لاتترك يدي

الفصل الثلاثين والاخير

#لاتترك_يدي

غيث
نمر بايام صعبة بسبب العلاج الطبيعي ونضغط  على روحي على خاطر ماسة وعيالي في امس الحاجة ليا ونا نشوف فيها تاعبة واجد في نص السادس  والحركة تمت اصعب بالذات بطنها بدت تكبر بكل رايحة درهوبة تهبل ونقلنا قعدتنا من الشقة فوق لدارها الاولى عشان امي وبهيجة ديمة يكونو معاها لما نكون مش قاعد ومحمد شبه مايفارقش فيا وتو جايب عمال وقرر يقسم الشقة الثانية بيش يستقر فيها لانه بيتزوج بعد ما ماسة تجيب واخيرا قدر يقنع سيرين لما عدت امي وامه وفهمهم وضعهم وحكينا كل حاجة ليهن رغم ان عمتي ماجدة حسيتها ماتبيش العيلة لكن رضت على خاطر محمد ولما مشو يخطبو قالو لسيرين انهم عارفين كل شئ وراضيين بيها ونا في بالي حاجة

محمد.. شكل العلاج الطبيعي يتعب فيك واجد
غيث .. بكل متعب وواعر الحق
محمد.. به ارتاح منه شوي
غيث .. لا مانقدر ماستي وعيالي محتاجين ليا ونا نبي لما يجو نبي نكون كويس عشانهم بالذات ان ماسة احتمال تجيب في السابع
محمد.. ان شاءالله على خير
غيث .. قولي يا محمد شنو يخلي اثنين شباب واحد خريج اقتصاد والثاني علوم
انهم يكونو صياع
محمد.. ممكن صدمة وممكن قلت خدمة وممكن انهم شاطرين ودماغهم نظيف ومالقوش من يعطيهم حقهم وممكن حتى غياب الاب وممكن صحبة معفنة
غيث .. تمام بكل به شنو رايك زيد ويوسف نشغلوهم
محمد.. صعب بعد اسنين ضلال ينعدلو
غيث .. نجربو شنو خسرانين نحن
محمد.. به شنو تفكر
غيث .. الماركت نبي نكبره
محمد.. عشان هك شريت الارض اللي احذاه
غيث .. اه وبنخلي عماد ويوسف بما انه اقتصاد يشتغلو على خطة لتكبيره وهك يوسف يلهى في شغل وبالذات انه لما يلقى روحه في حاجة كبيرة من الاول حيتحمس ليها ويلهى وعماد يقعد المدير زي قبل ويوسف يمسك الحسابات
محمد.. كلام سليم به وزيد
غيث .. مش عارف ترا اسئل سيرين شنو اهتماته
محمد.. تو نشوف بس خايف تزعل مني
غيث .. عليش اولا الاقتراح اقتراحي نا وبعدين حرام شباب زي الورد تبقى حياتهم سنكحة في الشوراع واربعة وعشرين ساعة عرايك حتى عشان خاطر امهم وبعدين لو اضايقت قوللها على اخ رباب واخ عثمان بيش تعرف ان الدرجة الاولى عشان موظفة عندي قبل ماتكون وحدة من العيلة ولو نعلم بي وضعهم من قبل والله كنت فكرت في حل
محمد.. صح كلامك نخليك تمشي لماستك ونا نكلم ام لسان طويل
غيث بضحكة .. غيرها حي عليك تزعل بعد ماتتزوج راه الولية ماتحبش راجلها يقول عليها صفة شينة حتى لو هي عارفة انها فيها
محمد.. مش عارف شنو ندلعها حتى هلها ما لقو لها الا هالاسم سيرين
غيث .. سوسو حلو وبعدين يا سيدي لما تكون في بيتك دلع بحاجة اخرى حبيبتك عمرك روحك اي حاجة تحسها انها تمثلها لك
محمد.. صح كلامك هي سلام

وروح محمد ونا خشيت للحوش مشتاق لماستي تقول غايب عليها وقت مش عارف شنو داير في عمري عشان ربي يجازيني بيها وزي العادة متمددة في دار المعيشة لان حركتها ثاقلة بكل وتقرا في قرآن عشان تقول عيالي يسمعو وماتبيهمش يسمعو غير صوت القرآن حتى المسلسل التركي اللي تحبه بطلت اتفرج عليه وديمة تقرا ليهم بصوتها الناعم الهادي وامي زي العادة حايسة مع بهيجة في الكوجينة يديرو في وليمة لماسة
وفرحة امي منو قدها بعد ما كانت قريب اضيع مني على خاطر حفيد اهو ربي عوضها بثلاثة مرة وحدة
وانتبهت من شرودي في ماسة ونا مستعد عمري كله نقضيه ونا نتفرج عليها بس وهيا تنادي فيا