لاتترك يدي

الفصل التاسع عشر

#لاتترك_يدي

التاسع عشر

غيث بتنهيدة .. ماسة تاعبة
ماجدة .. اسمالله الكريم كنها
غيث .. كان فطنتو بماسة انها ماتكونش في مكان فيه الشباب رغم ان نحن عيلة وحدة
صلاح .. صح فطنا بيها لكن قلنا ممكن بسبب تدينها
غيث .. ماسة صايرة ليها ازمة قديمة شوي لكن اثرت على نفسيتها واجد واصلا نا بيش تقبلتني خذيت وقت طويل لكن بوجودكم معاها بدت الحالة تتأزم عندها
صلاح .. ساهلة يا غيث نروحو
غيث .. لا مش هذا الحل اصلا امي لما جابتكم لحوشنا بحجة الصيانة تسحاب ماسة تو تخف الحالة عندها لما تعود عليكم شوي بشوي لكن صار العكس وهذا ليش طلبت من امي تجيبنا هنا لمصر عشان بنعرض ماسة لدكتورة نفسية واليوم نقلتها للدكتورة
حواء بلهفة وخوف .. شنو قالت
غيث بتنهيدة واضحة .. قالت الدكتورة ان حالتها متأزمة وفي حاجات في الوقت الحالي لازم انديروها بيش نساعدوها
ماجدة .. اللي تقول عليه الدكتورة ديره مرتك طيوبة والله ماتستاهل
غيث .. وهذا ليش جمعتكم
منير.. قول يا ولدي
غيث.. الدكتورة حاليا طلبت اني نفصلها عليكم كلكم بالذات انتن( وهو يشير على حواء ونادين ) 
نادين وحواء.. نحن ليش
غيث .. مش عارف السبب لكن قالت اقرب حد ليها لازم يبعد الفترة هذي ومايكونش عندها اختلاط بحد من الشباب واختلاطها بيا نا بس 
محمد.. ساهلة هذي
غيث .. عارف انكم اسهل حاجة لكن امي ونادين هنا المشكلة
منير بتفكير .. نردو لليبيا
حواء.. مع ان قلبي مش حيتحمل بعدها لكن طالما صالحها هالشئ هذا نردو لليبيا
غيث .. لا مش حل لان العيد بيجي وهيا مستحيل حتعيد بعيد عليكم شنو يعني بتعدو لليبيا وتردو
ماجدة .. امنا شنو الحل
غيث بحيرة .. مش عارف
راكان .. نا عندي الحل
كلهم انتبهو ليه
راكان .. عارفين محسن صاحبي
منير .. اه كنه
راكان .. عندهم شقة هنا ومايجوش الا في الصيف بس والصيف هذا باتهم مريض فمش حيجو نتصل بيه ونخليه يكلم البواب ناخذو مفتاحها ونعدو نقعدو فيها وغيث يقول لماسة ان في حاجة صايرة في العيلة ولازم عميمة حواء تروح وانت بتتطر تقعد مع ماسة فهذا ليش نحن مش حنسيبوها وعميمة تقوللها فترة بس وتوعدها انها تجي قبل العيد وهكي نعتبرو باعدنا عليها وما اطريناش نسافرو
صلاح .. وانت يا غيث تسيب الشقة اللي تحت وتركب هنا
نادين .. لا مايسبهاش لان هك ماسة حتشك بما ان عالعيد حنكونو هنا معناها حتقعد فاضية
صلاح .. صح غابت عليا
غيث .. مش عارف شنو نقوللكم
منير .. ماتقول شئ انت ولدي ونحن عيلة وحدة
راكان .. ولما تكون مرات خونا تاعبة لازم كلنا انساعدوها
محمد.. وبيش مايصيرش اي لخبطة المكان اللي بنكونو فيه لازم حد فينا يبعث رسالة للاخر عشان مانتلاقوش بالغلط

كلهم اتفقو وبدو ينفذو راكان كلم صاحبه وعدى جاب المفتاح وامي والشباب ونادين وتو الدبش وبرمو عالشقة ونزلت امي لماسة تحت بيش تحكي معاها ونا قعدت فوق

محمد.. حبيتها
غيث .. مش عارف شنو اللي حاسس بيه
محمد.. خايف
غيث .. نكذب كان نقول لا
محمد.. ليش
غيث .. فرحان انها بدت تخطي اول خطوة في علاجها ونبيها تكون انسانة سليمة وقوية زي ما كانت لكن خايف بعد ماترجع قوية تنتبه لتشوهي وتسيبني ونا في هذاك الوقت نكون خلاص مش قادر نعيش بلاها يكفي جرح مآب لتو مازال معلم فيا
محمد.. ليش حاط انها حتسيبك
غيث .. ومن اللي ترضى بمشوه زيي مآب ماتجيش في ربع جمال ماسة ومع ذلك سيبتني بي ابشع الكلمات حبي لها ماشفعش ليا عندها لابال ماسة اللي ماتعرفنيش كويس وماشافت مني شئ غير غيث اللي تو
محمد.. صدقني ماسة غير والايام بينا ويكفي انها اختيار عمتي 
غيث .. يستر الله