لاتترك يدي

الفصل الثاني والعشرين

معليش وخياتي راه النت عندي يطلب في النجدة
#لاتترك_يدي

الفصل الثاني والعشرين

حواء.. اول حاجة تبدي بالدبش
ماسة بعدم فهم .. كيف
حواء.. تلبسي زي اي ولية تلبس لراجلها يعني دبش قصير وضابط ومخصر مش واسع كانهن قفاطيني
ماسة .. صعب يا عميمة مرة وحدة اندير هك
حواء.. ومن قال مرة وحدة بالشوي على الاقل البسي مقاسك وزي قفطان اليوم حلو عليك
ماسة .. جابه ليا غيث وهو اللي خلاني نلبسه اليوم
حواء.. شفتي كيف بسيط تغيرك للبس
ماسة .. بس نا ماعندي شئ
حواء.. حنشرو بكرة
ماسة بتردد.. عميمة
حواء.. نعم
ماسة ..بس نا نبي نسمع ان غيث يبيني لان مرات انتي ونادين من كثر ماتبو حياة غيث مستقرة خلاكم تشوفو انه يبيني
حواء.. هذي بس ساهلة لما نرن عليك كان ماسمعتيش مني كلمة الو معناها ماتقولي شئ واسمعي متفقين
ماسة .. تمام

وبعد وقت اذن الفجر ولهذا عدى للصلاة وروحو وحواء قالت لغيث لما يروح من الجامع يركب ليها وفعلا ركب ليها غيث واول ما قعدو برواحهم حواء رنت على ماسة زي ما اتفقن

غيث .. ان شاءالله خير يا امي
حواء.. خير يا ولدي باذن الله بكرة نبي فلوس واجد عشان نبي ناخذ دبش لماسة
غيث .. حاضر يا امي بس هيا ان شاءالله توافق اصلا اللبستين هذين خذيتهن لها اجبار راه
حواء.. ماعليك انت بس بنسئلك
غيث .. نعم
حواء.. تبي ماسة يا غيث
غيث .. كيف نبي ماسة
حواء.. يعني بعد ماتشفى تبيها تكمل معاك
غيث .. زعمك هيا تبيني
حواء.. مالكش دعوى بهيا شنو تبي نا نسئل فيك انت
غيث .. عارفة يا امي لو ماسة تقولي بتكمل معاي بس بشرط اني اندير عملية تجميل لتشوهي صدقيني حنديرها تو لو تبي
حواء بصدمة .. جديات تقول انت
غيث بتنهيدة .. نحبها يا امي نحب برائتها وهدوئها نحب روحها وحاسس انها حلوة زي وجهها نحب حبها ليك نحب كل شئ فيها
حواء.. الله يطمن قلبك يا ولدي
غيث .. لكن ابصر هيا تبيني او لا والله غير شايفتني طوق نجاة ليها وخلاص
حواء وهي تخبط علي يديه بالراحة .. بكرة حتعرف بروحك

وطلع غيث نزل للشقة وماسة كانت فرحانة من كلامه وقررت انها ترجع زي ماكانت الشجاعة اللي ماتتحشمش في قولت حاجة تبيها وانها تتمسك بلي تمسك بيها وطالما غيث يحبها بالشكل هذا لازم تبين ليه
وفعلا ثاني يوم نزلو للسوق وشرت بمساعدة حواء ونادين وماجدة احلى دبش ومشن للكوافيرة وبرمت على روحها هيا ونادين وبعدها تكو على مطعم اللي ديمة يفطرو فيه وفطرو والمرة هذي على طاولة وحدة مش مفصولين والجو السائد عليها ضحك وسعادة بالذات البصارة بين نادين والشباب وبعد ماكملو الفطور طلع غيث كيس وحط قدام كل وحدة علبة

نادين مسكت العلبة وعرفت شنو فيها .. ماتقولوهاش الساعة اللي نبيها
غيث .. والاصلية  اخرى لا كوبي درجة اولى ولا عاشرة من الوكيل بروحه
نادين بفتحة فم .. تبصر صح
صلاح .. تي مدفعنا مبلغ وقدره وتقوليله يبصر
نادين .. انتم تتكلمو على تقريبا1000 جنيه ليبي ومعاه 
ماسة فتحت العلبة ولقتها نفس ساعة نادين وبشهقة .. حتى نا زيها عليش
غيث .. مايغلى عليكن شئ وحتى امي وعمتي جبتلهن زيها
ماجدة .. نحن مانا صغار تجيبلنا زيها
حواء بضحكة.. قوليها لروحك يا حنة اما نا ماني كبيرة تي انا اكبر من بنتك بالك عشرة عشرين سنة هك
منير .. العمر كله ليكن انت الاثنين يارب
كلهم .. يارب
راكان .. بعدين يا امي اضني بتاعتكن فيهن اختلاف شوي
نادين .. نا والله لما نقنقت عليها كان قصدي حتى الكوبي بتاعت 600 جنيه مش الاصلية بتاعت الوكيل
ماسة باحراج .. والله حتى الـ600 ماهن حاجة ساهلة (وبصوت واطي لكن سمعنه نادين وحواء عشان هنا اللي احذاها ) تي انا اغلى لبسة شريتها في حياتي  كانت مية وخمسين مش نلبس ساعة بالمبلغ هذا
محمد انتبه لماسة كأنها تاثرت وحب يطلعها من الجو بسرعة .. طبعا اكيد مستغربة شنو سبب الهدايا هذين صح يا ماسة
ماسة بهزة راس
غيث .. هذا يا ستي زي مايقولوله التوانسة ملح القهوة
ماسة باستغراب  .. ملح القهوة شنو هو هذا
منير .. التوانسة في ليلة العيد او يوم العيد الصبح بعد ما الام اضيف عيلتها قهوة الصبح يحطولها في السفرة حاجة ذهب او فلوس كل واحد وامكانياته عشان يقولولها شكرا على تعبك في الشهر الفضيل هضا
ماسة بفهم .. اه هو انتم فيكم عرق تونسي
غيث .. لا والله نحن اصلنا من غريان من جد الجد لكن هذا جد جدي كان ساكن في بلاده اللي هيا غريان  وبحكم المنطقة الغربية قريبة من تونس فكانو توانسة واجد يشتغلو غادي فكان جد جدي عنده جار تونسي وهو اللي حكاله شنو يديرو وجدي حبها العادة هذي بالذات انه كان يشوف في مرته وبناته قديش يتعبن مع هضاك الوقت اللي كانت حتى النار مش غاز حطب وانتقلت بين رجالة عيلتنا لانها عجبتهم حتى هما 
ماسة .. وشنو جيبكم لبنغازي طالما اصلكم غريان
غيث .. الرزق زمان كانت الناس اتبع في رزقها ولما جاء جد جدي لبنغازي استقر وعاش فيها لدرجة نحن الجيل الجديد مانعرفوش عيلتنا اللي في غريان
ماسة .. فعلا واجد ناس جو لبنغازي عشان الرزق والشغل وزي مايقولو رباية الدايح
راكان .. هو هضا
ماسة .. وحتى انتم قصدي عمي منير اصلكم غريان
منير .. لا نحن اصلنا من شحات وزي اللي جاب جد جد غيث من غريان جاب جدنا من شحات بس نحن عاد نعرفو هلنا وتو تشوفي كبر العيلة في فرح الشباب
ماسة .. ان شاءالله