اعلنت عليك الحرب

بارت 3

مساء الخير يا وردات
#اعلنت_عليك_الحرب
بارت 3
حمزة :- شنووو ولك.... شنووو  ما يخصني....
انت ابن عمي تريدني اشوفك ادمر نفسك واسكت

فراس:- اي تسكت و ما تدخل بشيء ما يخصك هاي حياتي واني حر بيها واسوي اللي اريده ومحد يحق اله يعترض واني مو طفل لحتى حضرتك تصرخ بوجهي و تعلمني شنو اسوي وشنو ما اسوي

اني هنا تعصبت و فار بيه الدم دفعته عالارض و كعدت فوكاه و شبعته بوكسات و احجي بكل عصبيه
حمزة :- ولك حيوان سكَط لك انت... شلون تسوي بنفسك هيج... بس اني الك الا اربيك  من جديد

طبعا اني اضربه وما يكدر يقاوم جسمه صاير ضعيف وما عنده القوه ليواجهني كمت وابتعدت عنه و شفته ما ديتحرك و كوه فاتح عيونه شلته و حطيته عالسرير و غطيته وشفته ديرجف و حجى بصوت مبحوح و عيتوسل بيه
فراس :- الله يخليك بس حبايه وحده داموت من الوجع والله بس انطيني وحده واوعدك ابطل المخدرات
حمزة :- جذاب 😡 ولو تموت هسه كدامي ما انطيك اياها و راح اخذها و اذبها واتمنى اشوفك مرتلخ تاخذها لو تشتري غيرها والله لامسح بيك الكاع

عفتوه و طلعت من الغرفه و نزلت جوه عمي ومرت عمي جانوا بالمطبخ و ديسولفون و لا حسوا علينا
كتله :- عمي اني اترخص منكم راح اروح

ابو فراس:- بعد وكت ابني ظل عدنا
ام فراس :- بعدين اني داحضر عشويه لخاطرك هيج تفشلني و تروح و ما تاكل ويانا
حمزة :- اعذروني والله و اوعدكم على مرتلخ بس ضروري اروح هسه صارت عندي شغله

ابو فراس :- براحتك ابني و منتظرين جيتك شوكت ما تجي البيت بيتك حبيبي
حمزة :- تسلم عمي ما تقصرون

ودعتهم و طلعت واني طاكه روحي بسبب فراس
هذا مو بس ابن عمي هذا اخويه بكل تفصيل بحياتي جان موجود صعب كلش اشوفه يضيع و اني ابقى اتفرج بدون ما اسوي شيء
طلعت افتريت شويه واخذت عشويه من برا و خبرت ع زبيده و وصيتها ما تسوي اكل
ورجعت للبيت و انتبهت ع نفسي كولش زين لحتى لا احد يحس عليه ضايج و يسألون و تعال جيب الهم عذر مقنع 😑
عبدالله :- عاشت ايدك وليدي جنت كولش مشتهي البركر بس امك الله يحفظها ما دتقبل اتسويه 🙄
زينب :- حبيبي غير علمود صحتك اخاف عليك من هالاكلات الثقليه والا اني شعندي اسويلك و من عيوني
خالد :- شفتي الحنيه 😏
زبيده :- اي شفت و شفت اسلوب عمي الحلو وياها هم 😏
زينب :- هههه هاي اشبيكم عيني
زبيده :- سلامتج عمة 😉
خالد :- ماكو شي بس دلع بنات 😏
مهند :- ههههه هاي من اتزوج اني هم هيج والله مو زين اني اريد هي تكعد تؤكلني بيديها 😍مو نتناكر

ههههههههه خربنا ضحك من حجايه مهند الصبح ابويه و بالليل هو واني اتصنع الابتسامه بس بالي كله يم فراس باوعت لزبيده و انقهرت عليها هاي شنو راح تسوي اذا عرفت اخوها يتعاطى مخدرات زين واهله شديسون لو عرفوا يمكن يطردوه من البيت بس هم مو حل هيج احتمال وانما اكيد يسوي اي شيء لخاطر الحبوب و ممكن يمشي بطريق اعوج
اوووف والله مدري شنو راح اسوي بس راح اظل احاول وياه عسى ولعل الله يهديه عن طريقي