لو كان لي قلبان

part 11

البارت الحادي عشر

#لو_كان_لي_قلبان 🥀

كلي شكد بعدلك حتى اتانيك
             ﻻن دمعي انتهى وينرادله انوب

اشم ريحة قميصك من يجي الليل
           واحس كلبي ايتمرد وكت الغروب

أكلب بالصور وابجي أعله فركاك
            واكل للروح اصبري بشكل أيوب

بطيت وظيكت خلك اليتانون
         وانه بعيني المطر بس طاح حالوب

أظل اتخايلك تتسامر اوياي
           وأكلك روحي بعدك كامت تذوب

ﻻن وحشة مكانك هدت الحيل
            بعيد انت وعليك اشلون مالوب...

🥀

ـ فتحت الشباك
مديت راسي اريد اتنفس غمضت عيني  واستنشقت هوئ احس نفسي مخنوكه من الصار والغصه لازمتني

اااه يا جواد ليش هيج سويت
شلون هنت عليك واعتبرتني تعويض معقوله هيج تباوعلي بعين صغيرة

فتحت عيني..
لكيته واكف كبالي بالحديقه مالتهم
ويباوع عليه...
عيونه تتسأئل..
وبسهوله اقراهن
شبيج ليش حضرتيني
والله كل هذا السويته علمودج

باوعتله بنضرة اشمئزاز
والدمع تارس عيني
متحملت اكثر
سديت الشباك بقوة بوجهه…
رجعت لمكاني اشهك وابجي ..

دقايق وسمـعت جـرس بيــتنه انـدك ..
رفعت عيني علئ الساعه
شفتهه بـ 10 ونص
استغربت منو يجي هيج وكت ..
رحت للشباك
اريد اشوف منو
فتحت البردة
ماشفت احد بالباب ..
استغربت..

لعد منو دك الجرس
تركت مكاني ونزلت جوة
شفت بابا طالع بالكراج وديفتح الباب الخارجيه… ضليت واكفه واراقب بقيت مركزة علئ الباب الدنيه ظلمه ومو كلش واضحه الرؤيه ..

فتح الباب ..
شفت شخص واكف ..
مرتجي بايدة علئ الحايط ومدنك علئ الارض..
ثواني ورفع راسه..
هــذا جــــواد !

شجابه بهالوقت..
ياترئ شنو يريد..
ابد ماتوقعت جيته بعتبار ضمن صرت اله وبعد ميهتملي…
احس رجلي يبست بمكانهه
اريد اتحرك ما اكدر ..

كوة بقيت واكفه علئ حيلي
ما ريد اكعد لازم اعرف علئ شنو جاي

هيثم ـ  جواد ..خير شجابك ؟

ـ عمي عنـــ

ـ اسمع..
لا تصدك نفسك خطبت
وتعيش الدور
وابشرك
بنتي رفضتك  ..
معناهه اعلئ ما بخيلك اركبة
ماعندك مرة يمي..

ـ رفضتني ..

ـ اي شتصوور لعد
تقبل علئ هيج مهزله
اعرف بنتي كلش زين كرامتهه فوك كل شي

ـ حقهه
بس اطمئن عمي اني ماجاي علئ هالشي.. 
عندي كلمتين وياك اتمنئ تسمعني

ـ مابينة حجي
الاكبر منك حجو العدهم
واتصور كلامك نفس كلامهم ماراح تضيف شي