عشق الضواري

بارت5

لحد ما فد يوم بليل تخربط عمج هيثم صار عنده تسمم وصار يصرخ من الالم ركض ابوج نقله بسيارتة للمستشفى ابوج جان متعلق بهيثم ويعتبره صديقة وكاتم سره، وهيثم كذلك ، بطريق الرجعه وصلو قريب ع البستان وجان نسمع صوت طلقات بره ، اول واحد ركض عمج مشعل وعبد الله جانو الاقرب للباب ولحكهم جدج شافو سيارة ابوج من بعيد واكفه وبيبانها مفتحه وسيارة بيضه حركت ومشت بكل سرعتها من المكان ركضو تجاه ابوج وهمه يصيحون بأسمه واسم هيثم لحد ما وصلولهم لكوهم غاركين بدمهم ابوج حاضن هيثم، عايف مقعده وشامر نفسه على هيثم وضهره مشخل بالرصاص لمن طلعوهم لكو هيثم بيه روح بس ابوج مالحكو عليه توفى بساعتها وهيثم نقلوه للمستشفى والحمد لله كدرو ينقذوه ، واهل الولد تحاسبو والجُناة انسجنو والبقية ترحلو من بيوتهم وعافو ديرتهم ، هيثم دخل بحالة نفسية صعبة وصار ميكدر ينام ولمن يغفى يفز يصرخ ويكسر كلشي كدامه ويصرخ ويلوم نفسه ،
بقيت عدهم سنه كامله صار عمرج ست سنوات وردنه نسجلج بالمدرسة لكن كعدت على مصيبة الصبح والبيت صاير ضجة وصياح وحجي نزلت جوة اجت عيني بعين فيحاء راسن عيونها دمعت ودنكت راسها بحزن، بعد مانتبهولي ركض عمج راشد لزمني من حجابي وسحلني گدامهم وهو يضربني ويغلط ويسب مافتهمت على شنو ديضربني لحد ما صاح بيه جدج وكله عوفها خل نفتهم منها ، كعدوني بنصهم وكلهم داير مدايري يباوعولي بنظرات كلهه نار وشرار عبالك يردون ياكلوني كال جدج بصرامة وحزم .

ضاري: البارحه شعندج طالعه وره البيت بالبستان ساعه ٣ الفجر تحجين ويه زيدان

أنصدمت بالي سمعته بالبداية بس بعدين لمن باوعت لبدرية وشفت ابتسامتها الخبيثة عرفت هذا ملعوب منهن . . طبعآ حاولت ادافع عن نفسي وعمامج انقسمو نصين نص يدافعلي ويكولون ماعدها شي لتضلموها ونص اتهموني بشرفي وصدكو بحجي النسوان اني الي قهرني جدج ماهمني اي واحد منهم بس جدج جان مثل الي ماكله الشك بالبداية كال احجي اشرحيلنا شعندج تحجين وياه بهيج وقت . حلفتله بكل المقدسات والاديان وحتى بابوج المرحوم شفته تنهد بحسرة وصاح جيبولها عباية تستر نفسها وخلي يدخل زيدان . . بعد ما شمرو عليه العباية ولبستهه طب زيدان كعد كدام الشيخ مثل كعدتي بس بعيد عني
سئله الشيخ اذا الي سمعه صحيح لو لا وكله عندي ثلاث شهود شايفيكم .
باوعلي زيدان بنظرة غريبة وبعدها كال للشيخ وهو يعتذر والندم ماكله .

زيدان: ياشيخ والله نيتي شريفه وياها ورايدها بالحلال وماسوينا شي غلط من الي ابالكم اني بس التقيت بيها واتفقنا اجي اطلبها منك وهيه كالتلي عمي الشيخ باجر عنده كعدة يجوه ناس من البصرة عدهم طلابة يردوه يحلها تعاله عكب باجر وعلى اساس باجر اني جايك اطلبها على سنة الله ورسولة . . ارجوك ياشيخ لا تضلمنا وتحطم امالنا اني اريد اخذ منك الموافقة حتى اروح لاهلها اطلبها هم منهم .