عشق الضواري

بارت19

لحد ما اندفرت باب الحوش بقوة وانفتحت وطب زيد وجواد يباوعون لمحسن بغضب عيونهم حمرة وعروكهم بارزة من الغضب . . ثواني وجواد شمر نفسه على محسن وهو يضرب بيه موتة كتل صار وجه محسن خريطة ورم ودم ترس هدومه وزيد يباوعله بتشفي وهو يشوف جمانة ع الكاع امددة والتيشرت من يم الجتف مشكوك والرجال والشيخ يباوعون عليهم ويحاولون يسكتونهم لحد ماصاح زيد بجواد وكله كافي بعدين حسابه ، والتفت ع الرجال والشيخ وحاجاهم بزمجرة . . بعد ماعرف انه هذا هو الي جان ناوي يتزوج جمانة .

زيد: اول شي نزلو عيونكم عن بتنا . . وثاني شي انته يالشايب يالماتستحي على شيباتك جاي تتزوج وحده بكد بناتك هاي اذا مو ازغر منهن . . وهم بالغصب مو برضاها . . ومن خالها . . مافكرت ماكلت باجر عكبه يدرون اهلها واتحاسب . . لو هيه فالتوه صايره كلمن بكيفه .

راد يحجي ابو نبراس زمخ بيه كله اسكت ورجع كمل كلامه

زيد: وانته حضرة الشيخ الي تعلم الناس الحلال والحرام وتعرف حق الله وشرعه . . جاي تزوج بنية غصب عنها . . بلا بشكد اشترو ضميرك . . ماخفت الله وانته تسمعهم يغصبوها ع الزواجه هاي .

رد الشيخ بتلعثم وهو خايف من الورطة الورط نفسه بيها . . ماراد يثبت الحق عليه حتى مايتعرض للمحاسبة قانونيا وعشائريآ .

الشيخ: يابة البنية مسوية شغله منزلة راس اهلها وجابوني لهنا حتى يتزوجها الرجال ابو نبراس ويستر عليها وزين منه وقبل لان رجال يخاف الله وشافها يتيمة كال اتزوجها شهر بس كدام الناس تنستر ووراهه
كلمن يروح لطريقة واني ما وافقت ازوجها الا بعد ما سمعت وافتهمت السالفة وحجيت ويه الشهود .

صاح زيد بعصبية وغضب بيه .

زيد: ووينهم الشهود بالله خلي نشوفهم نحجي وياهم . . لو اشباح اعترفولك واختفو .

ارتبك الشيخ وماعرف شيجاوب تلاحكه ابو نبراس وهو يكول بثقه .

ابو نبراس: عمي تره البارحه صارت الكعده ويه ناس ثقة من المنطقة وحلفناهم وشهدو وهذا خالها شاهد . . وعن الحق الرجال بالبداية ما انطه ابت اخته وكال ماتسويهه بس من جبنه الولد حبيبها واعترف وحلف النه هوه بنفسه ، وهواي من المنطقة شايفينها تلتقي بيه بالهيكل الي براس الفرع مالتهم . . وخالها طلب مني اتزوجها شهر هيج بس ع الورق كدام الناس لحد ما تنسي السالفة واطلكها . . وهاي اني فوك ما جاي اسوي زين واستر البنية تتهجمون علينه .

صفن زيد على جمانة الي تباوع بحقد وغضب لابو نبراس وللشيخ الي واكف
بصفه ثواني وسمع جواد يكول .

جواد: وخالهه شني حتى يطلب منك تستر عليهه مافكرت وراهه اهل مو جان المفروض
يا ابن العشاير يالتفتهم . . تنصح خالهه الناقص وتكله خل نوصل خبر لأهلهه وهمه يتصرفون . . وبعدين شني انته وتستر عليها اذا صدك مسوية شي ولد عمها يسدون عين الشمس وبتنه احنه نستر عليها مانفرج الغريب .