عشق الضواري

بارت30

يمان: لا توصي بعد اخوك هسه احنه كثفنا البحث ونشرنا العناصر بالبساتين ، حتى الفلح جاي يساعدونا ويدورون ويانه . .
قطع يمان كلامه وهو يرد ع واحد من الوياه وادهم يسمع كلامهم الي عرفه انهم لازمين واحد من الشاردين مصوب وماكادر يكمل طريقه . . تعذر يمان من ادهم وهو ينطيه كلمة انه راح يحاول يلكه البنية الثانيه ويعرف تفاصيل القضية .

طر الفجر والشرطة مابطلو يدورون المنطقة والكل يساعد لأنها اول مرة من بعد سنين يدخل غريب لكاع الشيخ ضاري ومو اي غريب لاا عصابة وخاطفين بنات . . جان يمان واخوه براق واكفين قريبين من وحدة من الاشجار ويباوعون للشمس الي بين ضواها وره الغيم ملت المكان بضوه ابيض اقترب يمان بخطواته من الكصب الي بصفهم يبعد خطوات قليلة عنهم وهو يلاحظ الكصب نصه مكسر وبيه فراغ من فوك يبين كلما يقترب منه يبين بداخله شي لحد ما وكف وهو يبعد بايده الكصب من فوگ . . شاف جثة لبنية شابة چانت شاحبة وملابسها مليانة طين ووجهها وشعرها متلوثين صاح على الي واكفين يمه وهو يفحصها لحد ما گام وهو ينفظ ايديه بأسف على حال هالبنية الي ماتت بعز شبابها بسبب ذول المجرمين اهل الاسعاف جابو السدية بس ماكدرو يفوتون جوه للبستان الي بيه جثة روزة وبقو ينتظرون بره بأمر من يمان الي لف جثتها بجرجف ثخين وهو يغطي كل جسمها ويشيلها يمشي وكل شوية يباوع لوجهها الي يحجي عن طفلة ماعاشت طفولتها وشابة ما لحگت تعيش حياتها وتضوگ طعم السعادة ، يحجي عن طفلة صارت ام لطفلة ثانية وهيه بعمر زغير ، طفلة تحملت عذاب وقسوة ذئب بشري هتك عفتها وقتل برائتها ، غوركت عيونة بدموع كتمها بقوتة وصلابته لكن رغم قوة شخصيتة وبرودة گلبة ومشاعرة مايعرف ليش من يباوع لوجهها ينعصر كلبه بقهر عليها . . وصل لسيارة الاسعاف وهو يخليها ع السديه ورجع لزم المسعفين اثنينهم وهمسلهم بكلمات محد كدر يسمعها غيرهم
طلعت الاسعاف والكل يتحسفون على هالبراءة الي انقتلت بدم بارد ، اشر يمان لأخوه ياخذ مكانه وهو يروح يكمل اجراءات الجثة ويعرف تفاصيل الفحص الطبي . . طلع وراهم للمستشفى وهو يتصل على ادهم . . مرت ثواني وجاوبه ادهم بلهفة وهو منتظر يسمع بشارة عن اخت البنت الي جابها لامه .

ادهم: ها يخوي بشر تره البنية حالتها بالنازل ووضعها بده يسوء اكثر من گبل .

يمان: والله ماعرف شاحجيلك يا ادهم . . لكيت البنية اختها بسس . . لكيتها جثة
. . اسمعني زين البنية العدك لازم تظمها عن عيون الناس ودير بالك تخلي واحد من بره يدري بقصتها خل امك تكول بت اختي كرابتي اي شي حاول ماتخلي احد يدري بموضوعها لأن هذا الي لزمناه بالبستان خلينه الولد كل واحد ياخذله وياه خمس دقايق گتل وترويع وما طول وياهم حجالنه كلشي بس من شفته بده يتعمق بالاسرارطلعت الكل حتى براق ماخليته يكعد يمي . . طلعو عصابة يتاجرون بالممنوعات ومن ظمنها البنات نصهن يقشمروهن ويستدرجوهن سواء عن طريق الفيس او المواقع الثانية ويجلبون وياهن اشهر وسنوات علاقة حب وهالسوالف يخلونهن يثقن بيهم وبعدها يواعدها بمكان ويخطفوها ونصهن يخطفوهن من مدارسهن لو بيوت اهلهن اما ذني البنات عكس البقية ذني يصيرن بنات زوجة رئيسهم كال رجل امهن معتدي عليهن وبعلم امهن وبايعهن لناس كبار بالخليج . . هذا كله بصفحة ومن كلي عصابتهم مدعومة من واحد جبير بالحكومة ولو تدري منوه ا....... ا......... يكول هوه يدعمنا ومبين واثق انه راح يطلع من السجن ولهالسبب ماخليته يعيش خنگته وخلصت عليه بمكانه بعد ما صورت كلشي بتليفوني وراح ادزلك التسجيل خاف يصير عليه شي لو تنعرف السالفة عاد واحد من عدنا يملك دليل وبمساعدة جدي ونفوذة ومعارفه تكدر ذاك الوكت ترفع قضية عليه . . ماوصيك ادهم حاول تفهم امك خليها تكول البنية كرابتها وتيتمت لو شوف شلون تطلعولكم سالفة حتى محد يكدر يوصل الها صارت برگبتنا بعد .