لاتترك يدي

الفصل التاسع والعشرين

#لاتترك_يدي

الفصل التاسع والعشرين

ماسة .. زهرة ... اسماعيل

شد غيث على ايدي اكثر وهمسلي لما كرني شوره

غيث بهمس.. زهرة صاحبتك واسماعيل ولد عمك صح
ماسة هزيت راسي بس
زهرة بتوتر .. ماسة شنو اديري هنا
ماسة بثقة وقررت اني مانبين شئ ليهم من خيبتي في ولد عمي ونوريه اني ماخسرت شئ .. انتي اللي شنو اديري هنا
زهرة وارتبكت شوي.. جاية نزور في راجل مروة
ماسة .. ونا قاعدة احذا راجلي
اسماعيل بعد ما استوعب وطلع من صدمته  .. كيف حالك يا ماسة
ماسة .. الحمدلله بالف خير
اسماعيل .. وينك يا ماسة ليش ماجيتي لهلك يدورو فيك
ماسة .. حاجة ترجعلي ملكش دعوى
اسماعيل .. نا ولد عمك تكلمي معاي بي احترام
ماسة بضحكة استهزاء.. ولد عمي اه صح ولد عمي اللي مكلفش روحه زيه زي خوتي يدور عليا او يعرف او يفهم شنو صارلي  ومعاها تزوج صاحبتي وعايش حياته
اسماعيل بصدمة بانت على وجه .. زهرة صاحبتك
ماسة .. اه صاحبتي واول ما طلعت من منطقتنا كانت اول باب اندق عليه يساعدني وشهادة لله ماقصرت
زهرة وخوف بان على وجهها وبتغير الموضوع .. الف لاباس على راجلك يا ماسة
ماسة .. ماتشوفي باس ان شاءالله

وقبل مانحكو حاجة اخرى بالذات ان اسماعيل مازال بصدمته ومافهمتش شنو السبب او مافكرتش ومابيتش نشغل عقلي ونا ما نفكر في شئ غير ان هالمواجهة هذي صعبة عليا واجد وقبل مانقول حاجة اخرى خشت امي وطلبت منهم بكل ذوق انهم يخلو غيث يرتاح وحتى ابراهيم محتاج للراحة واي كلام ثاني يتأجل وحمدت ربي ان امي دارت هك لان فعلا قلبي مش متحمل نقاش اخرى وواجد عليا اسماعيل وابراهيم في وقت واحد

غيث .. ماستي انتي كويسة
ماسة وبست جبينه .. طول منا امعاك اكيد كويسة
حواء.. سبحان الله كيف اجتمعو كلهم في وقت واحد
ماسة .. انتي ليش طولتي ماخشيتي
لما طلعتي مع عمي منير
حواء.. كنا انتاقشو على السفر ومن بيمشي مع غيث وبعدين فطنت بالعيل اللي خش الجناح وخشت امه في جرته ولما خشيت وراها سمعتك قلتي اسمها فقررت نقعد برا قلت كويس ليك المواجهة معاها وبعدها كل مرة حد خاش وكل ما بنخش نعرف انهم من ماضيك وهك نين حسيت الموضوع زاد عن حده وقررت انخش
ماسة .. الحمدلله انك خشيتي لاني مش مستعدة نسمع لترهات ولد عمي على الهل في الوقت زي هذا
غيث .. ماسة تقريبا جاء الوقت يا قلبي تزوري فيه هلك
ماسة .. مش تو يا غيث
غيث .. ليش
ماسة .. عشان بنمشي نا وياك مانبيش نمشي بروحي انت قوتي يا غيث
غيث بضحكة خفيفة .. ربي يحفظك لي
ماسة .. منو بيسافر مع غيث امي
غيث .. اكيد عمي منير
حواء.. وصلاح
غيث .. ليش يا امي عريس هو
حواء.. مباش على قد مادرت فيه نا وباته سكر راسه ولما وحل معانا قال بعد مايروح غيث تو نخليه يطلعني شهر عسل على حسابه فسكتنا معاش عرفنا شنو نقولو
غيث .. طول عمره زي سراج الله يرحمه معاي ربي يهديه هناك واحد يسيب مرته وهو عريس مازال
حواء.. شنو بنقولو حمار وسكر راسه
صلاح وهو خاش .. منو الحمار هذا
غيث .. انت
صلاح .. حرام عليك اخر عمري حمار
غيث .. اهناك واحد يسيب مرته وهو عريس مازال
صلاح .. نا مستحيل نسيبك
غيث .. ماهو عمي معاي
صلاح .. عمك معاك لكن نا نعرف الماني كويس وصحتي كويسة لو بنطر نرفعك او نساعدك وبعدين يا سيدي اصلا نا طامع في شهر عسل والمكان تكلفته غالية فقلت اندير معاك كبيرة بيش تردها لي
غيث .. منغير ماتمشي معاي وين ماتبي احجز من بكرة
صلاح .. لا وكلمة قلتها وبعدين انسام شكلها تتوحم ووحمها جاي عليا
حواء بفرحة .. والله تاكدتو
صلاح .. اه تاكدنا اليوم
غيث .. الف مبارك والله فرحتني
صلاح .. بيش ماتبقاش انت اب بس واه كان ولد سراج بيكون اسمه للعلم بس
غيث.. خوذ راحتك انت الاحق انك تسميه
ماسة .. الف مبارك وربي يفتح عويناتها على خير يارب
صلاح .. الله يبارك فيك ان شاءالله يارب انتن الاثنين