#لاتترك_يدي
الفصل السابع والعشرين
ماسة
كنت راقدة وحلمت حلم حلو
نفس الشخص اللي خلاني نتحجب ونفس الشخص اللي خلاني نطلع من حياتي مع ابراهيم حلمت بيه حط ايده على بطني وقالي صبي واقوي غيث بامس الحاجة ليك ونا نقوله غيث مات وهو يهز في راسه ويقولي لا
نضت مفجوعة وحطيت ايدي على بطني وسميت بالله وصبيت بشواش نتوضى لان حركتي صعبة بسبب ضعفي عارفة روحي ظالمة روحي لكن كله مر مافيش حاجة تستاهل بعد غيث
توضيت وصليت ودعيت وحسيت بحركة غريبة تحت فتحت الروشن شوي بدون ما نبان لاني في الاخير رابط وانتبهت للناس تروح استغربت هما اكيد تعشو بس كانو قعدو مجاملة لكن مش يروحو هك مرة وحدة حاجة محيرة وقلت تو نكلم نادين لكن ماعندي خلوق ننزل
حواء بصوت عالي ومسحت دموعها .. بارك الله فيكم عزاكم وصل وعزانا كمل ونردوها لكم في الافراح ان شاءالله
ام مآب باستغراب .. كنك يا حواء شنو في
حواء بهدوء.. خلاص عزاء ولدي كمل كل وحدة تتفضل على حوشها وبارك الله فيكم واسيتوني وواسيتو كنتي والعزاء ثلاثة ايام وبارك الله فيكم
مآب .. تلزي في الناس يا عمتي هك
حواء.. والله اللي عندي وقلته
وطلعت حواء لماسة تطمن عليها وخلت ماجدة ونادين يسقدو في الناس وحتى منير دار هك للرجالة ورغم عمام وخوال غيث ماعجبهمش لكن عارفين منير ومتاكدين ان حواء طلبت منه هك يدير وبعد ساعة فضى الحوش وبعد ما اطمنت حواء على ماسة نزلت وسيبتها تقرا في قرآن وقالت ليها ماتنزلش عشان الشباب حيكونو تحت
والتمو كلهم على محمد اللي واضح شكله ذابل وتاعب وباين عليه قلت النوم ودبشه اللي مش مرتب ولحيته المنكوشة
حواء.. قوللهم يا محمد
صلاح .. شنو يقوللنا وقبل كل شئ وين كنت شغلتنا عليك ساد فقدنا غيث (قالها بغصة ) مانبو نفقدوك
محمد ودمعة نزلت .. غيث ماماتش
كلهم بصدمة ماعدا حواء.. شنوووووو
محمد مسح دموعه .. غيث ما ماتش غيث حي
منير.. واللي مطرطش من الانفجار بتاع سيارته منو
محمد.. علي عثمان
راكان .. الساعي
محمد.. اه
نادين بدموع فرحة .. فهمنا يا محمد ماتخليناش ناخذو منك الكلام بالقطعة
محمد .. نا وغيث كنا شاكين في شوقي انه يخطط لغيث في مصيبة واللي زاد اكدها قاسم لي وبدينا ناخذو في احتياطتنا ويوم الانفجار قعد غيث ونا آخر وحدين او كنا هك نسحابو رواحنا المهم غيث قالي نكمل الاوراق اللي عندي وهو بيطلع قبلي بيطلع هو وماسة وقبل مايطلع غيث دق الباب ولقينا علي قاعد استغربنا قعاده لكن قال كلام واضح انه حافظه حفظ
صلاح بشك .. كلام شنو
محمد.. قال انه محتاج وقعد آخر واحد عشان بيش يحكي معانا برواحنا لكن الكلام ماكانش مقنع لانه لو يبي يحكي معانا حتى والموظفين قاعدين قدر يحكي معانا برواحنا وطبعا زي العادة غيث وعده انه يساعده وبكرة يجيه يحكيله الموضوع بالتفصيل وتو هو مستعجل بيطلع
راكان .. وانتم ليش قاعدين موخر
محمد.. بنخشو صفقة ومن بعد ما شوقي حاط غيث في راسه وان في حد في الشركة ونحن مش عارفينه فكنا نغيرو في ارقام الصفقة بعد مايكونن الارقام الاولى مرت على المواظفين بتاع المناقصات عندنا لان مش متاكدين انه يكون واحد منهم اللي تابع شوقي وكنت وقتها بنكملهن ونطلع طول انسلم المظروف وغيث عشان يبعده على الاوراق قاله يطلع يسخن السيارة وعطاه المفتاح وفي جرته طول طلع غيث بعد ما اكد عليا انشمع الظرف واصلا نا وقتها كنت كملت شمعت الظرف وطلعت وفي الوقت هذا علي كان راكب في السيارة وغيث عند الاستقبال ونا عند باب اللي يدخل على المكاتب وعلي شكله ولع السيارة انفجرت
ماجدة بشهقة .. وغيث
