💛جزء من الذاكرة 💛|مكتملة|

🌼 الفصل التاسع 🌼

                       🗾 الحنين 🗾

......ظلام الليل فراض داتو و نور النجوم و الهلال معاهم عاطي إطلالة ملكية للمكان.....جالسة فوق نص شجرة و مسرحة رجليها و كتخنزر فيه و هو بدورو واقف كيشعل في العافية بأريحية و غير مبالي بنظارتها القاتلة لي كتربص بيه.....كيهز عينيه فيها و كيبتاسم إبتسامتو المعتادة تلك الإبتسامة المجنونة لي مخلايه مزال يتيق فيها و مخليها حرة طليقة قدامو ما خايفش منها و لا دايرها في بالو غير مستمتع باللعب معاها....عارفها ماشي من نوع لي كتنسى و هو كذلك كيف لعب عليها  حتى هي غادي ترجع دقتها و لكن ما يهمش الأساس أنها قدام عينيه فقط.....شعل النار و حط فوق منها أعواد مختارقهم أسماك و رجع لشوفاتو و حركاتو المجنونة......كانت كتراقب و كتحقق في لغة جسدو ما عرفاتش هاد برودة كيانو منين جابها كتسنى نهايتها فأي وقت و تكون هي دابا فوق العافية كتشوى.....دقائق و لا ساعات و لا جزء من الثواني  يمكن تموت و خططات خطتها قبل باش حتى إلى غدرها ترجع دقتها مضوبلة....وقفات من بلاصتها و تقدمات لعندو بخطوات ثابتة و ديك النظرة الجريئة تعلو تغرها.....جلسات حداه و هزات إديها و غرقاتهم فشعرو كأنها غادي تقلع ليه راسو من بلاصتو قربات و كلماتها كيخرجو كأنهم فحيح افعى كيتربص بيه....

•ناردين: ما عرفتش موتي كيف غادي تكون أ إسكندر...

وقفات من بلاصتها و مشات لجهتو لأخرى و عودات نفس حركتها....ضحكة جنونية تسمعات و يا الله غادي يخرج صوتو و حطات صبعها لمزين بخاتم دات جوهرة سوداء على فمو....حس بقلبو تزعزع من بلاصتو كان وجهها قريب لشفايفو حس براسو نتاقل من الارض لكوكب آخر سميتو ناردين...

•ناردين: يمكن مذبوحة و لكن لا هاد شي قليل على شرفي.....

وقفات مرة أخرى و جلسات مربعة قدامو يديها فوق ركابيه و هو متبع هاد تراتيل السحرية لي كتطبقهم عليه....دون أدنى محاولة ينطق بأي كلمة...

•ناردين: و لا مسلوقة.....إسكندر خصك تكون أكثر خطورة من هاد شي....بغيت شي موت إستثنائية ديالي بوحدي...

....بقى ساهي فيها لدقائق كيفاش كتعبر و تحرك إديها كيفاش كتخبي داك لخوف و لا كتحرك عينيها و حجبانها كان غارق في تفاصيلها لأخرهم ....و هنا غادي يتقلاب كلشي و لعب غادي يتحول من خطر لأشد خطورة....شد في إديها و وقفها قدمو و رجعات هي جالسة في بلاصتو و هو مربع رجليه....هز سبابتو و حطها على شفايفها و دوزها لحنكها كأنه كيدير خط و من بعد لعنقها ضحك ضحكة جوكارية و وجه حدة نظراتو لعينيها.....

• إسكندر: ناردين يا ناردين تخيلي معايا كون كان صبعي موس اش كان غادي يوقاع....جمالك لأخاد في رمشة عين مشى...

هزات حجبانها بعدم الاهتمام و هزات صبعها و قربات لبؤبؤ عينيه...

• ناردين : كتعترف بلي أنا جميلة..... إسكندر إسكندر تخيل معايا كون كان صبعي فردي اش كان غادي يوقاع.....خصارة ما كنتيش غادي تشوف هاد الجمال...