لاتترك يدي

الفصل العشرين

#لاتترك_يدي

الفصل العشرين

غيث .. ماشيين لعيت خالك
ماسة بفرحة نست خوفها وكل شئ .. جد والله جد بنعدو لخالي
غيث .. اه والله جديات وخليت امي تاخذ الرقم منك واتصلت بيهم وهما تو يستنو فيك واخرى عازمينا على السحور
ماسة مازالت بفرحتها .. شكرا شكرا ليك
غيث .. العفو نا مادرت شئ وبعدين الدكتورة قالت انه ممكن يفيدك المشوار هذا وشكله صح فادك
ماسة .. ماتتخيلش قديش مشتاقة ليهم
غيث .. واهو بنمشو ليهم هيا
ماسة .. استنى شوي
غيث .. كنك تقريبا واتية
ماسة باحراج .. ماهو مكنتش عارفة وين بنعدو فمحطيتش حاجة على وجهي
غيث .. والله ماهو مستحق وجهك حاجة هو هك تقولي دايرة احسن جلسة ميك اب
ماسة باحراج .. شكرا

وفعلا من الفرحة معاش عرفت شنو نقول او شنو اندير ولبست عبايتي ونزلنا وفي السيارة

غيث .. ماسة احكيلي على خالك على الاقل مانبقاش غبي ومانعرفش حاجة على هل مراتي
ماسة .. حشاك من الغبا بس خالي لازم يعلم بقصتي
غيث .. نا ماعنديش مشكلة ومعاك في اي شئ بتقوليه
ماسة..  تمام خالي هذا خو ماما لكن هو خوها  من امها حني تزوجت باته وحملت بيه وجاباته وتعبت معاه لان باته كان صعب بكل رغم انه ماديا كويس مش زي جدي فاطلقت منه وتزوجت جدي وكان جدي راجل بسيط وجابت منه ماما بس وعند اول راجل عنده شوي فلوس وشاف فيه راجل كويس حيعيش بنته احسن عيشة رغم ان خالي عمره ماقصر مع ماما ماديا بكل لكن اهو جدي كان يقول خوها مش دايم ليها وعلى اساس ان الراجل كل شئ
غيث .. ماسة من تجربتك ماتحكميش على الكل
ماسة .. عارفة ان في رجالة هما الامان والسند والظهر لصبايهم لكن نا للاسف ماصادفتش واحد منهم لا اب ولا اخ ولا حتى من كان اسمه راجلي
غيث .. ونا
ماسة .. مش عارفة
غيث .. كيف مش عارفة
ماسة .. حاليا نا قاعدة في مرحلة علاج اي شئ قالتلي الدكتورة تحسي بيه مش دايم نين نتعالج لو اللي نحس بيه قعد زي ماهو تو نقوله لك ولو تغير
غيث .. توعديني برضو تقوليه ليا
ماسة .. ان شاءالله
غيث .. به كملي
ماسة .. مافيها ما نكمل خالي زار ماما اكثر من مرة واخر مرة لما كنت في اعدادي وبعدها قعد اتصالات ويرسل في هدايا واللي من ضمنهن بناته يبعتلي في دبشهن
غيث .. كم عنده بنات وعيال
ماسة .. بنتين وثلاث عيال
غيث بغيرة حاول مايبينهاش  .. متزوجين والله صغار
ماسة .. اثنين متزوجين وواحد اكبر مني بسنة اضني عازب قاعد
غيث .. به تمام

ووصلنا لحوش خالي وتفاجات بعرم شكاير ينزل فيهن غيث

ماسة باستغراب .. شنو هذين
غيث .. هدايا جابتهن معاها امي من ليبيا عشان كانت مخططة انها تجيبك لحوش خالك وبما انها تعرفهم كلهم من حكيك فجابت لكل حد هدية مكتوب اسم كل واحد عليها بيش تعرفي توزعيهن
ماسة بحب .. والله رايفت عليها
غيث .. بكرة في الليل جايين ماتخافيش
ماسة بفرحة .. الحمد والشكر ليك يارب رايفت عليها واجد
غيث .. هيا