لاتترك يدي

الفصل التاسع

#لاتترك_يدي

الفصل التاسع

واتصلت ماسة بحواء ثاني يوم وجت روحت بيها وجابتها لحوشها اللي اول ماشفاته فتحت فمها وماتخيلتش ان في حياش بالشكل هذا و تفاجئت اكثر بدارها

ماسة .. هذي داري نا
حواء .. اه دارك كان ماعجبتكش فيها حاجة نغيروها
ماسة .. الله يبارك فيك بالله شنو اللي مايعجبنيش فيها تى حتى داري في حوش اهلي مش هك بكل نا مكنتش نحلم بهكي 
حواء.. به نخليك ترتاحي اليوم بما انك طالعة من المصحة وبكرة تباشري الشغل
ماسة .. استني يا عمتي
حواء.. خير تبي حاجة ناقصاتك حاجة

ماسة وهي تفتش في شنطتها ومدت لحواء العلبة بتاع ذهبها وظرف الفلوس

حواء.. هذين شنو
ماسة .. الفلوس اللي في الظرف 1550
يا عمتي ونا سئلت على المصحة والفلوس اللي دفعهن ولدك لقيتهن 2200 خوذيهن خليهن عندك واخصمي من راتبي بالنص ولما يوصلن للمبلغ اللي دفعهن ولدك عطيهن له
حواء.. به انتي عارفة قديش راتبك
ماسة .. ان شاءالله مية جنيه نا ماعنديش متطلبات واجدة اللي عندي مكفيني واللي بنحوشه من نص راتبي الباقي يسدني مصروف المعهد
حواء.. به كبداية راتبك 500 دينار
ماسة بشهقة .. واجد يا عمتي
حواء.. لا مش واجد
ماسة .. به شنو طبيعة شغلي بيش نبدا عارفة
حواء.. اولا تنوضي الصبح لاني من محبين النوضان بدري وتفطري معاي وتعطيني دواي في مواعيده اللي تو نقولك عليهن وتقضي معاي الوقت لا ليك دعوى بمسح وكنس ولا ضم
ماسة .. الراتب واجد يا عمتي اذا هذا بس اللي بنديره
حواء.. شنو قلنا نحن كلمتي ماتتعاودش
ماسة .. حاضر بس بشرط  تخليني نساعد المرا اللي تخدم هنا حتى مرة مرة نا كنت شايلة حوش هلي وحتى في الفترة الاخيرة اللي انتي عارفتيه مرضي زاد وتخميمي كثر لانه مايخليش فيا اندير في شئ
حواء.. حاضر قوليلي تعرفي اطيبي
ماسة .. اه وحتى يقولو عليا نفسي حلو
حواء .. خلاص امنا يبقى مرة مرة طيبي لكن ضمان لا  خليك في دارك  وبس واهو حتى حمام فيها وقرايتك لما تبدا فاهمة
ماسة .. حاضر
وجت حضنت حواء وباست راسها

حواء.. ربي يحفظك ويصونك يا بنتي
ماسة .. امين
حواء.. بس العلبة شنو
ماسة .. علبة ذهبي عطتها ليا عمتي سالمة قلت كان استحقيت انبيعه لعازة الوقت ونبيك ادسيها عندك
حواء .. اه تمام هي ارتاحي تو

وفي شركة المقاولات بتاعت غيث

محمد.. هي وين رايح ومن امتى وانت تحط في سماعات من بدري ونا انادي
غيث بعصبية .. خاطري نعرف البنت هذي شنو دايرة لامي
محمد بشهقة .. ان شاءالله ركبت كاميرا حتى في دارها
غيث وتنوفز من صاحبه .. من امتى تعرف عليا هك
محمد بتنهيدة .. والله يا رفيقي واجد حاجات تغيرن ونا نعرف تصرفاتك لما عمتي حواء ادير حاجة ضد رغبتك
غيث.. زي شنو مثلا
محمد.. الكاميرات انت حاط كاميرات في الجنان داير ما يدور حقك لكن جوا الحوش مش طبعك
غيث .. تبيني نأمن لامي مع بنت عرفتها من يومين ومعها ماتبيش تقولي قصتها ونكون مطمن نا لو بيدي نقعد مانطلع من الحوش بكل لكن انت عارف الدنيا كيف خشت  بعضها في الشركة بالذات في فترة عزاء زياد
محمد.. في هذي عندك حق بس ناسي ان عمتي حواء عندها نظرة في الناس واكبر دليل روان كانت ماتبيهاش
غيث ويبي يغير الموضوع .. المهم نا حاط سماعة صوت في دارها مش كاميرا مستحيل نا نتعدى على حرمة غيري
محمد.. به الحمدلله بس ليش متنرفز
غيث .. يا راجل البنت تقول ساحرة امي معقولة عشان تونسها وتعطيها الدواء في مواعيده بس بتعطيها راتب 500 جنيه تخيل
محمد.. انت عارف عمتي حواء كل حاجة ادير فيها بحساب وحتى البنت اكيد قصتها كبيرة نين عمتي مصرة انها ماتحكيهاش لك
غيث .. والله ماني عارف يستر الله وخلاص
محمد.. بس البنت جد فيها حاجة مش تمام
غيث بشك .. شنو قصدك
محمد.. كيف خشت بعضها لما خشيت للدار لامك ونا مصبي في الباب كيف زادت خشت بعضها حركتها مش طبيعية بالذات انت يا غيث مستحيل ماتلفتش نظر بنت وهي حتى راسها ما رفعتاش من على ركابها
غيث .. مركز معاها واجد شكلك ونا ماشفتش هذين كلهن
محمد بضحكة .. انت وبتركز مع بنت وعمتي احذاك تي يا راجل عيب وبعدين نا مش قصة تركيز قصة ان حركتها لفتت انتباهي واجد واللي زاد اكد شكي ان في حاجة مش تمام عمتي حواء غيرت الموضوع لما حكيت على حركتها في السيارة
غيث .. صح هذي نا ركزت عليها ولما سئلت امي قالتلي غير محمد يتهيالا
محمد.. نا متأكد وبعدين عليش مستعجلين تو اللي هناك يبان صدقني مافيش حاجة تندس
غيث .. عندك حق