لاتترك يدي

الفصل الخامس عشر

معليش عزيزاتي كنت مريضة وهذا وين صحصحت شوي ونسيت نوقض الصابرة بيش تنزل بدالي وعلى العموم نفكر اني انزل الباقي في جرت بعضه بالذات ان النت عندي الفترة هذي تاعب والصابرة تعاني من انقطاع الضي معظم الوقت
وشكرا لكل من سئلت عليا ونعني مانفقدكن

#لاتترك_يدي

الفصل الخامس عشر

حواء.. اللي نقصده انك لازم تركبي تقعدي مع غيث في شقته
ماسة بصدمة .. شنو
حواء.. لان شنو بنقول للناس وهما يشوفو فيك ترقدي في دار بروحك تحت ترا قوليلي
ماسة ودموعها نزلو .. صعب يا عمتي صعب يجمعني بيه حوش واحد
حواء.. ماهو يا بنتي مانبي قصة زواجك كل واحد يعلم بيها هيا نادين ومحمد ونحس فيهم واجد
ماسة وزاد بكاها .. شنو ندير يا عمتي ما نقدرش مانقدرش
حواء.. اهدي يا بنتي اهدي هو غيث مش حتجتمعي معاه صدقيني
ماسة وهدت شوي .. كيف ونا بنكون في حوشه
حواء.. اول حاجة غيث في شهر رمضان من اول مايوعى وهو برا ولما يروح يقضي في الوقت في المربوعة الخارجية عشان ديمة يكون معاه حد ومايخشش جواء الا لما بيرقد وبما ان خوت محمد حيجو حيقضو الوقت مع بعض في جناح الضيوف برا وبعدين شقة غيث مصممة بنظام اجنحة وفيها ثلاث اجنحة حتى لو قعدتي انتي وياه في مكان واحد مع بعض كل واحد فيكم بجناحه
ماسة ومازالت خايفة .. يستر الله يا عمتي

حواء حست براحة لان خطتها ماشية كيف ماتبي وجاء وقت غيث

غيث بعصبية .. شنو شنو يا امي قلتي
حواء.. اللي سمعته ماعنديش استعداد انخاطر بسمعة البنت وسمعتك لما تشوفها ماجدة راقدة في دار بروحها ومش معاك
غيث وحاول يكون هادي .. به يا ستي نا متقبل لكن هيا تي نا من يوم عقدت عليها وشفتها كله على بعضه مرتين بس والمرتين هذين بتموت من كثر ماهي ترعش
حواء.. ماتخافش عليها هيا حتكون في جناح وانت في جناح واصلا انت معظم الوقت تقضي فيه برا وهيا حتقضيه هنا لكن وقت النوم هو بس اللي بيجمعكم
غيث .. تعرفي يا امي نا حاسس ان وراك حاجة بس شنو هيا مش عارف بس نحب نقولك من تو اذا قصدك بالحركة انك تقربينا من بعض فريحي روحك حتى لو نا قبلتها هي لا مستحيل تشوف او ترضى بمشوه زيي وهي بالجمال هذا
حواء.. حرام عليك يا ولدي تقول على روحك هك
غيث .. نا طالع يا امي

ماسة
نا كنت جاية بنسئل عمتي على حاجة لكن لقيت معاها ولدها وجيت بالزبط وهو يقول لعمتي انه حاسس انها تخطط لشئ واستغربت كلمة مشوه ولعنت الخوف اللي عندي عشان مش قادرة نشوفه ونشوف تشوهه رغم اللي سمعته من كلام البنات يوم الحفلة يقول عكس هك طبعا غير وعارته بس ودعيت لربي ان يشفيني بيش نقدر نعيش حياتي بسلام
وطلع ولدها ونا رديت لمكاني بسرعة بيش مانتلاقاش نا وياه وخشيت لعمتي

ماسة .. عمتي بنسئلك
حواء.. تفضلي
ماسة .. من امتى بنركب فوق
حواء.. هو ممكن بعد بكرة او اللي بعده يحددو رمضان والحاج منير اتفق اليوم مع العمال ومن بكرة بيجو يقعدو معانا حتى الشباب جابو دبشهم وحطوه في جناح الضيوف امبدري والصبح تو تلقي نادين على راسك اذا مش الليلة
ماسة .. يعني نرفع دبشي من تو نحطه فوق
حواء.. اه بس استني غيث يغير دبشه وينزل عشان نركب نا وياك وتشوفي جناحك وين
ماسة بي احراج .. عمتي قلتي لغيث وشاورتيه على مكاني
حواء.. اكيد بنتي