبغت
