لاتترك يدي

الفصل الخامس والعشرين

#لاتترك_يدي

الفصل الخامس والعشرين

غيث .. عندي ولد عم
ماسة .. مش باتك ماعنداش خوت
غيث .. ضنا عم باتي المهم ولد عمي هذا ماتفهمي شئ لو قاتله باته راه مادارش معاي اللي داره
ماسة باهتمام.. شنو دار
غيث .. كل مرة يحاول يكسرني من لما صار الحادث وهو قمعز في شركة باتي وقال ان هذا مكانه ولو ربي ماعجل في شفاي كانت الشركة سكرت بيبانها وبعدها فتح شركة بروحه بيش ينافسني ونا مش حاطه في راسي بكل يعني لما نخش الصفقة نلقاه فيها ولاعمري درت العكس رغم انه ديمة يقول ان الصفقات نخش ليهن عشان هو فيهن بيش نخسره ونا اصلا عمري مارفعته من ارضه ديمة يغير مني ومش ذنبي انه في الشكل طلع لامه مش لهلنا ومش ذنبي ان مآب حبتني نا طبعا كنت انظن انها حبتني 
ماسة بتهون عليه .. اكيد حباتك يا غيث غير كل وحدة فينا عندها مقياس لفارس احلامها ولما تتغير المقاييس تنتهي صورة فارس الاحلام
غيث .. وانت شنو مقاييس فارس احلامك
ماسة .. يحبني ويخاف الله فيا ومايظلمنيش وينظر ليا كانسانة من لحم ودم مش دمية جميلة الشكل وخلاص  انت مقاييس فارس احلامي ياغيث رغم المدة القصيرة انت لو شفتني الدمية الجميلة راك اقل شئ انك متواجد طول الوقت وانك تقعد في اي مكان نا فيه لكن لانك عكس هك احترمت وجعي ومشكلتي ورغم انك ماكنتش تعرف لكن كنت مصدق كلام امك ولو واحد اخرى ما دارهاش انت فارسي اللي تمنيته وعلى فكرة انت احلى بواااااجد من اسماعيل
غيث بحب .. اكيد داير خير في عمري عشان تكوني من نصيبي
ماسة .. حتى نا مش مغير انت وبعدين نحن طلعنا على موضوعنا
غيث بضحكة .. عندك حق ياستي ولد عمي حاليا يخططلي في شئ مش تمام ولان لتو مش عارفين من اللي معاه في الشركة يساعد فيه فحطيت حراسات عليكم وعلى عيلة عمي منير لانه عارف انكم نقطة ضعفي الوحيدة
ماسة بخوف .. شنو ممكن يدير
غيث .. الشجع والطمع والغرور يعمو اي انسان وزيدي معاهم الحقد والحسد مع ان والله لما خشيت للشركة كنت شبه منهارة لكن عشان سمعة باتي الله يرحمه لقيت من ساعدني وعمي منير ماقصرش معاي تي نحن بعنا ذهب امي وعمتي ماجدة لعلمك يعني تخيلي لشنو وصلنا بيش قدرنا نصبو على رجلينا بعنا ذهب صباينا وهذي حاجة مش ساهلة راه صح ربي قدرنا ورديناه لهن زيه واحسن منه لكن لما نتفكروها توجعنا راه
ماسة بفخر .. وهذي تصرفات الراجل الصح بس شنو متوقعه يدير
غيث بهدوء.. يقتلني او يقتل وحدة منكن
ماسة بشهقة .. يقتلك (ومسكت ايده) نا ما صدقت لقيتك رد بالك على روحك غيث على خاطري نا رد بالك على روحك
غيث .. ماتخافيش ماسة نا خوفي عليكم اكبر وبالذات انتي
ماسة بدون تركيز وهزة راس.. نا مش مهمة نا نملح لكن انت لا وراك امك وعيلة عمي منير وموظفين انت الاهم هنا
غيث وشد على ايدها .. حتى انتي غالية بغلاوتهم راه وحاضر حندير بالي على روحي بزيادة ياقلبي (وباس راسها )

ولان كل واحد ليه تفكيره وخوفه خشو لدار النوم وضمو روحهم لبعض ورقدو وناضو الصبح بقلوب محبة صافية رغم الخوف اللي جواهم هيا عليه وهو عليها وعلى عيلته وعدى وقت لاباس بيه وماسة ماطلعتش من الحوش بكل بيش ماتركبش على غيث ويقعد خايف عليها لعند يوم