عشق الضواري

بارت 39

ضحك الرجال بصوت خافت وهوه يقترب منها وچان يوگف وجه بوجه وياها وهو يحجي بخبث : يعني برأيج احنه نجازف ندخل لبيت شيخ معروف واله اسمه ومكانتة ابين الناس لو ما متأكدين انو الي بالبيت بس نسوان . . ومو اي نسوان حور نازلات من الجنة ع الارض وبعد ما شفنا جمالهن عن قرب مستحيل نكدر نقاوم واحنه مثل ما تشوفين عصابات وزايعتنا الدنيا ومو معصومين حتى نغض البصر ونقاوم الكيك الكدامنا .

كمل كلامه وهو ينزل عينه ويباوع على رگبتها الي كزبرت وجسمها الي انتفض برجفة خوف واضحة بلعت ريگها بغصة ورأسن كعدت بصف اختها واسيا وهيه تلزم كوشة تخليها بحضنها مرت ثواني وهو يباوعلها بنظرات حقيرة وخبيثة مثلة وبعدها اندار وهو يحاجي جماعته الي نزلو والتمو داير مدايرهم : اصعدو لغرفهن لتخلون ولا حاجة غالية بالبيت اريدكم كدامي بعد عشر دقايق ضبط نطلع وبدون اي اصوات عالية .

الكل هزو روسهم وبدون اي كلام ركضو وهمه يختصرون الدرجات ويصعدوهن درجتين درجتين ، مابقى يمهن غير القائد وثنين وياه والخمسة الباقين كلهم صعدو فوگ وڤيان تباوع بخوف لأختها واسيا وهنه يباوعلها بنفس النظرة والرعب باين على ملامحهن ، باوع القائد ل ايفان بتفحص خلاها تفتح عيونها برعب وهيه تحتضن اختها الي من خوفها حجت .

ڤيان : فدوة اخذو كلشي بس لتأذونا واحنه مرح نبلغ عليكم اطمأنو .

ضحك بصوت عالي وهو يرد عليها : ديلا هسة عساس اذا بلغتي رح يكمشونا لو يكشفونا من اول شهر . . لج بابا انتي بالعراق مو بغير دولة لتسويلي نفسج عايشة ببلد حكومته منصفة ونچرة تاخذ حق المظلومين . . بعدييين لتخافين يحليوة احنا لطيفين ويه الزغار مراح نأذيجن بالعكس رح تتونسن ويانة وحتى تنطونا بوسة شكر .

كال اخر كلامه وهو ينحني ويلزم ايد ايفان ويسحبها اله وبمجرد ما سحبها عليه فيان رجعت سحبت اختها بقوة وصارت كدامه دفعته وجسمها كله ينتفض برجفة وهية تلزم سچين الفواكه الي جانت فوك مقدمة الفواكه وبسرعة رفعتها بوجهة وهوه رفع اديه اثنينهن ويمثل الخوف وجماعته يضحكون عليها ، منظرها وهية مخلية اختها وراهه ولازمة السجين الزغيرة بوجهه وتتنفس سريع وترجف من الخوف اثر بگلب اسيا الي جانت دموعها تنزل مثل شلال ، وقبل ما يتحرك تجاه البنات كامت اسيا الي جانو مقيدين اديها وحلگها ببلاستر وكفت بوجهه وهية تحاجيه وميطلع منها غير الونين ، باوعلها وارتفعت وجناته بابتسامة من جوة القناع رفع ايدة ووخر البلاستر من حلكها وهيه مستمرة تحجي بلهجة مكسرة عراقي على خليجي على لغتها الأم .

اسيا : انا اخذني انا ولا تگرب لماما فيان
انا اسوي الي انته تريد بس تترك ماما فيان واخوه لا تأذي فيان واخوه . . انا رح يسعد كلكم بس لا تگربون الهم .