عشق الضواري

بارت 14

زيد: على راحتج بس خلي اطيج رقمي حتى من تخلصين كل اموركم تخابريني اجيكم . . سكت شوية وكال . . شعجب شو ولا واحد اجه حتى ابو زمن ماطب بعد .

اول ما كمل كلامه سمعو صوت جاي من المطبخ . . اماعين تنكسر .

غمضت اسيل عيونها بنفاذ صبر وهيه تتحسب على كل واحد يأذي بنتها كامت من يم زيد وكفت بعد خطوات عنه وكالت .

اسيل: زيد حبيبي اعذرني يوم لازم اكوم هاي اقبال مناوية تخلي اليوم يعدي على خير لان كعدت من النوم بهيج وقت . . بس اشوف شكو واجيك .

طبت للمطبخ وهيه تشوف اقبال لازمه جمانه من شعرها بايد ومن ياختها بالأيد الثانية وجمانة لازمتها بنفس طريقتها ووحده تعت بالثانية واخوها ماموجود بالبيت واقبال تهددها بخالها بصوت ناصي تخاف خاف يسمعها خطارهم وجمانه مستغلة الوضع وتعت بيها بكل قوتها وكلما شدت عليها اقبال جمانة تتعمد تصرخ وتعلي صوتها لحد ماعافتها اقبال وكامت هيه تتوسل بيها حتى تعوفها وجمانة متقبل تعوفها انصدمت امها بيها لمن شافت ابتسامتها الجانبية الي بدت تبرز بشكل مخيف وكأنها تستشفي بمرت خالها وتتشمت بضعفها لحد ما انتبهت اقبال لحماتها اسيل وكامت تستنجد بيها . . اقتربت اسيل من بنتها وحاولت تفرغ مرت اخوها من ايد جمانة بس بعدها مجلبة بشعرها ومتقبل تعوفها واقبال تبجي وتتوسل باسيل حتى تفرغها لحد ماعاطت بيها امها ودفعتها
ليوره خلتها تفرغ مرت خالها وكالت بصوت بارد وبنبرة استهزاء تقصد مرت خالها .

جمانة: لو عايفتني امسح بيها الكاع لهالخبيثة . . شوفيها شلون متقبل تعلي صوتها وصارت حبابة من اجه واحد من اهلي . . تخاف يعرفون بسوالفها الحقيرة وياية وياخذونا وتنكطع عنها الامدادات وبعد منيلها كل شهر 500 تصرفهن وتطلع وتلبس وتتونس لهالمتسولة هاي .

باوعتلها اقبال بغضب وهيه تبجي من وجع راسها وشعرها الي تكطع وكالت .

اقبال: لج زمالة كلبة بس خل يجي محسن الا اخليه يربيج من جد وجديد . . اني متسولة يالمشردة يالتايهة . . ولجن من سوالفجن العوجة حتى اهلج ذبوج انتي وامج وتبرو منجن يالوصخات .

شاطت جمانة مو لأن غلطت عليها هيه متعودة ع الغلط والمسبة والمعاير من مرت خالها . . بس الي خلاها تفقد اعصابها لمن اقبال جمعتها هيه وامها وغلطت عليهن وامها مو عراكه وتجاوب اليعاديها بالصمت طفرت من مكانها على مرت خالها وهيه تملخ بشعرها لحد ما انترست ايديها واقبال مخليه ايد على ايدين جمانة وايد على حلكها كاتمة صرخاتها خاف يسمعها ابن عم جمانة . . صارت اسيل بنصهن وهيه تدفع بنتها بصعوبة وتفرغ اقبال من ايدها واقبال ماصدكت ركضت بره لغرفتها وقفلت الباب على نفسها تخاف تلحگها جمانة، وكفت اسيل بتعب وهيه تعاتب بنتها .