#لاتترك_يدي
الفصل العاشر
غيث على نفس الحدة .. انا تو مسافر وممكن نغيب اسبوع او اكثر ديري بالك على امي وراك تنسي مواعيد دواها مش عشان هيا متساهلة معاك تسحبيني زيها والله العالي في سماه لو يصير حاجة لامي ونا مش قاعد ماتزرق عليك شمس ثاني يوم
ماسة ورعشة جسمها زادت لدرجة الكشيك اللي تخلط بيه طاح من ايدها وهزة راسها بمعنى به
وطلع غيث متنرفز وركز على رعشة جسمها وراسها اللي مبتش ترفعه بكل
وسافر غيث لشغله وماسة ارتاحت اكثر لانها عارفة غيث مش قاعد ورغم عرفها انه مش قاعد الا انها ديمة قاعدة بلبسها المستور وحجابها اللي مغطي نص وجهها
وعدت للمعهد ثاني يوم وصبا عليها شاب بس هيا ماردتش عليه وهربت من قدامه واليوم الثاني صبا عليها نفس الشاب ودارت زي اليوم اللي قبله
ياسين .. غير شنو تبي فيها هالنعامة
احمد.. عندي فضول قاتل نبي نتعرف عليها
ياسين .. غير عليش على عبايتها الكبيرة عليها والله شكلها اللي مافيش واحد فينا يقدر يزبطه كويس يا موطية راسها زي النعامة يا مقدمة العباية لعند عيونها
احمد.. ومع ذلك خاطري نتعرف عليها
ياسين .. استنى شوي
وعدى ياسين كلم بنت جابها وجاء
ياسين .. حنين احكي لاحمد شنو تعرفيه على النعامة
حنين بضحكة مكر .. وعليش شنو يبي فيها ما نا خير منها
احمد بتقزز .. الموضوع ماليشي علاقة بمن خير من مَن لكن بس نبي نعرف عليها حاجات من باب الفضول
حنين .. حيث كدا ماشي هي اسمها ماسة ومطلقة ومش من المدينة تسكن في الضواحي وانتقلت من الجامعة للمعهد لظروف ماحد يعرفهن رغم انها في الجامعة السنة الثانية جايبة الترتيب الثالث على دفعتها وجاية تقرا عند عرب هنا وشكلهم قريبين من المعهد عشان تروح على كرعيها
احمد.. ومنين عرفتي هذين كلهن
حنين .. قصقصة وحب فضول زي اللي عندك بالذات انها لا اختلطت بعيال ولابنات
ياسين .. به يا حنين تمام
وعدت حنين وخلت احمد في افكاره وكأن خلاص معاش في الا ماسة
ماسة
مشن الايام عادي وحاسة براحة بعدم وجود ولد عمتي حواء لكن نحس بحد كأنه يراقب فيا طول الوقت وخوفي زاد لاني خايفة يطلع ابراهيم وزدت انطويت على روحي اكثر حتى عمتي حواء نقعد معاها شوي ونخش داري ملتزمة بمواعيد دواها وانطيب مرة مرة وطول الوقت مقضيته يا نقرا قرآن يا نراجع في دروسي لان مافي شئ باقيلي الاقرايتي ومع ان نحس في احلامي كلها ضاعت لكن اهو شئ نسند بيه روحي
ويوم مروحة للحوش وحسيت بأن حد يمشي وراي نعرف الخطوات هذين ابراهيم كان هكي يدير ومن خوفي خذيت الطريق العام صح هكي الحوش بعيد واجد لكن نحس فيه امان ليا اكثر
ومشيت وخايفة موت وحاسة في اي لحظة قلبي حيوقف وقصيت الطريق شوي ونسمع اصوات السيارات وكأن صاير حادث والتفت وراي لقيت اللي كان يصبي قدامي في المعهد ونفوت فيه خابطاته سيارة ولاول مرة نفرح بضرر حد وقعدت نجري ونا نحمد في ربي انه صارله هكي بس دعيت يكون ضرره بسيط ووصلت الحوش وخشيت لقيت سيارة ولد عمتي حواء وحاوالت نهدي روحي من الخوف ماقدرتش
أنت تقرأ
لاتترك يدي
Short Story.. اصبر بس غير نتزوجه شهر شهرين بس ونجمع على قد مانقدر من الفلوس ونطلق منه .. به كيف بتخليه مايقربكش انتي ملكي نا بس .. كيد النسا بنستخدمه كل مرة بنديرله سبلة ولان هو يعبد التراب اللي نمشي عليه وحيتحمل ومايرضاش زعلي لانه اصلا مش مصدق روحه اني بجم...
