البارت الثامن والعشرون
#لو_كان_لي_قلبان🥀بقلم الكاتبة ڤينوس آرام
رضعتني امي بدمعهة ..من عرفت الصوت
وغطتني بحزنهة ... من مشت عني
وخذت روحي على ظيمي... وما شكيت الحال
ويمنوني شتبي... وما كلت متمني
علمت البعض نگل جدم على گاع...
واول ما مشن بلزلگ لفني
#عريان_سيد_خلف
🥀
هشام ـ خليت التلفون
بجيبي وافكر بجواد
شكد تحبة توشة
بحيث خابصة الدنية عليه
وهمة ماصارلهم سنتين
من حبو بعض
واني هالبومة
صارلنة 4 سنين
وتالي هيج تطلع
سؤ اختياري ولازم اتحملة ..
خلص الوقت وصرفت العمال
سديت المحل ورحت
بتكسي لبيت جواد
وصلت الشارعهم
ولكيت جادر جبير
منصوب بدربونتهم...
وناس كومة ملتمين
دخلت اتمشئ واباوع عليهم
مدعرف وجوهم مو
واضح لابسين ملابس سود
شفت واحد عبالك اعرفة
بس وين شايفه مادري
يعني مدعرفة منو ..
اغلبهم لابسين دشاديش
سود وشماغ اسود
اتمشيت شوي بعد
صارت مقابيلي
قطعه سودة مكتوب عليهه..
"انتقلت الئ رحمة الله عقيلة الحاج طالب" ..
مادري وين سامع بحجي طالب
ماتعبت نفسي بالتفكير..
مشيت شوي وصلت يم الجادر
ماخذين الشارع كله
كلت عيب حتئ لو ما اعرفهم
ادخل اعزي واطلع
دخلت بنصهم
كامولي ناس كبار بالعمر
ومن ضمنهم واحد كاعد
وياهم مدنك راسه ويبجي
اخذت من خاطرهم كلهم
حتئ هذا اليبجي
ولو مكدرت اشوف وجهه منو
كعدت بنصهم وقرينة الفاتحه
جابولي جاي وشربتة
ثواني وهذا الشخص
اليبجي ..كام من مكانة
ودخل بيت جواد
اتاكدت هاي الفاتحه
تخص بيت جواد
بس منو الميت ..
كاتبين عقيلة حجي طالب
يعني هاي لو امة لو وحدة من زوجات اخوتة
خلصت وكمت اريد اسلم عليهم حتئ اطلع....
ان شالله اخر الاحزان وخاتمتهه
كلنة علئ هالطريق الله يصبركم
ـ ابني اني وين شايفك ؟
ـ والله عمي اني هم مشبه عليكم
بس مديحضرني وين... بيت عمي هنا واكيد متشاوفين
ـ بيت عمك هنا
اها يمكن اتذكرتك
انت شتكرب لهذا الروسي
ـ صفنت عليه ..
كلتله ..
عمي موروسي
عايش بروسيا
تقصد هيثم ابو نتاشا مو
ـ اي اي اي هو
يمكن انت الــ
ـ اي الكسرت ايد جواد ..
هو اني بشحمة ولحمة
يمكن انت واحد من عمامة
لان من اول ماشفتك
واني اشبه عليك
اعتقد شفتك بالكعدة
ـ اي صح احنة عمامه
ياهلا بيك والله ابن اصول
ـ رحم الله والديك
بس حجي منو توفئ من بيت جواد
أنت تقرأ
لو كان لي قلبان
ChickLitمعاناة بنت روسيه لاب عراقي يهرب والدهه بها من بلاد الغربة لتنصدم بغربه اكبر واتعس