محمد ودمعة خانته .. غيث من قوة الانفجار دفه نين ضربه رخام مكتب الاستقبال وتنطر عليه باب الشركة
حواء بفجعة .. ينعلي يا ولدي
منير .. وشنو صارله ووين هو تو
محمد.. في مصحة خاصة ماحد يعلم عليه
حواء بدموع .. شنو صارله يا محمد غيث
محمد.. نزيف داخلي بس الحمدلله قدرو يوقفوه لكن عنده كسور واجد في القفص الصدري وفي اليد والرجل بتاعت البلاتين اطرو يحولوه وركبو غيره وحولو جزء من الكبد لان قطعة من السيارة انرشقت فيه ورضوض واجد وحالته قاعدة خطيرة وحاليا في غيبوبة
راكان بصدمة ومش مستوعب .. ليش
محمد.. ليش شنو
راكان .. ليش قلت لينا مات ليش قهرتنا عليه والله تسحاب روحك انت بس اللي تحبه
منير بصوت حازم .. راكان
راكان .. ماهو يا باتي غيث خونا حتى هو
منير .. اكيد في سبب احكي يا محمد
محمد بتعب معاش قدر يحكي فكملت عليه حواء
حواء.. غيث كان يقولي مهما يصير يا امي كان ماشفتونيش بعينك ماتصدقيش
نادين .. بس انتي كنتي تبكي من قلبك واغمى عليك
حواء.. اغمى عليا لاني ماتخيلتش انفجار ونبكي من قلبي لان قلبي حاسس ان غيث فيه حاجة
صلاح .. اصلا الرقم اللي بلغك معاش فتح بكل ولتو مقفل نبو نعرفو من
محمد.. اكيد حد من طرف شوقي واكيد غرضه ان حتى عمتي حواء تلحق على غيث بسبب مرض قلبها
حواء بلهفة .. نبي نشوف غيث
محمد.. تو صعب ياامي
حواء.. انت عارف قديش تمنيت تقولي امي
محمد.. انتي امي الثانية عمرك مايكون عندك شك
حواء.. ليش به مانقدرش نشوفه
محمد.. اولا الشرطة متابعة كل شئ واحتمال تكوني مراقبة او كلنا مراقبين وهذا ليش نا ماقدرتش نجي من البداية نين اطمنت على غيث ان النزيف وقف وحتى نا تو معاش نقدر نمشيله نين نعرفو من اللي دار هك بالدليل
ماجدة .. به وماسة
حواء.. خلوها تو
نادين .. بس يا عميمة ماسة تاعبة ومش كويس عليها
محمد بخوف .. كنها شنو فيها
نادين بضحكة من بين دموعها .. ماسة حامل
محمد بفرحة .. والله
ماجدة .. اه يا ولدي حامل
محمد.. الحمدلله يارب بالك هذا اللي يطلع غيث من غيبوبته
حواء.. كيف
محمد.. لما سئلت الدكتور كيف يطلع من الغيبوبة قال لما تستقر حالته اندورو على محفز
صلاح .. ليش ماسفرتوشي برا
محمد.. مش كويس على صحته لكن سبحان الله المصحة من حظ غيث ان في دكتور زاير وهو اللي صبا على علاج غيث ودارله العملية
حواء..ربي يعجل في شفاك يا ولدي
منير .. وبه هل علي عندهم علم
محمد .. لا الشرطة قالت لازم نأجلو تخبيرتهم
صلاح .. به كيف بتكشفوه
محمد.. شوقي حول الكاميرات اللي في مكتب غيث كلهن ونحن هضا شئ متوقعينه فكنا حاطين كاميرا في مكان مايخطرش عليه ومعاها تسجيل مكالماته
صلاح .. خطرها عماد جاء (وحكى صلاح الكلام اللي قاله لهم عماد)
محمد.. تمام بكل وتفكير سليم تو نتصل بالمقدم سراج ونقوله بيش يحط حماية ومراقبة لعماد
راكان .. من التفجير غيث وعلي بس اللي انضرو
محمد.. هو لولا رحمة ربي بيا اني تأخرت ثواني بس راه اللي صار لغيث صارلي
حواء.. الحمدلله ربي عارف مالينا الا انت بعد غيث
محمد.. لكن انصاب واحد كان مخطم بسيارته وانضر حتى هو بس مش زي غيث
راكان .. اقل من غيث اصابته
محمد.. اه كسر في ايده ورجله وكدمات وجرح في راسه كبير بس حالته مستقرة ووحدين اخرين لكن اكثرهم رضوض عالجوهن وطلعو
أنت تقرأ
لاتترك يدي
Short Story.. اصبر بس غير نتزوجه شهر شهرين بس ونجمع على قد مانقدر من الفلوس ونطلق منه .. به كيف بتخليه مايقربكش انتي ملكي نا بس .. كيد النسا بنستخدمه كل مرة بنديرله سبلة ولان هو يعبد التراب اللي نمشي عليه وحيتحمل ومايرضاش زعلي لانه اصلا مش مصدق روحه اني بجم...
