لاتترك يدي

الفصل الرابع والعشرين

طبعا مش عارفة شنو نقول ونا تو ننسخ في الفصل بنزله مش عارفة شنو درت حذفته وماعنديش نسخة ثانية ليه فلو لقيتوه قصير او مش زي الحبكة السابقة للفصول فاعذروني لاني كتبت اللي قدرت انجمعه منه
اشعر بالاحباط على قد مافرحت بالتشجيع على قد ما حاسة بالاحباط تو

#لاتترك_يدي

الفصل الرابع والعشرين

اتصلت حواء بنادين من الصبح

حواء.. ها يا نادين خذيتي اللي قلت لك عليه
نادين .. اه يا عميمة لكن ماضني ماسة تقدر تلبسهن
حواء.. حتلبس صدقيني اللي خلت ولدي امس ما طلع من حوش وكل مايحكي معاي بالفون يطمن عليا السعادة واضحة من صوته حدير اي حاجة على خاطره
نادين .. على العموم نا جبت ليها من كلو مستور ووسط وعريان بكل
حواء.. تمام بكل وماتنسيش ان ماسة في زيجتها الاولى ماتعتبرش عاشت راه وبعدين شنو العروس منغير ارواب حلوة
نادين.. صدقتي يا عميمة
حواء.. بنقولك بندير الليلة حفلة لكن مش عارفة شنو السبب اللي بنقوله لان انتي ومحمد بس اللي تعلمو بالقصة
نادين .. ساهلة هذي قولي بمناسبة شفاء ماسة
حواء.. جبتي فيها خلاص امنا اول مايطلعو غيث وماسة نتصل تجو
نادين .. تم هما احذاك
حواء.. لا مانزلوش وبعدين ماتنسيش نا نكلم فيك الساعة ثمانية راه
نادين بضحكة .. صح شنو بينوضهم تو

ماسة وغيث .. صباح الخير
حواء.. هي سكري تو نزلو وناضو بدري
نادين .. سلام
حواء التفت لهم وبكل حب حضنتهم .. صباح الورد وربي يبارك فيكم ويحفظكم يارب
ماسة وغيث.. امين يارب
حواء.. ليش نزلتو ونا بعتت ليكم امس كل حاجة
غيث .. لا يا امي نا وماسة واجبتنا كلها معاك
حواء.. ربي يخليكم لي
ماسة .. ويخليك لنا يا عميمة
حواء.. لا عاد معاش فيها عميمة قوليلي امي
ماسة بغصة .. امي
حواء.. كان ماتبيش عادي يا بنتي
ماسة وحضنت حواء.. ليش اللي يخليني مانبيش يا احلى ام
غيث.. ماسة مش لازم تو تمشي لهلك بعد ماصحيتي
ماسة .. لا ما نبيش اي هل اللي مادورو عليا ولا عبروني
غيث .. لا يا ماسة دورو عليك وخالك اكد لك الشئ هذا وبالذات انتي سحبتي ملفك من الجامعة ومستحيل يخطر عليهم انك نقلتي لمعهد وحتى لما سئلو صاحبتك قالولهم انك سافرتي بالله قوليلي وين بيدورو
ماسة .. مش مستعدة نواجهم تو
غيث .. به احكي على الاقل مع امك اتصال نا عندي رقم برايفت كلميها منه
ماسة .. به 

وعدى الوقت فطرو وحكو وحواء لاحظت سعادة ولدها وقديش هو فرحان فرحة ماشفتهاش في عيونه الا من لما كان باته وخوه عايشين
جاب غيث الفون لماسة وقاللها انه بيطلع يشوف محمد على جية
وطلع غيث وجاه محمد وبحضن كبير حضنه كيف عاد وهو عاش معاه كل لحظات وجعه

محمد.. مش قلت لك عمتي حواء عندها نظرة في الناس وخليك وراها
غيث .. الحمدلله شنو بنقولك والله نحكيلك لكن بالمختصر ماسة جنة يا رفيقي
محمد بفرحة لرفيقه .. لهدرجة
غيث بحب .. اللي هدته مآب في سنين جت ماسة في يوم لا مش يوم ساعة بناته
محمد.. الحمدلله يارب تستاهل حتى انت انك تاخذ نصيبك الحلو
محمد بجدية .. غيث
غيث وانتبه لنبرة محمد.. نعم
محمد.. شوقي
غيث .. كنه
محمد.. يدبرلك في حاجة مش تمام وهالمرة حاجة كبيرة والضربة حتكون قاضية
غيث .. كيف في حاجة جديدة
محمد.. اتصل بيا قاسم وقالي انه سمع شوقي يحكي مع واحد في شركتنا وابصر على شنو يتفقو وهالمرة حاجة خطيرة لانه سمع كلمة قتل
غيث .. قاسم هو اللي حكالك مش غريبة هذي
محمد.. حتى انا استغربت وسئلته قالي بسبب انه يحبك ويحترمك وعمره ماصدق كذب خوه وثانيا خايف على خوه
غيث.. وماقالكش منو معاه اللي في الشركة
محمد.. لا وهضا اللي بيجنني يعني نحن عمرنا ماقصرنا مع موظف ومافيش تقريبا شاب مش متمني يشتغل معانا من سمعتنا الطيبة في تعاملنا معاهم مافهمتش كيف في واحد يقدر يخون
غيث .. النفس ضعيفة وامارة بالسو ماتنساش
محمد.. شنو بدير تو
غيث .. نين نعرفو من اللي معاه لازم نكثفو الحراسة على العيلة وبالذات الصبايا لان شوقي لما بيضرب حيضربني فنقاط ضعفي ما اعتقدش حيضرني نا لان هك حيفتك مني وخلاص
محمد.. يستر الله وخلاص

