لاتترك يدي

الفصل السابع

#لاتترك_يدي

الفصل السابع

ماسة
عدن ايام ونا ندور في شغل بدون فايدة وبالذات ان عمتي نجاة بدت تلقح عليا لاني متاكدة انها مفتشة شنطتي وشايفة ذهبي وفلوسي ومعاش عارفة شنو اندير
وبالذات اني بديت نضعف بكل واللي يشوفني عصا لابسة عباية شرعية معاش ناكل واجد يا دوب نفطر وبس وكان طلعت دورت على شغل ممكن ناخذ نص طعمية ومرات لا نقول نوفر الفلوس
وروحت اليوم ونا مقررة اني بكرة خلاص بنسيب الحوش ان شاءالله نقعد في الشارع

زهرة .. قوليلي ماسة
ماسة .. نعم
زهرة .. ولد عمك كيف كنتي تتواصلي معاه
ماسة .. على الفيس عنده حساب
زهرة .. قلتيلي اسمه اسماعيل صح
ماسة .. اه اسماعيل موسى وحتى شكله حلو كان تشوفي صورته الشخصية اللي حاطها في حسابه حتعرفي كلامي
زهرة .. بس انتي كيف قدرتي معاش تتواصلي معاه
ماسة .. عادي لان علاقتنا ماكنتش واخذة الصفة الشرعية يعني كنا علاقة وكنت عادي ماتفرقش الامور هذي معاي وكنت ديمة نحكي معاه ڤيديو لكن لما تحجبت وبديت نخطي في خطواتي للالتزام التام قررت ننهي اللي بينا وعطيته عهد اني نستناه نين يروح ويعطي لعلاقتنا صفة شرعية
زهرة .. ماحاولش بعدها يكلمك على الفيس
ماسة .. ماهو نا سكرت حسابي
زهرة .. عليش
ماسة .. عشان حاجات واجدة خفت اني نضعف ونكلمه وغير ذلك خاشة بيه واجد قروبات مختلطة فقلت بدل مانقعد نحذف نسكر الحساب هذا ودرت حساب جديد
زهرة ..اه
ماسة .. عليش بس الاسئلة هذي كلها
زهرة بتوتر .. لا غير قلت نشوفك كيف قدرتي تصبري وانتي كنتي ترفضي تكلمي اي حد في الجامعة والخطابة اللي جوك على خاطره
ماسة بحزن .. عشان كنت نقول من ترك شئ لله عوضه الله خيرا منه
زهرة .. به ليش تقولي فيها بحزن هك
ماسة .. عشان كنت نقول لما سيبت علاقتي مع اسماعيل رغم حبي ليه عشان ربي يعوضني خير ويجمعني بيه بحلاله لكن اهو قدامك شنو اللي صارلي
بالذات اذا هله قالوله اني تزوجت لانه حتى مرة مرة يكلم في ماما يطمن عليا منها لكن من لما تزوجت هو مارنش عليها بكل
زهرة .. اه مرات ربي يعوضك بخير منهم كلهم
ماسة .. لا نا سادني ابراهيم كرهني في حاجة اسمها راجل لعمري كله
زهرة .. ربي يسهل امورك يارب

وجاء ثاني يوم ولميت دبشي خذيت الضروري الضروري لبستين نوم قفطانين واسعات وسروال وسورية نلبس فيهن تحت العباية وملابس داخلية حطيتهن في شنطة كتفين وخليت شنطتي عند زهرة وطلعت وما مسكونيش حتى بالكذب او مجاملة
وطلعت لكن من لما طلعت ونا نحس في جسمي تاعب وكأن حمى بتجيني وجسمي يرعش وبس لكن كابرت على روحي وقعدت ندور ووصلت لمصحة قلت بالك نلقى فيها شغل حتى عاملة نظافة ولما خشيت خبطت في حيط وماعرفتش كيف حيط في نص الطريق لكن لما جيت بنرفع راسي ظلمت الدنيا عندي

ونردو لمنطقتنا الصغيرة

عواطف .. يا راجل انت غير قولي كيف هانت عليك بنتك
علي .. نا بنتي ماتت من هذاك اليوم
عواطف .. هذي عرضك ابصر وين تو والله شنو صاير فيها
علي .. قلت ليك بنتي ماتت ماتت معاش عندي بنات
عواطف .. به والناس اللي بنمشيلهم نا ومرت خوك وبنتها رافعين بيان فارس اخته وين ماجتش
علي.. اوووف اللي بنقولوه نعاوده افهمي يا ولية قلت ان بنتك مشت لخوك في مصر بتقعد غادي وبتكمل قرايتها وبسبب التشدد في مصر من ناحية القراية مش حتقدر تجي لا الخطوبة ولا العرس فهمتي والله نكتبها لك على ورقة بيش تقدري تحفظيها
عواطف .. بسـ
علي.. اقسم بالله يا ولية ماتمشي ادرقي وجهك من احذاي لخلنك تمشي لبيان ولدك بوجه ملون