عشق الضواري

بارت 38

نزلت فيان للصالة وهية تشوف ايفان تسلم اسيا وام مناف فلوسهن وتكلهن هاي فوكها مكافأة وبعد لا تجن للشغل . . فتحت عيونها بصدمة بعد ما استوعبت الديصير وبسرعة مشت خطواتها وهيه تاخذ من ايديهن الفلوس وشمرتهن جوة رجلين ايفان الي رادت تصيح وتحجي بس سكتتها فيان وهيه تحجي بعصبية .

ڤيان : مدا تشوفين نفسج تماديتي هواية منو انطاج الحق تتصرفين بدون علمي ومنو سمحلج تصرفيهن من الشغل بدون ما ترجعيلي وتحجين وياية ولج اني رغم ادري بيج اخذتي حصتج من الورث واجي ابلغج اول باول باستثماراتي والنجاحات الي احققها وابد ما اظم عليج ومخليتج تتصرفين براحتج بكلشي وكل يوم اكول بلكي تحس بيه بلكي تعقل وبلكي وبلكي وكلها امنيات ما اظنها رح تتحقق . . لهنا وبس عاد هذا بيت جدي وباسمي وما اسمحلج تتصرفين هالشكل وياهن اسيا صارلها كم سنة ويانة وجدو وصانا عليها  ومرتاحه بالشغل هنا تردين تطردينها حتى ترجع لبيوت الناس البلا ضمير نسيتي لمن جابها جدو من بيت صديقة شلون جان حالها نسيتي شمسوين بيها وكمية التحرشات والاعتدائات الي متعرضتلها شنو عبالج اذا تطرديها الشركة الجابتها من بلدها رح يتلكوها بالاحضان ورأسن ينطوها شغل ابيت ناسه محترمين نفسهم وميهينوها وبين كلمة والثانية يكلولها انتي خدامة وانتي عبدة وانتي كذا وكذا ومتناسين انو هيه مسلمة حالها حالهم وفرضا كلنه ميهتمون للدين حالهم حال غيرهم عبالج رح يحنون عليها ويكولون ، ياا خطية هلي انسانة حالها حالنه الفرق انها فقيرة معدمة وعندها طفلين مرضى وارملة خلينا نعطف عليها لان عافا بلدها واطفالها واجتي لهنا علمود لكمتتهم وعلاجهم . . وج انتي شنوووو بكيفج تلعبين ونوب جاية على ام مناف . . وج ام مناف الي من صغرها ترملت وماخلت شغلة ما شتغلتها حتى تدبر لكمة حلال لبناتها الخمسة ولجأت للشغل بالبيوت وهم تعرضت لتحرشات ومضايقات لو ما بعضهم بكلوبهم هم جان سوو بيها مثل اسيا ماكلتي لنفسج لمن تطرديها وين راح تروح تشتغل وبناتها شنو مصيرهن ومدارسهن وجامعاتهن ومصاريفهن منو الهن . . اذا الفلوس والسلطة الي صارت بيدج من تالي نستج انتي بنت منو ونستج على شنو تربيتي احب اكلج اني مانسيت وما كدرت الفلوس تغيرني على اهلي وناسي وما اسمحلج تطرديهن من بيت جدي الشيخ رافد ولحد اخر نفس بيه راح ابقى ارعاهن واساعد المستضعفات مثلهن سواء من امثالج او من غيرج .

اندارت على اسيا وام مناف وهيه تحاول تهدي نفسها وحجت وياهن بنبرة شبه حادة

فيان : خاله ام مناف ليش هيج تسوين واكفة وتسمعيلها وبالجذب ما جيتي شكيتي وحجيتيلي . . هسه بالله اسيا نكول تخاف يرحلوها ع بلدها لو يدزوها لغير بيت تشتغل وتسكت ومتحجي بس انتي ام البيت والج  معزة وفضل جبير علينا ليش تسكتين . .لعد بس اني ترزليني وتلوميني اذا هملت دراستي لو صحتي . . ادري بايفان لسانها طويل وما اكلج عامليها مثلي لان متستاهل اهتمام انسانة مثلج بس اقلها لمن تتعرضين لشي بلغيني . . وهالحجي الكم اثنينكم اي شي يصير وياكم سواء عد اهلكم لو هنا لو باي مكان كلولي انطوني خبر . . لتخلوني مثل الطرطور ابينكم . . وهاا لتسألوني شو طرطور لان ما اعرفلها .