شوقي عامر خطاب ولد ولد عم بات غيث انسان مغرور وشايف روحه ويكره غيث كره العمى تقول قاتله باته ومايحباش بكل وديمة يبي يكون احسن من غيث ويكره اي حد يقارنه بيه تقول ذنب غيث انه طلع في الشكل يشبه امه وان مآب زمان فضلاته عليه وديمة يبي اي فرصة بيدمر بيها غيث وحاول قبل واجد بس غيث كان ديمة فاطنله

وخش غيث و محمد على ماسة مازالت تحكي مع امها

عواطف .. نبي نشوفك يابنتي
ماسة .. ونا مازالت مش مستعدة لهك يا ماما نا تزوجت وحياتي مستقرة وربي عوضني بعيلة تحبني وتخاف عليا عيلة ماظلمتنيش رغم انها مش هيا اللي ربتني عيلة وثقت في كلامي بدون تشكيك رغم قلة عرفهم ليا
عواطف بدموع .. تزوجتي يا بنتي بلا هلك
ماسة بضحكة هزوة .. هلي اي هل يا ماما اللي تحكي عليهم اللي ساد ونا مذبوحة زادو ذبحوني بدل مايكونو هم عزوتي وياخذو حقي
عواطف .. سامحيني يا بنتي مكنتش الام اللي تتمنيها
ماسة ووجعتها امها.. الله غالب يا ماما ما في ايدك شئ
عواطف .. ميتة على شوفتك يا بنتي
ماسة بدموع .. حنجيك يا ماما بس مازال مش تو
عواطف .. ديري بالك على روحك وطمنيني عليك ديمة 
ماسة .. ان شاءالله يا ماما

جاها غيث ضمها وهدها نين سكتت
وبعد وقت تغير جوها ومحمد قعد داير جو بيش يتغير جو ماسة وعدى الوقت وتغذو وبعدها طلع غيث وماسة ياخذو في اثاث الشقة وحواء اتصلت بنادين وجتها هيا وماجدة ومعاهم الشباب وقعدو يعولو للحفلة
اللي اول ماروحت ماسة تفاجئت بيها وفرحت واجد وعدى وقت حلو
وعطتها نادين الارواب وقالت لها ماسة انها قبل بتكلمها عليهن وعدت ضمت حواء وشكرتها عليهن وانها كيف فكرت فيها
وبعد وقت لهذا روح وماسة ركبت فوق وخلت غيث مع امه وهو عشان يعطيها وقت تبرم على روحها
لبست ماسة روب حلو وجهزت مكسرات وعصير واستنت غيث اللي اول ماجاها حضنها زين وباسها بوسة حلوة وقعدو مكسدين يتفرجو وغيث يشتغل على ايباده

ماسة بتردد .. غيث
غيث .. ياروحه
ماسة بضحكة .. معاش نعرف نحكي هك
غيث وسيب اللي في ايده وركز معاها لما حس بيها متوترة .. احكي ماستي ماتخافي من شئ
ماسة .. اليوم لما كنا في السوق في سيارة كانت اتبع فينا
غيث .. بالك يتهيالك
ماسة بهزة راس.. لا مش يتهيالي بالذات انه لما ننزلو لمحل ينزل شاب منها يقعد قريب من الباب ولما بنطلعو يسبق قبلنا ويركب ويطلع ورانا طول
غيث بضحكة .. وكيف شفتي هذا كله وانتي كنتي مركزة على الاثاث
ماسة .. مش قلت لك اني عندي قدرة نركز على اكثر من حاجة في نفس الوقت
غيث ومسك ايدين ماسة .. اسمعي يا ماستي كلامي كويس وافهميه
ماسة .. حاضر
غيث بجدية .. نا عندي ولد عم
#حياة
طبعا مارجعتش ولا صححت اذا في اخطاء وعذرا لو كان مش قد المتوقع