لاتترك يدي

الفصل الثامن عشر

#لاتترك_يدي

الفصل الثامن عشر

نادين .. اه حطام نفسي وجسدي غيث قعد طريح فراش سنة كاملة حصل اصابة كبيرة في كراعه اليسار خلاته مايقدرش يمشي عليها وحتى تو معبية بلاتين وخضع لعمليات واجد وجلسات علاج طبيعي وفيزيائي غير النفسي لانه ينوض من عز نومه وهو يعيط باسم خوه وكل مايبي يرقد يذكر منظر خوه
ماسة .. لكن وين لقيتو علاج كويس هنا
نادين .. لا مش في ليبيا تعالج اصلا اول ماردت الروح في غيث وعرفو انه حي على طول باتي حجزله ورفعاته طيارة اسعاف لمصر وحطوه في احسن مستشفى فيها وفروله دكتور نفسي وجابله احسن دكتور من المانيا بيش تابع حالته
ماسة .. كله باتك امنا وين هله عمامه خواله
نادين بضحكة من بين دموعها .. اي عمام وخوال اللي تحكي عليهم وكل واحد فيهم يتمنو غيث يموت اليوم قبل بكرة بيش يقدرو يقسمو الورث رغم انه مكانش بالكبر هذا تو لكن كان ورث محترم المهم وقتها محمد وغيث رجعت صحبتهم اكثر من الاول
ماسة .. كيف هما مش مع بعض ديمة
نادين .. هلي وهل غيث كانو جيران قبل حتى ماننولد لكن بعدها باتي حول وتفرق محمد وغيث لكن سراج وصلاح لا لان وقتها يقرو في جامعة مع بعض لان سراج كان اكبر من غيث بي 12 سنة وهذا ليش غيث كان متعلق بسراج واجد وميته ماكنتش بالساهل عليه لكن محمد وغيث تفرقو وجمعتهم الثانوية ولما صار الحادث باتي على طول تصرف لانه عارف هل عمي عمران  وعمتي حواء وطبعا صدمتنا الثانية كانت صلاح قعد فترة لا من الدنيا ولاهلها وبسببه وبسبب غيث انتقلنا هذيك السنة كلنا لمصر نا ثانية اعدادي وقتها كنت قريتها غادي وجت السنة هذي مع محمد وغيث لان محمد مباش يقرا وغيث مش معاه لكن لانهم رابحين سنة من عمرهم في القراية فتعتبر ماضاعتش عليهم وبعد جهد جهيد رجع صلاح بس شخص ثاني لكن نحمدو في ربنا ونقولو هذي ولاغيرها على الاقل كسبنا واحد مرح وجوه مش عادي و غيث زي اللي تشوفي فيه تو هادي لكن قاسي وعصبي اذا حد داسله على طرف وبالذات بعد اللي صارله مع مآب 
ماسة .. قبل ماتقوليلي اللي صارله مع مآب شنو نبي نعرف تشوه غيث وين نا شفت شكله كويس شفت انسان جميل همجي
نادين بضحكة .. همجي وجميل هذي كيف جت
ماسة .. مش عارفة لما جت عيني في عينه طول خطر عليا كتاب التاريخ وهو مرسوم فيه الانسان في القدم لكن في نفس الوقت حاجة جميلة هك
نادين بضحكة اكبر .. كان يسمعك غيث
غيث لانه في الكرسي اللي قريب من نادين .. نادين وين الضحك هذا راك مش في الحوش
نادين بي احراج .. آسفة ماهو
غيث قطع عليها .. اربطي الحزام انتي وماسة خلاص الطيارة بتنزل
نادين وهيا تربط وشيرت لماسة تربطه
ماسة بصوت واطي.. عادي يعني يكشخ عليك هك
نادين بصوت واطي .. اه حتى لو بيضرب ماهو واحد شاده
ماسة باستغراب .. للدرجة هذي
نادين .. اه خوتي يحسبو فيه واحد منهم تخيلي لو مشوار كلهم قالو عليه لا وشاورت غيث قالي به خلاص معناها به
غيث عمري ماحسبته الا واحد من خوتي
ماسة .. واو معناها غيث كلمته تمشي حتى عليهم
نادين .. اه لان غيث سبحان الله على عمره عنده عقل يوزن بلاد وخوتي وباتي يوثقو فيه واجد تصدقي مرة جاء شاب ومن عيلة كويسة يخطب فيا وباتي وخوتي ماقالوش لا لكن غيث قال لا وطبعا ماحد اعترض
ماسة .. ليش قال لا طالما هو كويس ومن عيلة كويسة زي ماتقولي 
نادين .. سئلته قالي فيه حاجة مش تمام وسبحان الله سمعنا بيه تزوج وذبح مرته ليلة دخلته
ماسة بشهقة .. شنو
نادين .. اه طلع عنده انفصام شخصية وماياخذش في علاج
ماسة .. الحمدلله ربي فكك منه كنهدا راك تو المرحومة نادين
نادين بضحكة .. خزي عليك