عشق الضواري

بارت 37

يابة ترة استاهل تصوتون للبارت وتعلقون بتوقعاتكم للبارت الجاي لان تعبت بالكتابة والواتباد شلع كلبي انشر وماينشر البارت
البارت هذا ٣٣٧٤ كلمة تلث الاف وتلثمية كلمة اتمنى اشوف تفاعل حتى اطول الكم البارتات الجاية مثل هذا
.
.
.

ابتسمتله جمانة وهيه تفوت للغرفه وبمجرد ما خلت السطله ع الكاع ورفعت راسها شهكت بصدمة ، وهية تشوف الكنتور مفتحه البوب مالتة والملابس كلها مطشرة ع الجرباية ونص ع الكاع وتلث عطور مشمرة فوگ الملابس والفرچة مال شعر بالكاع والميز تواليت صاير هوسة ساعات وكريمات الايدين والوجه مال ترطيب وبخاخ الشعر ومعطرات فم بنكهات مختلفة رفعت حواجبها بتعجب من الي دتشوفة اول مرة بحياتها تشوف غرفة رجل وبيها كل هالشغلات ، بعد مرور نص ساعة خلصتها جمانة ابين ترتب الغرفة وبين تشم ملابس زيد وهالشي خلاها تضوج من نفسها وتستغرب الي دتسويه بس هالعطر كلش طيب عطر عربي بحت بيه مزيج من عطر الورد والعود اهم شي ريحة العود الي جمانة بطبيعتها تحبها وتذكر لمن انصدمت بزيد بالشارع وعطرة لزك بأيدها ولمن واجهته بالاستقبال مال بيت خالها وجان عطرة تارس استقبالهم ومن وصلت يمه جانت بكل كلمة تحاول تاخذ نفس جبير حتى تستنشق عطره اكثر بسس هوه كشخص يغثها وكلشي بيه يستفزها هدوئه وصمته وكلامه الي على كد السؤال وبس ونظراتة الحادة الي تبث الثقة والقوة والتحدي طوله الفارع ووسامته ولون عيونة الاصفر الصافي ورسمتهن الدقيقة الي زايدتهن جمال مسحوبات بالطول ورموشهن هالكد ما كثيفة عبالك مكحلات بكحل خفيف . . اهووووو هاي شبيج جمانة تخبلتي مرتين شفتي الولد وكاعده تفكرين بيه سحلتي روحج عليه .
بعدت زيد عن تفكيرها وهيه تكمل اخر شغل عدها بقن بس العطور التلاثة شالتهن واخذتهن ترتبهن ع ميز التواليت شد
انتباهها كتابة ع العطر الجوزي دارت وجهه عليها وقرت "خلاصة العود الملكي" وجواها بنص العلبة مكتوب بخط كلش حلو "زيد الضاري" عگدت حواجبها بعدم فهم واستغربت معقولة يكون زيد هوه الي مسوي هالعطر بنفسه هوه هذا العطر الي ساحرها ومخربط احوالها قربت العلبة لخشمها وهيه تشم العطر بعيون مغمضة وعقلها انفصل عن الواقع وغاب بعالم الخيال ثواني وفتحت عيونها على وسعهن وابتسامتها علت بالتدريج بعدت العطر باوعتله بخباثة وهيه تتلفت وراهه وناسيه انو هيه لوحدها بالغرفة لفت العطر بالملابس الوصخة ولمت ادوات التنضيف وطلعت باوعت بالصالة مالكت احد ركضت لغرفتهن طبت وسدت الباب وهيه لازمة قميص زيد باوعت للغرفة ماكو امها يمكن كامت تغسل راحت بسرعة لجنطتها الجبيرة فتحت الجيب الجانبي ووكفت فكرت خاف يحطون الجنطه بقوة على الصفحة وينكسر العطر بداخلها سدته ورجعت فتحت السحابة الجبيرة نبشت ملابسها للنص لفت العطر بتراكسودها ورجعته بنص ملابسها وسدتها
ورجعت طلعت ولا كأنها مسوية شي ، فاتت للمطبخ لكت امها كاعده تباوع للفراغ .

جمانة : شو لوحدج لعد وين جواد .

اسيل: راح يجيب فاصوليا مسلوكة حتى نلحك نطبخها للغدة .